SABURI 118 - BIBILLYA Mareiyo Meele a Iruva

Kiterewo kya Yaana Uvingyi

¹ Haleluha. Aniny Nndumi Iruva kimmba akee nsha! Mashika ilyillya lyakwe llya llung'anu.

² Ulaalu Israeli vaambe: “Mashika isarya lyakwe llya llung'anu.”

³ Ufyari lwa Aron vaambe ulaalu: “Mashika isarya lyakwe llya llung'anu.”

⁴ Veenndya Nndumi Iruva vammbe ulaalu: “Mashika isarya lyakwe llya llung'anu.”

⁵ Kyeeri shekee ukiveny mmbo shilevaanga Nndumi Iruva, Nndumi Iruva kashirouwa kashivika andu atiri mwaanya.

⁶ Nndumi Iruva mmbo akee kyaalu kyakwe nta nshishereyaafo. A nndu wa vandu nki ashitannyaa?

⁷ Nndumi Iruva mmbo akee kyaalu kyakwa, kava mmbwe mweeki wakwa. Nkyo yewo vashikusuuye mmbo vavingwaa shilollye.

⁸ Nngoma irishya kwa Nndumi Iruva Ngota ivika vandu nsia.

⁹ Nngoma irishya Nndumi Iruva, Ngota ivika vaniini nsia.

¹⁰ Vandu va masanga woose mmbo valeshiringitya, Shavafwallya kwasha na irina lya Nndumi Iruva.

¹¹ Vakashiringitya yee vakashiringitya sho, Shavafwallya kwasha na irina lya Nndumi Iruva

¹² Mmbo valeshiringitya sha shuki; Nawo vakarumiika sha muro wa miingeny. Shavafwallya kwasha na irina lya Nndumi Iruva.

¹³ Mmbo kuleshisindika deny naambo shiwe Lyo Nndumi Iruva kashisiika.

¹⁴ Nndumi Iruva mmbwe finya yakwa na kiimbo kyakwa; Nawe mmbo ukiro lwakwa.

¹⁵ Ngyunyanga ta ifura na ta ukiro, Mmbo taitiwa kwa yewo va usumanu, Woko lwa Nndumi Iruva usha mmbo lwatana finiini!

¹⁶ Woko lwa usha mmbo lwarumishwa Woko lwa Nndumi Iruva usha mmbo lwatana finiini.

¹⁷ Nshishefwaafo mmbo nkaa na muu, Neeny mmbo nshevambisaa mashora a Nndumi Iruva.

¹⁸ Nndumi Iruva mmbo aleshikaba nnu, Lyo nalare shireke.

¹⁹ Shiruyeny myaango ya usumanu, Shaange nafo shaani Nndumi Iruva.

²⁰ Ngiri yei nnya Nndumi Iruva, Veanga nafo ni yew ova usumanu.

²¹ Mmbo nshekwaanaa kimba kwashirouwo, Kwaveva ukiro lwakwa!

²² Iwe elyo veetana mmba valelyilema Mmbo lyileva iwe isongoru lya nummba.

²³ Irero elyi mmbo lyooka kwa Nndumi Iruva, Nalyo lyikava kindo kyeyaawuta.

²⁴ Ekau nkonu Nndumi Iruva auende. Mmbo lukesaa neefura nato.

²⁵ Woi Nndumi Iruva lwakufuuya-dwa kulukire. Woi Nndumi Iruva luwone iviiri, lwakutereva.

²⁶ Ngoma ni yeto asha na irina lya Nndumi Iruva. Lwiikee mmba ya Nndumi Iruva mmbo lushevakundyaa mbora.

²⁷ Nndumi Iruva mmbwe Iruva, Nawe mmbwe alweengye sa. Ipoony maangashi mwikesaa mweende, mwiiriani kutani mwafika yoo kitareny kyeerasya.

²⁸ Iruva wakwa ni yewe nshekwaanaa! Iruva wakwa ni yewe, nshekurumishaa!

²⁹ Aniny Nndumi Iruva kimmba akee nsha! Mashika ilyillya lyakwe llya llung'anu.