SABURI 148 - BIBILLYA Mareiyo Meele a Iruva

Uvaango lwa vandu voose warumishe

¹ Haleluya! Nganiseny Nndumi Iruva efo iruveeu! Nnganiseny efo kukee uwe ya findo fyoose!

² Nnganiseny yeni vasu vakwe woose! Nnganiseny maronda akwe moose!

³ Mwi na mwiiri, nnganiseny! Nnganiseny, nyinyiri toose timikaa!

⁴ Nnganiseny yeni ngina ta ngina! Na mura ukee-fo!

⁵ Fyoose finganise irina lya Nndumi Iruva, Mashika mmbo fileumbwa niivavaso lyakwe.

⁶ Kafivangisa fikeeu llung'anu. Mmbo areraa kilashaalashikaa.

⁷ Nganiseny Nndumi Iruva kunu urukeny, Yeni mafisi a mureny,

⁸ Muro na mmbwa ya masaawe, masaawe na nrike wa mura, Uraato na fititasi ya finya,

⁹ Mafumbu na fidooro fyoose, Miri ya ndunda na ya ngorosho toose,

¹⁰ Mafisi moose na findo fya mmba fyeevikya, Findo fikuruffwaa-si, na ndeye.

¹¹ Vamangyi va ulana na vandu va vayo woose, Vaniini woose va ulana.

¹² Vana vakoo, vasero na vana vakyika, vamiku na vana.

¹³ Woose vanganise irina lya Nndumi Iruva. Mashika irina lyakwe lyo yeni llyo lyitiri nnduma, itumbe lyake lyikakwaana iruveeu na ulaniny,

¹⁴ Nawe kalyimya vandu vakwe finya, Nto nnduma wa vandu vakwe woose Vana va Israeli, wo vandu vakee kufii nawe. Haleluya!