SABURI 119 - BIBILLYA Mareiyo Meele a Iruva

Mavavaso a Nndumi

¹ Ngoma yewo shia tawo tisumani, Vakakaa veelatyaa mavavaso a Nndumi Iruva.

² Ngoma yewo vasora ukireeki lwakwe vakannduya na nrima moose.

³ Yee mmbaletana fya kiila-fo, Mmbo vakesora shia takwe.

⁴ Yewe mmbo kuleloora shia yafo, Naambo lusore.

⁵ Mmbo shilangye shia takwe tisumani Naambo shisauwe mavavaso afo!

⁶ Llyo nsheraa shilasuka Shiilolaa efyo kuvavasye.

⁷ Mmbo nshekwaanaa na nrima nkesi, Elyi shammanya usumanu lwafo.

⁸ Mmbo nsheindyaa mavavaso afo, Naambo kulasheeshira!

Iindya mavavaso a Nndumi

⁹ A niinda mwana nkoo asangyaa shia yakwe? Neendye na eelatya irero lyafo.

¹⁰ Mmbo shilekuruuya na nrima wakwa moose Kulashire sheende mbai na mavavaso afo.

¹¹ Mmbo shilevika irero lyafo nriminy wakwa, Naambo shilashekulyamarya.

¹² Woi Nndumi Iruva mmbo kukee nnganise; Shiloshany mavavaso afo.

¹³ Kana kyakwa kashaambaa Kya usumanu lwa ekyo kushambaa.

¹⁴ Mmbo shifuraa na shia tafo, Sha ifura na masaa meengyi.

¹⁵ Mmbo nsheswaanyaa kya ufundo lwafo Shivelola shia tafo.

¹⁶ Mmbo nshefuraa na mavaaso afo nnu, Nta nshisherekyoo irero lyafo-fo.

Ifura lyikee mavavasony

¹⁷ Woi mmbee tannya nsero wafo mesha, Shikie nnu elyi shalatya irero lyafo.

¹⁸ Shitarambwa miso akwa naamboshilollye Findo efyo finiini fyuukye efo mavavasony afo.

¹⁹ Yeny shikee muny kunu urukeny; Kulashiime mavavaso afo.

²⁰ Nrima wakwa mmbo wakurya Na ilanga mavavaso afo kyeeri kyoose.

²¹ Mmbo kwakyeemya yewo vatiri kiila, Neewe veera mavavaso afo vakava vadenge.

²² Shuuta kiila na ikununguna Kimmba shanringa irero lyafo.

²³ Vasongoru mmbo valekusangirya vakashirera. Lyo nsero wafo mmbo ashesoongyaa kya mavavaso afo.

²⁴ Irero lyafo llyo ifura lyakwa; Na lya veeshilosha

Kya iindya mavavaso a Nndumi

²⁵ Yeny mmbo shiwarani na uteri; Shiviirya muu na irero lyafo.

²⁶ Mmbo shilekoongoya mbony takwa. Shiloshaany mavavaso afo.

²⁷ Shoora shia ya kiloshyo kyafo, Neeny shisoongye kya mashora afo.

²⁸ Yeny shimuni mmbo sheeka sha muuya; Shiniinga finya na irero lyafo.

²⁹ Shuuta efo shieny ya wongo; Irero lyafo lyisheengye isarya lyafo.

³⁰ Mmbo shilesauwa shia shisha; Shavevika usumanu lwafo mbee yakwa.

³¹ Mmbo shiriani na irero lyafo. Woi Nndumi Iruva kulashire shisuke!

³² Mmbo nshaangusyaa isora mavavaso afo, Elyi kusheauwaa nrima wakwa.

Kiterevo kya imanyissyo

³³ Woi Nndumi Iruva shilosha mavavaso afo, Neeny nshearingaa fika mafurumyony.

³⁴ Shoora mavavaso afo; Yee, nshearinga na nrima moose.

³⁵ Shiteterya shieny ya mavavaso afo, Mashika yo ishisennyi.

³⁶ Orisa nrima wakwa ulollya irero lyafo; Ulasheelollya lango ta ulana!

³⁷ Orisa miso akwa alalole findo firavi, Shiniinga muu shieny yafo.

³⁸ Vangisya nsero wafo efo kyaaseny kyafo, Ekyo kya ikwiindya yewe.

³⁹ Shuuta nkunung'unu ulavaa; Mashika usumanu lwafo llo usha.

