SABURI 109 - BIBILLYA Mareiyo Meele a Iruva

Kimaruma kya nndu atiri ngatara

¹ Woi Iruva shikee ikwaarafuma kulamalallye-fo,

² Mashika vandu varavi mmba shitarambuya kana Kana kya nndu akee nsumanu, kya ntambo. Mmbo varera neeny na ulumi lwa wongo.

³ Ee-da, mmbo vakee irera meesi uwe yakwa, Na ishisisya kulaifo kimaruma.

⁴ Yeny mmbo shilevakunda, wo vakashikumba Llyo yeny shilevaterevya.

⁵ Mmbo vashitaa makasha ando a mesha, Na isswa ando a ikunda.

⁶ Nniinge mwirummbwa mwaandu akee nnyaasi. Na mwinkumba wakwe nanrwee kwa mwirummbwa mwaandu.

⁷ Erumbuywaa mwaandu nkooywa atiri ukasha, Na itereva lyakwe lyekenwa ni ukasha lyingyi-da.

⁸ Suku takwe tive shaangu; Nndu ungyi neepo mashora akwe.

⁹ Vana vakwe varewa ngwera, Na nka wakwe ave nka wa ding'u.

¹⁰ Vana vakwe varwe-rwe veterevaa shoonga; Shoonga yaawo iwonike kwaasha na kyeny kwawo.

¹¹ Mwimmbesa siye, nansoke masaa akwe moose, Na veny veepoo umasi lwakwe.

¹² Kulawonika nndu allyilya-fo; Ao ivavara lyakwe yewo vakee vare ngwera-fo.

¹³ Ngyeeri yakwe irumatwa. Irina lyakwe lyivekyeko irikeny lya kavii

¹⁴ Ukasha lwa vandeye lukumbuwa usanguny lwa Nndumi Iruva; Na ulyamari lwa maye lulasangywa-fo.

¹⁵ Five usanguny lwa Nndumi Iruva llung'anu, ikumbuwa lyawo lyireke kunu ulaniny

¹⁶ Mashika nnalekummbwa ilyillya-fo; indi mmbo aleumbuta mfwafwa na mwiting'wa Kumande kava nndu afiyye nrima.

¹⁷ Alekunda idenga vandu; Nakyo kimmbuiye we muni. Nnyalekunda ivakya mbora-fo; Ekyo kyikakaa kwaasha nawe.

¹⁸ Mmbo aleraa kidengo kyikava sha soori yakwe, Kidengo kyikamwaanga ngoony, Kyikamporisa sha mura, Na lyingyi kyikamwaanga mafueny sha muungo.

¹⁹ Kyimmbiiye indo kwakwe sha soori eto araa; Lyingi kyinringitye sha uruumu llung'anu.

²⁰ Llo weesi lwa vakyiduva vakwa uka kwa Nndumi Iruva Na kwa yewo vakee ishifingya makasha muuny wakwa.

²¹ Na Yewe Iruva, Nndumi Iruva kushitanyi kyiinani, Mashika ilyillya lyafo ni isha, kushikyire,

²² Mashika yeny ni mfwafwa na mwaanguye, Shavaviswa kumande efo nnang'ani a ngoo yakwa.

²³ Nshikeira sha kirishe kyikeeirumika; Mmbo shikee ivivitwa sha nre.

²⁴ Ndi takwa mmbo tammba shinana kimaruma kya itereva na ikootoya, Shasaa-u mafwa meni.

²⁵ Mmbo shammba kindo kya iteendwa mmbo; Vakanshilollya mmbo vasisika mirwe yaawo.

²⁶ Woi Nndumi Iruva, Iruva wakwa sheekya! Kushikyire kyiinani na ilyillya lyafo.

²⁷ Nawo vakumanyi sheelyi mmbo kukee woko lwakwa, Nndumi Iruva, Nyewe kuletana efyo.

²⁸ Wo vadenge, indi Yewe kushivikye mbora, Yewo vakeshisisa vakasutwa! Indi yeny nndundi wafo shifuraa!

²⁹ Vakyiduva vakwa vaaluwa kyinyala; Varee usutu lwawo sha soori ya ikusikya.

³⁰ Nndumi Iruva, mmbo shikwaana na kana kyakwa, Ee-da mmbo shikwaarafumaa nnang'ani a ikwaanu.

³¹ Mashika we mmbo akapannya nkyiva, Kankira kyeeri arumbuyo mwaandu.