SABURI 111 - BIBILLYA Mareiyo Meele a Iruva

Uniini lwa Nndumi Iruva

¹ Haleluya! Mmbo nshaanaa Nndumi Iruva na nrima wakwa moose, Efo ikwaanuny lya yewova mirima myaa neefo shileny teru.

² Mashora a Nndumi Iruva mmbo akee maniini! Kwa yewo woose valanngye yaamanya.

³ Kyoose atana mmbo kitiri nnduma na usuri. Na usumanu lwakwe lukakaa llung'anu.

⁴ Kavevikau kyeekumbura mashora akwe a wende? Nndumi Iruva mmbo akee mwiilyillya kaveva mwiisarya!

⁵ Yewo veemwiindya mmbo avasimba kyeelya; Kavekummbwa kyaasa kyakwe llung'anu.

⁶ Mashora akwe akoora vandu vakwe wiidimi lwakwe Kavaniinga Dingu efo vanduny va masanga.

⁷ Mashora a maako akwe mmbo oora usumanu na dede, Na mavavaso akwe akavikwa nsia,

⁸ Mashika akee mavangise llung'anu, Kimmba alerundwa kikee kya usumanu na dede.

⁹ Mmbo alerikya vandu vakwe ukiro. Kyaasa kyakwe kakivika kive kya llung'anu. Nkyo irina lyakwe mmbo lyikee yeele lya yeerewa deny!

¹⁰ Yiindya Nndumi Iruva nng'u urango lummye. Veetana indo mmbo vatiri urango usha. Nnduma wakwe mmbwa llung'anu!