⁴⁰ Yeny mbo shilangye irero lyafo! Shiviirya muu na usumanu lwafo.

Ivika nsia mavavaso a Nndumi

⁴¹ Woi Nndumi Iruva, ulyilyi lwafo lushisheye, Yee, ukiro yelo kulevika kyaasa

⁴² Neeny llyo nsherouwaa yeto mwiishikumba, Kimmba shivikye irero lyafo nsia

⁴³ Sheekya naambo shirere dede yafo, Mashika nsia vakwa mmbo ukee yefo mavavasony afo llung'anu.

⁴⁴ Kyeeri kyoose mmbo nshesoraa mavavaso afo Yee, llung'anu na llung'anu.

⁴⁵ Neeny mmbo nshesalala yoo kutiri mwaanya, Mashika elyi shankulosha kwafo,

⁴⁶ Irero lyafo mmbo nshelyoongoyaa vamangyi, Nta nshilyiiryaa son-fo.

⁴⁷ Neeny mmbo nshekyesaa nnu neefyo kuvavasye! Elyi shifikundye!

⁴⁸ Mavavaso afo yoo shaakundye mmbo nshefuraa nangu. Shiswaangye kya mavavaso afo.

Ukaari lukee mavavasony a Nndumi

⁴⁹ Kummbwa kyaasa kulevikya nsero wafo, Mashika ni yewe kuleshivika nsia.

⁵⁰ Ekyo nkyo kyashiviirya muu ngatareny takwa; Kyaasa kyafo nkyo kyashiirya muu.

⁵¹ Yewo va kiila mmbo valeshimina nnu, Lyo shilare irero lyafo.

⁵² Woi Nndumi Iruva, mmbo shakumbwa irero lyafo kikashiviirya muu;

⁵³ Mmbo shatirwa ni unyafi kyeendwa ni yewo valaishi usumanu, Yewo vareeye irero lyafo.

⁵⁴ Mavavaso afo akava nng'u nkeyiimba nkonu simu Naakwa nkyeeri shikee muny kundo kweny.

⁵⁵ Naakwa nnyelyi shilele shakukumbwa yewe, Shalatya irero lyafo woi Nndumi Iruva.

⁵⁶ Irero lyafo lyika va llyo masaa akwa:

Uleke mavavasony a Nndumi

⁵⁷ Nndumi Iruva mmbwe waavi lwakwa! Mmbo nsheindya irero lyakwe!

⁵⁸ Mmbo shilekutereva na nrima moose kushifwaaye. Kushilyillye shaasa kushivikye kyaasa.

⁵⁹ Mmbo nshesoongyaa asore efyo kuvavasye,

⁶⁰ Mmbo shileangusya isora mavavaso afo,

⁶¹ Yewo valakee va usumanu vakashaavika nafiwoye, Lyo shilarekyo irero lyafo.

⁶² Mmbo nshekwaana naakwa ni kio nnang'ani Kimaruma kya usumanu lwafo.

⁶³ Yeny mmbo nsangi neewo vakeekwiinndya Na valya vakeesora mavavaso afo.

⁶⁴ Ulana mmbo lwallyollya ilyillya lyafo woi Ndumi Iruva; Shiloshaany mavavaso afo.

Finya ikee mavavasony a Nndumi

⁶⁵ Nsero wafo mmbo kulentannya mesha, Shaasa kulembia, Woi Nndumi Iruva

⁶⁶ Neeny shilyimya urango; Naambo shiirikye mavavaso afo.

⁶⁷ Mmbo sheerekye shiilyisswa ukiva, Lyo ulaalu shammirikya irero lyafo.

⁶⁸ Yewe mmbo kukee nsha mwiitana mesha; Shilosha mavavaso afo.

⁶⁹ Vandu va kiila mmbo valeshivikya ureeree, Lyo yeny mmbo shisoraa irero lyafo na nrima wakwa moose.

⁷⁰ Mirima yaawo ikabong'a, Lyo yeny shakyesa na irero lyafo.

⁷¹ Mmbo kilesenya nnu llya shilekabwa, Naambo shuuteu ikulosha kwafo.

⁷² Irero lyafo niisha nnu kwakwa yeny Ngota saabu na fesa fiku.

Usumanu lukee mavavasony a Nndumi

⁷³ Maako afo nng'u aleshuumba. Shiloshaany mavavaso afo

⁷⁴ Yewo veekwiinndya vashilollye vasennyo, Elyi shalanga irero lyafo.

