SABURI 116 - BIBILLYA Mareiyo Meele a Iruva

Alekirwa ufu arumishe Iruva

¹ Haleluya, Mmbo shikundye Nndumi Iruva Kimmba aarannya, Mashika asharannya kiiyo kya fiterewo fyakwa.

² Mashika elyi asheevetya kuri kyakwe, Nkyo shimbaange mikonu yakwa myoose!

³ Fiwoye fya ufu mmbo fileshiringitya, Ngatara ta ufu tikashisheya; Shalollya ukiva na irovyo nriminy.

⁴ Shasenda irina lya Nndumi Iruva: “Woi Nndumi Iruva shakuvaanga na nrima kushikire muu wakwa!”

⁵ Nndumi Iruva mmbo araiye isarya na usumanu! Yee Iruva weeru mmwiilyillya!

⁶ Nndu mmbo ava mwiiringa yewo valalasye ntambo; Shanyiiswa kashikira.

⁷ Woi nrima wakwa, wuya ifureny lyafo, Kimmba Nndumi Iruva akutannya mesha.

⁸ Mashika mmbo kwanshaauwa muu wakwa ufuny, Miso akwa nalakitiri misoru, na marende nalakiidima.

⁹ Mmbo nshekaa na Nndumi Iruva Urukeny lwa yewo vakee na muu!

¹⁰ Mmbo shilekusiryau naambo shaambe, “Mmbo shellya nnu ukiva!”

¹¹ Shaangusya irera shaamba, “Vandu woose mmbo vakee valembi!”

¹² A nkyoki nsheningaa Nndumi Iruva Kya mesha akwe moose aleshitannya?

¹³ Mmbo nshewaryaa upata lwa ukiro lwakwa; Shivevambisa irina lya Nndumi Iruva.

¹⁴ Neeny mmbo nsheinutya fyaasa fyakwa kwa Nndumi Iruva Yee, vandu vakwe woose vakooye ilollya.

¹⁵ Ufu lwa vandu va Nndumi Iruva; Mmbo lutiri kimaruma kwakwe.

¹⁶ Woi Nndumi Iruva, ni dede yeny mbo shikee nsero wafo; Nsero wafo, shaveva mwana wa kishinga kyafo, Mmbo shekee mfinge kwasheshiboromwa!

¹⁷ Mmbo nshekuutya firaso fyeekwaana Neevambisa irina lya Nndumi Iruva.

¹⁸ Mmbo nshinutyaa fyaasa fyakwa kwa Nndumi Iruva Yee, vandu vakwe woose vakooye ilollya,

¹⁹ Efo mmba kwa Nndumi Iruva, Yee, kwafo yewe Yerusalemu.