SABURI 12 - BIBILLYA Mareiyo Meele a Iruva

Kiterewo kya Weekyi

¹ Woi Nndumi Iruva shakutereva kusheekye Mashika nkukyii-fo nndu aishi Iruva-fo, Nkukyiifo dede efo nnang'ani a vandu-fo.

² Wo umwi mmbo akee yaamba wongo kwa amurasa wakwe, Firomu fyakwe fikarera fya ukunangari na ntambo.

³ Nndumi Iruva ima ngyulumi eto ta verevere, Na firomu efyo fikerera ntambo na ikutuula,

⁴ “Kya mirerye ya kana kyeru mmbo lutera irera yefyo lukundye, Na nkwiifo nndu ashiidima iluima-fo.”

⁵ Nndumi kaamba shammita kiiyo kyany Kya yewo vafwafwa vakevaviswa na iwonnywa, Mmbo shisalala shivakapannye.

⁶ Kyaasa kya Nndumi Iruva ni kya usumanu kyeeri kyoose, Shisha sha fesa ikeeshisangye yefo ituuruny Mmbo kivakye fesa shikore na muro matorito mfungare.

⁷ Woi Nndumi Iruva ni yewe kuringaa irika elyi iravi, Kuluise kyeeri kyoose.

⁸ Wo ando mmbo kwiifo vandu varavi Na uravi lwa wo ngata nnang'ani a vandu.