⁷⁵ Shiishi sheelyi shia tafo nta usumanu; Woi Nndumi Iruva kwashikaba kya usumanu.

⁷⁶ Mmbo shakuteeva isarya lyafo lyishiviirye muu, Shaasa kulevikya nsero wafo kyaasa.

⁷⁷ Isarya lyafo lyishisheye shiwuiyo muu, Mavavaso afo nng'u ifura lyakwa.

⁷⁸ Yewo vakiila vaone isuka, mashika elyi; valyeshifingya wongo. Lyo yeny mbo nswaangyaa irerro lyafo.

⁷⁹ Veekwiindya vashiwuiye Nawo vamanye irero lyafo.

⁸⁰ Nrima wakwa nato ukaariswa ni mavavaso afo; Naambo shilasheesuka.

Kiterevo kya Ukiro

⁸¹ Mmbo shauwa ifura kutani elyi nshewonisaa ukiro lwfo; Mmbo shilevereya irero lyafo.

⁸² Miso akwa nangu akaaraa evereyaa ilollya kyaasa kyafo. Shishaambaa, A niindii kusheshiviiryaa muu?

⁸³ Mashika mmbo shileva sha mboloko ya mfinyo ikee nsunyi. Lyo nshilerekyo mavavaso afo-fo.

⁸⁴ A suku ta nsero wafo ni yiinga? A niindii kushootyaa yewo vakeshirishya uvingo?

⁸⁵ Vandu va kiila mmbo valeshireiya misoori Vallatyaa mavavaso afo.

⁸⁶ Mavavaso afo moose mmesha. Mmbo vashirishya ruu, shaauwa-dwa.

⁸⁷ Nkinnywa vekeeshuuta yaa ulaniny, Lyo shilare irero lyafo,

⁸⁸ shiviirya muu na isarya lyafo; Neeny mmbo nshekwiryaa na irero lyafo

Kikusiryo efo Mavavasony a Nndumi

⁸⁹ Irero lyafo mmbo lyishekau woi Nndumi Iruva fika llung'anu, Lyikavikywa ukureeki kulya iruveeu.

⁹⁰ Usaari lwafo mmbo luiyoo llung'anu na llung'anu.

⁹¹ Irero lyafo lyakasaleesau findo fyoose fika inu, Naambo fyoose fikurundye yewe.

⁹² Irero lyafo lyive lyileva ifura lyako, Mmbo sherekyaa efo ukiveny lwakwa.

⁹³ Fika llung'anu nshisherekyoo mavavaso afo-fo, Mashika nng'u kwashiviirya nangu muu.

⁹⁴ Shikira mmbee, elyi shikee wafo! Kimmba shankulosha mavavaso afo.

⁹⁵ Varavi mbo vashivereye naambo vashirumate, Mmbo nsheswaangyaa irero lyafo.

⁹⁶ Mesha moose ashemandaa, Lyo irero lyafo llyimandaafo.

Ikunda Mavavasony a Nndumi

⁹⁷ Mavavaso afo mmbo ashisennyi nnu deny! Nngu nshaasongyaa nkonu simu

⁹⁸ Mavavaso afo mbo ashirangusaa ngota vakiduva vakwa, Nang'u mmbo shaatiri mikonu myoose.

⁹⁹ Mmbo shitiri urango ngota veelosha vakwa woose, Mashika ufundo lwafo llyo lukeeshirangusa.

¹⁰⁰ Mmbo shitiri urango shailanya vamiku, Mashika elyi shitiri ufundo lwafo.

¹⁰¹ Shakwiisa shilasore shia shiravi, Naambo shiindye irero lyafo.

¹⁰² Nshilekaa kwaasha na usumanu lwafo-fo, Mashika ni yewe kumuni kuleshilosha.

¹⁰³ Ufundo lwafo mmbo lurolaa nnu kwakwa, Ngota wukyi

¹⁰⁴ Ufundo lwafo mmbo lwashiniinga urango; Nkyo kimaruma shisuuye shia toose shiravi.

Saa Mavavasony a Nndumi

¹⁰⁵ Irero lyafo ntaa marendeny akwa, Na sa shieny yakwa.

¹⁰⁶ Mmbo shilelya mboo neeny shiinutye: Shiringe efyo fya usumanu lwafo.

¹⁰⁷ Mmbo shikeellyise nnu ukiva; Woi Nndumi Iruva shiviirya muu na irero lyafo.

¹⁰⁸ Woi Nndumi Iruva, warya firaso fyakwa Kuveshilosha usumanu lwafo.

