SABURI 140 - BIBILLYA Mareiyo Meele a Iruva

Itereva Iringwa

¹ Woi nndumi Iruva shaauwa maakony a vandu varavi. Kushiringe na nndu atiri kiila,

² Yewo vakusaraa maravi mirininy yaawo Wo nkonu vakeende ngapanu na fira.

³ Vakannwa ulumi sha shoka; Uroi lwa shoka nnyefo kaniny kaywo lukai.

⁴ Woi Nndumi Iruva shaauwa maakony a nndu nalakee wa usumanu. Kushiringe na nndu atiri kiila, Yeto akundye ishireta shieny yakwa.

⁵ Yewo vatiri kiila mmbo vashivikya nsoori na kiwoye; Vakavika nreiyo efo shia; Naambo shitiryou.

⁶ Mmbo shilevia Nndumi Iruva, “Iruva wakwa nnyewe!” Woi Nndumi arannya kyeerero kyakwa!

⁷ Woi Iruva Nndumi, finya yakwa na ukiro lwakwa, Mmbo kuleshiringa iwaawa kyeeri kya fira.

⁸ Woi Nndumi Iruva kulare nndu nalakee wa usumanu nainutye ekyo akundye. Kulaekye ntambo wawo, naambo valasheekushoba.

⁹ Na kyeeri vainwa mirwe yaawo yewo vashiringitye Uravi lwa kana kyawo luvawuiye.

¹⁰ Makaa a muro avawuye, vaye muro, Veeryo irininy valaukafo.

¹¹ Mwiiringya vengi nnyashesalalaa urukeny-fo. Nndu atiri kiila uravi lwakwe mmbo lushemmamitaa.

¹² Shiishi shamanya Nndumi Iruva mmbo ashekapannyaa yewo vafwafwa; Naveniinga vafwafwa usumanu lwawo.

¹³ Nkya dede yewo va usumanu mmbo vashekwaanaa, Neewo vesha mmbo vashekaa yoo kukai yewe.