SABURI 136 - BIBILLYA Mareiyo Meele a Iruva

Kyiimbo kya kyaanu

¹ Aniny Nndumi Iruva kimmba we akee nsha! Na ilyillya lyakwe lya llung'anu.

² Aniny Iruva wa maruva moose. Kimmba ilyillya lyakwe lyikee lya llung'anu.

³ Aniny Ndumi Iruva wa vaniini woose. Kimmba ilyillya lyakwe lyikee lya llung'anu.

⁴ Ni we muni aidima itana findo fya wende. Kimmba ilyillya lyakwe lyikee lya llung'anu.

⁵ Yeto aleumba iruveeu na wiidimi lwakwe. Kimmba ilyillya lyakwe lyikee lya llung'anu.

⁶ Yeto alevika uruka lukalollyo uwe ya mura. Kimmba ilyillya lyakwe lyikeelya llung'anu.

⁷ Kavika fyeende sa finiini fivii Kimmba ilyillya lyakwe lyikee lya llung'anu.

⁸ Nkyeere ushillye nsanyiny, Kimmba ilyillya lyakwe lyikee lya llung'anu.

⁹ Nato mwiiri na nyinyiri fishillye kio. Kimmba ilyillya lyakwe lyikee lya llung'anu.

¹⁰ Ni we alekaba Vamisri kawaa vavee vawo. Kimmba ilyillya lyakwe lyikee lya llung'anu.

¹¹ Kaauwa-fo Vaisraeli. Kimmba ilyillya lyakwe lyikee lya llung'anu.

¹² Na woko lwa finya lukewoorwe, Kimmba ilyillya lyakwe lyikee lya llung'anu.

¹³ Niwe alerauwa mura wa yeeve lya Siria. Kimmba ilyillya lyakwe lyikee lya llung'anu.

¹⁴ Karuutau Israeli ando oomu. Kimmba ilyillya lyakwe lyikee lya llung'anu.

¹⁵ Katuulafo Farao na ironda lyakwe efo yeeny ya Siria. Kimmba ilyillya lyakwe lyikee lya llung'anu.

¹⁶ Yeto aletetera vandu vakwe kulya kasa. Kimmba ilyillya lyakwe lyikee lya llung'anu.

¹⁷ We yeto alevinga vamangyi vaniini. Kimmba ilyillya lyakwe lyikee lya llung'anu.

¹⁸ Kawaa vamangyi vaniini vaeresye Kimmba ilyillya lyakwe lyikee lya llung'anu.

¹⁹ Niwo Sihoni mangyi ya Vaamori, Kimmba ilyillya lyakwe lyikee lya llung'anu.

²⁰ Na Ogu, mangyi ya Bashani. Kimmba ilyillya lyakwe lyikee lya llung'anu.

²¹ Kaipoo uruka lwawo luve dingu ya vengyi Kimmba ilyillya lyakwe lyikee lya llung'anu.

²² Dingu ya nsero wakwe Israeli! Kimmba ilyillya lyakwe lyikee lya llung'anu.

²³ Yeto alelukumbwa kunu unaniny lweru. Kimmba ilyillya lyakwe lyikee lya llung'anu.

²⁴ Kalwaauwa maakony a veeturo veru. Kimmba ilyillya lyakwe lyikee lya llung'anu.

²⁵ Kyoose kitiri muu kakisimba kyeelya kya vayo. Kimmba ilyillya lyakwe lyikee lya llung'anu.

²⁶ Aniny Iruva wa iruveeu. Kimmba ilyillya lyakwe lyikee lya llung'anu.