¹⁰⁹ Mmbo shikee nrengeny kyeeri kyoose, Lyo shilerekyo irero lyafo-fo

¹¹⁰ Varavi mmbo valeshivikya misoori, Lyo shilare shia ya ufundo lwafo.

¹¹¹ Irero lyafo lyikava llyo dingu yakwa llung'anu; Mashika llyo lyashivangyisa nrima.

¹¹² Na nrima wakwa shauvika efyo irerony lyafo, Kyeeri kyoose yee fika llung'anu.

Uringi efo Mavavasony a Nndumi

¹¹³ Yewo vatirwa nyinyira mmbo shivasuuye, Lyo irero lyafo shalyikunda.

¹¹⁴ Yewe mmbo kukee ngawo yakwa; Irero lyafo mmbo shilyivereye.

¹¹⁵ Yeni veetana maravi, ukeny kwakwa, Shiwarani na mavavaso a Iruva wakwa.

¹¹⁶ Shivangisya efo fyaadeny fyafo, shikie muu, Nta kulashire shisuke shikuvikye nsia shimuni.

¹¹⁷ Shitarama naambo shikae kipwa; Shiloleny mavavaso afo kyeeri kyoose.

¹¹⁸ Mmbo kwalema woose yewo vashiimbwaa mavavaso afo. Mashika mmbo wooka mitambo ya wongo.

¹¹⁹ Varavi mmbo kavauta sha mamburu; Nkyo kimaruma shakunda irero lyafo!

¹²⁰ Mmbo nkekureremya shikwiinndyaa;

Wiindi Mavavasony a Nndumi

¹²¹ Mmbo shatana ekyo kikee kisha na kya usumanu, Woi mbee kulashireeye yewo vakeeshifota-fo.

¹²² Salallya nsero wafo nawone mesha. Yewo varavi valasheeshifota!

¹²³ Miso akwa mmbo anaraa eevereyaa ukiro lwafo, Na kyaasa kya usumanu lwafo

¹²⁴ Ora nsero wafo isarya lyafo; Kushiloshe na mavavaso afo.

¹²⁵ Shoora sheelyi mmbo shikee nsero wafo; Shiidimi iwaannya irero lyafo nisha.

¹²⁶ Fyeeri fyamfika fya Nndumi Iruva irunda mashora akwe, Mashika elyi valeimbwa mavavaso afo.

¹²⁷ Nkyo kimaruma shakunda mavavaso afo Ngota saabu, yee ngota saabu shisha.

¹²⁸ Mashika shilollye ufundo lwafo shaasa lurye mesha. Neeny shasua shia toose ta uravi.

Lango ya Iindya Mavavaso a Nndumi

¹²⁹ Ufundo lwafo mmbo lwiilanyi fyoose. Nkyo kyeengye nrima wakwa ukalulanga.

¹³⁰ Yoongwa irero lyafo mmba lyeende sa; Na yoora yewo valaishi kindo.

¹³¹ Kimmba shilekunda mavavaso afo, Nkyo shatarambwa kana shiloshe vengi.

¹³² Shiindukya mmbee, kushisarye, Shaasa kikooye veekunda irero lyafo.

¹³³ Shisumanisa efo irerony lyafo, Uravi lulasheshillya

¹³⁴ Shiwouwa efo uraviny lwa vandu; Shiware na irero lyafo.

¹³⁵ Induya nsero wafo kisangu kyafo; Kulloshe mavavaso afo.

¹³⁶ Miso akwa mmbo akeepuswa misoru Mashika elyi valakeelatya mavavaso afo.

Usumanu efo Mavavasony

¹³⁷ Nndumi Iruva ni yewe kumuni wa usumanu, Na mirumbuye yafo ni ya usumanu.

¹³⁸ Mmbo kulevavarya irero lyafo kya usumanu, na usha deny.

¹³⁹ Mmbo shilekuvinisa shimuni shawa, Mashika veetuuro vakwa mmbo valera irero lyafo

¹⁴⁰ Irero lyafo llyitiri nnduma nnu; Nawe nsero wafo kalyilanga

¹⁴¹ Mmbo shamirwa elyi shikee n-du, Nalyo nta nshirekyoo ufundo lwafo-fo

¹⁴² Usumanu lwafo llwa llunanu, Nalyo irero lyafo lyikava dede

¹⁴³ Ngatara na ukiva mmbo filesisheya, Mavavaso afo ni ifura lyakwa.

