SABURI 146 - BIBILLYA Mareiyo Meele a Iruva

Irumisha Iruva Mwiikira

¹ Haleluya! Ewe nrima wakwa ng'anisa Nndumi Iruva.

² Mmbo nshenganisaa Nndumi Iruva kyeeri kyoose shisindi na muu. Shiimbye Iruva wakwa elyi shikee na muu.

³ Mulavike vaniini va ulaana yelu nsia-fo; Nta nndu wa vandu nnyashiidimaa yeende ukiro-fo.

⁴ Muu wakwe mmbo ushuuka, nauwe ukawuya neefo uteriny aleuka. Llyo na nkonu shila takwe toose tirekaa.

⁵ Ngoma ni nndu yeto Iruva wa Yakobo akee ngarami yakwe, Na ivika nsia lyikava kwa Nndumi Iruva, Iruva wakwe.

⁶ Yeto aleumba iruveu na ulana, Yeeve na nsemu wa vayo, Kavefitiryiu llung'anu,

⁷ Mmbo ava mwiitarama yewo vakee vasisye Neewo vatiri nshaa kavawuutisa, Nndumi Iruva kaboromwa yewo vakee vafinge.

⁸ Neewo vafu miso Nndumi Iruva kavatarambwa miso awo. Nndumi Iruva keeboo yewo vakee ngatareny, kakunda yewo va usumanu.

⁹ Nndumi Iruva mmbo aringa veny, Katarama vana va ngwera na vaka va ding'u. Lyo shia yeewo valakee va usumanu kaireta.

¹⁰ Nndumi Iruva mmbo asheshillyaa llung'anu. We Iruva wafo yewo Sioni, marika na marika Haleluya!