SABURI 18 - BIBILLYA Mareiyo Meele a Iruva

Kyiimbo kya Davidi Kyeevinga

¹ Mmbo shikukundye, Ee Nndumi Iruva, Mashika kukee finya yakwa.

² Nndumi Iruva mmbwe isimamba lyakwa, Mmbwe turuve yakwa na mwiikira wakwa, Iruva wakwa ni isimamba lyakwa mmbwe shikeenrishya ashiringe. Ngawo; yakwa, finya ya ukiro lwakwa na turuve yakwa. Kashiringa nta kuleefo kindo kishipaana.

³ Shavaanga Nndumi Iruva yeto akwaani irumishwa, Kashuuta vakiduva vakwa.

⁴ Sharingitywa ni nrenga ya ufu taari toose, Na shashingyilyo ni fyuure.

⁵ Sharingitywa ni fyoove fya ufu, Na mireiyo taari toose.

⁶ Kya ukiva lwakwa loose shavaanga Nndumi Iruva, Shavaanga Iruva wakwa nashitarami. Keeta unyanga lwakwa efo mmba yakwe, Kaarannya kiiyo kyakwa.

⁷ Iruva kanyafukwa, kidina-si kyikasha, Mafumbu na misuka ya vayo ikaringina.

⁸ Nsu ukasomuka na mmbwen, Kipala-pala kya muro kyuuka kaniny kyakwe, Amwi na makaa,

⁹ Kainyika ngina ikaoloka, Kukava-fo na ireema iniini kwasi ya ngyayo takwe.

¹⁰ Kaalukya uwe ya Kerubi karumbuka; Karumbuka na uraato eekaaye maaru a uraato.

¹¹ Kaalwa ireema ando akwe kwa yoovya, Mafishi maroo a mura akansikya.

¹² Ekisomukya ukova lukamika; m-mbwa ya mawe na kipala-pala kya muro; Fikasomuka fyuuka mafishiny maroo.

¹³ Naasa Nndumi Iruva karuruma ooka nginii-u, Unyanga lwa yeto Nniini lukaitiwa luuka uwe.

¹⁴ Kyeerya vafiduva vakwa mife kavanyanyata, Karumbuta ukova kavarishisa.

¹⁵ Llya kulekyeemya fikasukuwa, Misingyi ya ulana ikalollywa.

¹⁶ Nndumi Iruva kaorwa woko ukya uwe kashuuta, Kashuuta ndilyiny nniini

¹⁷ Kashikira vakiduva vakwa Vatiri finya shiingyi, Kashikira yewo vashisuuye Mashika vetiri finya vakashiilannya,

¹⁸ Vakashaarama shikee ngatareny, Indi Nndumi Iruva kashiringa.

¹⁹ Kashivika ando kutiri mwaanya, Kashikira kimaruma shilensennya.

²⁰ Nndumi Iruva; kashininga findo fya pya, Kimaruma shilerunda fya usumanu, Na maako akwa alatiri ukasha.

²¹ Yeny nshilelatya shia ya Nndumi Iruva kashitaa, Nta shilere Iruva wakwa kyeendwa ni ulyamari-fo.

²² Shileinndya mavavaso akwe moose, Shalatya ushilyi lwakwe.

²³ Mbee yakwe shilatiri ukasha, Shakwiisa iitana makasha kya nkuushu.

²⁴ Kya indi Nndumi Iruva kashiraa yaambo, Kyeendwa ni mashora akwa We eeshi maako akwa nnatannyi makasha-fo.

²⁵ We mmbo akee wa dede, Kwa ewo vakee va dede kwakwe, Nsha kwa vandu vakee vesha.

²⁶ Yewe kwatima kwa vandu vatimye, Na nnyasi kwa vandu veesi.

²⁷ Yewe kwakyira valya vekunyiisa, Na iwunndwa yewo vekutuula.

²⁸ Ee Nndumi Iruva, Yewe kukeshimikya, Ee Iruva wakwa kwashuuta ireema.

²⁹ Kwashiidimisya ikapana na vakiduva, Kwashiniinga finya ya ikillya isimamba.

³⁰ Mirundye ya Iruva yeu alatiri mbese, Nndumi Iruva marero akwe ni dede. We ni kisiiko kya valya vanrishyaa.

³¹ Ni vi akee Iruva, Kuuta-fo Iruva weeru? Ni vi akee isimamba, Kuuta-fo Iruva weeru?

³² Iruva mmbwe ashisimmbye finya, Neeringa shia yakwa.

³³ Kavangisa marende akwa sha kinamburi, Kashiseleesa kipwa efo ifumbu-u.

³⁴ Kashilosha ikapana fira, naambo shiwoni finya ya yoommwa ura lwa arera.

³⁵ Ee-Nndumi kwashiniinga ngao ya ukiro lwafo, Woko lwafo usha lukashivangisa, Na weekyi lwafo lukashing'anisa.

³⁶ Koota misindara efo shia, Nta kulaore shilemmbwa ando.

³⁷ Sharuuya vakiduva vakwa kutani shavatira, Kulaore nshiimuyaa kutani shavarumata.

³⁸ Shivatuule sumbai valashiidimase ikwiipoo, Mbee yakwa vammbwa sumbai na ilemwa.

³⁹ Yewe kwashiniinga finya ya ikapana fira, Na vakiduva vakingwa kwasi yakwa.

⁴⁰ Kwarishisa vakiduva vakwa, Na valya vashisuuye shavarumata,

⁴¹ Vakakapa kiiyo kulave nndu avakira, Vakafuuya Nndumi Iruva, Indi nta nalavarouwe.

⁴² Shilevakakapa vakava sha kiluulyi Kikevivitwa ni uraato; Shaveera poo sha ipwashi lya shia.

⁴³ Kwashuuta maakony a vaafinya, Kwashaallwa mangyi ya masanga, Mashinga a vandu shilaveeshi vakashirundya.

⁴⁴ Vakashiita indi, vakashiindya, Veny vakashisheyaa vereremyaa.

⁴⁵ Veny nawo vakafwa nrima, Vakasuma turuveny tawo vererema.

⁴⁶ Nndumi Iruva eefo na muu, Narumishwa isimamba lyakwa, neetikiswa Iruva wa ukiro lwakwa;

⁴⁷ Kashikapannya kwa vakiduva vakwa, Kavika masanga sumbai yakwa;

⁴⁸ Ee, kashikira vakiduva vakwa; Kashiniinga uvingo uwe ya yewo vashisuuye, Kashiringa yewo vakee mbafu.

⁴⁹ Naasany Nndumi; Shikurumishaa nnang'ani a masanga, Shikwiimbyaa fiimbo fyekwaarafuma.

⁵⁰ Iruva mmbo akundya mangyi yakwe uvingy uniini, Yeto akee nsauwe Kamoora ikunda lyilasyaa; We Davidi na vana va vana vakwe Fika llung'anu.