SABURI 17 - BIBILLYA Mareiyo Meele a Iruva

Kiterewo kya nndu Nsaari

¹ Woi Nndumi Iruva; kushaarannyi kya usumanu, Elyi shiifo shikuterevaa, Kwaaranyi kiiyo kyooka kaniny kyakwa, Kuwarye kiterewo kyuukye nriminy,

² Kurummbwe kyakwa kisha, Mashika usumanu ni kwafo luukye.

³ Yewe mmbo kushiishi nnu, Kuleshisununda shilele rweny, Nta nkulelollya ntambo nnang'ani yakwa-fo.

⁴ Mmbo shilekaa efo usumanuny, Shaindya ivavasyo lyafo, Shalakana na vaala shia.

⁵ Shia yafo mmbo shileilatya kyeeri kyoose, Nta nshilelakana nayo-fo.

⁶ Woi Iruva shiifo shikuvaangaa, Mashika kushiitye, Kushilootye yaarwi lyafo, Kushaarannyi marero akwa.

⁷ Ora ikunda elyo lyafo iniini, Yewe mwikira valya vakuvikye nsia, Na valya veefo vakurishyaa, Kuvakire na woko lwafo usha.

⁸ Shiringa sha elyi kuringaa nyinyiri ya iriso, Kushisurumi efo kwasi ya kirishe kya maaru afo.

⁹ Kwaasha na ngapo ta yewo valyang'a, Vakiduva yewo vashiringitye.

¹⁰ Vareraa marero awo ekutuula, Nta mirima yaawo ilatiri usari.

¹¹ Ulaalu vamma ishiringitya wo taari, Naambo vakooye ishituula si.

¹² Vanshilaaya sha miiso, vashiratwe-ratwe, Sha mwana wa miiso alaaya kyeekya kyakwe.

¹³ Woi Nndumi Iruva, kwiipoo! Kwa finya yafo kushitarame kuvavinge, Vandu yeva veesi. Shuuta maakony a varavi na usu lwafo.

¹⁴ Woi Nndumi Iruva, kwa woko lwafo Shikira vandu yeva, Vandu valasarye kindo kyingyi, Kulaore ni fya ulana yelu tupu. Iwutisa ndeu tawo na filya kuvadeesye na vana vaavo vave na fiingyi mmwa-si Nawo vareeye vakoku vavo kindo

¹⁵ Indi yeny mmbo shishekulollyaa yewe, Kimmba nkee wa dede mbee yafo, Shankwipoo mmbo nshishywaa ifura yo mbee yafo.