SABURI 16 - BIBILLYA Mareiyo Meele a Iruva

Itereva Uringyi

¹ Shiringa woi Iruva, Mmbo shakweera kwafo, naambo kushitarami.

² Shavia Nndumi, “Ni yewe Nndumi wakwa, Shilatiri kindo kingyi kisha kuuta yewe.”

³ Veele vatokyi vakee yaa ulaniny, Ni ifura ikaa amwi nawo.

⁴ Valya veefo varuuya maruva engyi, Vakeengera fyoova na ukiva, Nta shilapaana samu ya firaso fyawo, Nta isenda marina awo kaniny kyakwa.

⁵ Nndumi mmbwe finya yakwa. Na muu wakwa shawaara kwakwe.

⁶ Kashivika ando kusha Yee-da kaveshiniinga dingu shisha

⁷ Shirumishaa Nndumi kya mesha akwe, Na elyi kyio kafweerisa nrima wakwa.

⁸ Shavika Nndumi efo mbee yakwa, Mashika we mmbwe woko lwakwa usha. Shilavaa yuutwa-u.

⁹ Kwekyo nrima wakwa ukeefura, Na ngoo yakwa ikerumisha,

¹⁰ Mashika nkureeya nrima wakwa kwa varumu-fo, Nta kulaniingya mweele wafo naone ukyiva-fo.

¹¹ Mmbo kushoora shia ya muu Mbee ya usangu lwafo mmbo kuishwa ifura, Na efo wokony lwafo usha mmbo nkwiifo mesha fyeeri filung'ani.