SABURI 115 - BIBILLYA Mareiyo Meele a Iruva

Iruva umwi va dede

¹ Nshi yese-fo woi Nndumi Iruva, Yewe kurumishwaa, lularumishwe yese-fo, Ni irina lyafo yeni kushelyirumishaa, Kimaruma kya ilyillya lyafo, Kimaruma kya usaari lwafo.

² A nkyikyi elyi vandu va masanga vakeyaamba, “A Iruva waawo nkwi akai?”

³ Lyo Iruva weeru ni iruveeu akai, Na kyoose akunndye kikatanyika

⁴ Mafwanu awo mfesa na saabu, Mmashora a maako a vandu.

⁵ Mmbo atiri kana deny lyo nalareraa, Akatira miso nisha lyo nalalollyaa!

⁶ Akatira maarwi lyo nalashiitaa, Akatira mmbwa lyo nalafwaamyaa,

⁷ Akatira maako lyo nalatiraa kyiwo, na marende lyo nalasheendaa, Nta nalashuutaa unyanga!

⁸ Yewo veatana mmbo vayavakye, Wo umwi yeto aavikye nsia.

⁹ Yeni Israeli, vikeny Nndumi Iruva nsia! We mmbwwe ngarami na ngawo yaany.

¹⁰ Yeni mmba ya Aron vikeny Nndumi Iruva nsia! We ni ngarami na ngawo yaawo.

¹¹ Yeni veendya Nndumi Iruva kevembikeny nsia; We ni ngarami na ngawo yaawo.

¹² Nndumi Iruva mmbo allukumbwa, naluvikye mbora, Ashevikya ufyari lwa Israeli mbora, navikye mmba ya Aron mbora.

¹³ Yewo veemwinndya mmbo ashevavikyaa mbora, Woose vadu na vaniini.

¹⁴ Nndumi Iruva navafumbute, Yeni na vana vany

¹⁵ Yeni muvikyo mbora ni Nndumi Iruva, Nalo ulana kuluniinga vandu.

¹⁶ Ngyina ni ngyina ta Nndumi Iruva Indi uruka aningye vana va vandu.

¹⁷ Nshi vafu varumishaa Nndumi Iruva-fo, Nta nshi yewo vaeefwa sau-fo.

¹⁸ Ni yese lusherumishaa Nndumi Iruva, Pookya inu fika llung'anu!