SABURI 112 - BIBILLYA Mareiyo Meele a Iruva

Ifura lya nndu nsaari

¹ Haleluya! Ngoma yeto avallya na shia ta Nndumi Iruva. Kasennyo mmavavaso akwe.

² Vana vakwe mmbo vashetira finya ulaniny; Na ufyari lwa yewo vesha luvikyo mbora.

³ Usimba na masaa mfyo fikee efo kwakwe, Na usumanu lwakwe lukalung'ana.

⁴ Sa mmbo yoombuta ireema efo kwa nndu nsha. Mmbwe muni ulyilyi, isarya na usumanu.

⁵ Ngoma yeto ava mwiitana fya isarya na yaakuya vengyi findo, Kava mwiitana findo fyakwe na usumanu.

⁶ Mashika nnyashemandaa-fo, Nndu wa usumanu mmbo ashekumbuwaa llung'anu.

⁷ Nnyasheereyaa makasha-fo; Mashika nrima wakwe mmbo ukee nkaari irunndya Nndumi Iruva, Haleluya Nga'niseny Nndumi,

⁸ Nnyasheereyaa-fo mashika nrima wakwe mmbo uvagyi Kutani alollya veetuuro vakwe vallemwa.

⁹ Katira maako kawuutisa vakiva. Usumanu lwakwe llwa llung'anu. Na ushilyi lwakwe lusheng'aniswaa luwoni nnduma.

¹⁰ Yeto nalakee wa usumanu mmbo ashelollya ngatara. Mmbo ashekabaa kiiyo na yaangara; Nrolo wa yewo valatiri usumanu mmbo ushemandaa.