¹⁴⁴ Usumanu lwa irero lyafo llwa llung'anu, Shoora mbee, shikie muu.

Kiterevo kya Ukiro

¹⁴⁵ shiirika Woi Nndumi Iruva elyi shikuvaanga na nrima wakwa moose! Neeny mmbo ntiraa mavavaso afo.

¹⁴⁶ Mmbo shakuvaanga kushikire, Neeny shitire irero lyafo.

¹⁴⁷ Mmbo shatereva ngarami yafo kulore kwankya; Shavevereya irero lyafo na nsia.

¹⁴⁸ Mmbo shilala rembo, Shikusarye fyaasa fyafo

¹⁴⁹ Kyeendwa niisarya lyafo aranya unyanga lwakwa; Kushiviirye muu na irero lyafo, Woi Ndumi Iruva.

¹⁵⁰ Yewo vashisuye vansha kufii neeny; Vakakaa kwaasha na irero lyafo

¹⁵¹ Lyo yewe Nndumi Iruva kukee kufii neeny, Na irero lyafo ni dede.

¹⁵² Uka mabookyony mmbo shilemanya mmbo kuvikyeu Irero lyafo lyikaeu fika llung'anu.

Ilalakya weeki

¹⁵³ Nkyelolaukiva lwakwa kushikire, Mashika nshilerekyo irero lyafo-fo.

¹⁵⁴ Shikabannya kushiwouwe! Kushikire muu shaasa kyaasa kyafo kikai

¹⁵⁵ Yewo valakee va usumanu mmbawonisaa ukiro-fo, Mashika mmbakeelola irero lyafo-fo

¹⁵⁶ Isarya lyafo ni yiingi, woi Nndumi Iruva; Kushivirye muu na irero lyafo.

¹⁵⁷ Veeshisora ni veengi vashirumate, Lyo nshilekaa kwaasha na irero lyafo-fo.

¹⁵⁸ Mmbo shilelola veetana fya kiila shasukyo deny, Mashika mmbalelatya irero lyafo-fo.

¹⁵⁹ Nkyelola shaasa shikundye ufundo lwafo. Kushiviirye muu kya ilyillya lyafo woi nndumi Iruva.

¹⁶⁰ Irero lyafo lyoose mmbo lyikee isha, Na mirumbuye yafo ya usumanu nnya llung'anu.

Kyaasa kya Mavavaso a Nndumi

¹⁶¹ Vasongoru mmbo valeshivavisa kya ruu Lyo nrima wakwa ukatirwa ni usau na marero afo.

¹⁶² Mmbo nkefura na kyaasa kyafo Shava sha nndu atiri mifungwa miingi.

¹⁶³ Mmbo shisuuye wongo, Na irero lyafo shalyikunda.

¹⁶⁴ Mmbo nkeekurumisha ka mfungare wo nkonu Kimaruma kya usumanu lwafo.

¹⁶⁵ Yewo valangye irero lyafo mmbo vaitye ufoo nriminy Nta nkwiifo kiveengyee nsiindara-fo.

¹⁶⁶ Mmbo shambereya nnu ukiro lwafo, Woi Nndumi Iruva, shasora mavavaso afo.

¹⁶⁷ Nrima wakwa mmbo ulesora irero lwafo, Shalyikunda nnu.

¹⁶⁸ Mmbo shilesora ufundo lwafo na irero lyafo, Mashika mbony takwa toose mmbo kutiishi.

Kiterevo kya Itarama

¹⁶⁹ Kiiyo kyakwa kikufikye, woi Nndumi Iruva; Kushore shia na irero lyafo.

¹⁷⁰ Kiterewo kyakwa kikukooye; Kushikire kiinani na kyaasa kyafo.

¹⁷¹ Kana kyakwa kakurumishe, Mashika kwanshilosha irero lyafo.

¹⁷² Ulumi lwakwa lurumishe fyaasa fyafo, Mashika mavavaso afo ni usumanu.

¹⁷³ Orrwa woko lwafo kusheekye, Mashika shansauwa ufundo lwafo.

¹⁷⁴ Mmbo shilangye ukiro lwafo, woi Nndumi Iruva, Na irero lyafo llyo ifura lyakwa.

¹⁷⁵ Shiniinga ikaa na muu naambo shikurumishe, Irero lyafo lyishivikye ngarami.

¹⁷⁶ Mmbo shileraa-raa sha yoonri lyilatiri mwiisi; Ruuya nsero wafo mashika shilera irero lyafo-fo.