SABURI 108 - BIBILLYA Mareiyo Meele a Iruva

Kiterevo kya ngarami kimaruma kya vakiduva

¹ Ee Iruva, shikee nkaari nriminy wakwa mmbo nshiimba; Shiimbe fiimbo ee-da, kwa nng'anu wakwa!

² Kwiipony, yeni kivale na sese! Shidimi yaanta makya.

³ Ee Nndumi Iruva shikwarafuma nnang'ani a vandu. Shikwiimbya fiimbo nnang'ani a vandu va masanga.

⁴ Mashika ilyillya lyafo ni iniini kumande iruveu. Na usaari lwafo lukafika mafishiny.

⁵ Ee Iruva, kunganiswa iruveu. Na kunu urukeny koose kwiishwe weele lwafo.

⁶ Naambo vakunde vafo vakkye, Kukyire kwa woko lwafo usha, kushiirikye.

⁷ Iruva arera eke ando eele kwakwe “Na yeny shisharafuma, Shishaava Shekemu, Na uruka lwa Sukothi sheese fyenga fyenga.

⁸ Uruka lwa Giliadi ni lwakwa, Naakwa Mmanase-da. Na Efraimu ni kofia yakwa ya minya, Yuda ni nsengye wakwa wa kyimangyi.

⁹ Moabu ni ikarai lyakwa lyekusangya, Shisherya Edomu kyaaru kyakwa.” Na Filisti nshenkapya kyorongye kya fira.

¹⁰ A mmbi ashirroo muriny atiri turuve? A mmbi ashitetera shifike Edomu?

¹¹ A le Iruva, mmbo kwallura-deny? Nkukyeeda-se fireny na matorito eru

¹² Luniinge weekyi lwa ikapana na vakyiduva veru, Mashika weekyi lwa nndu wa vandu llumaa kindo-fo.

¹³ Iruva kankaa kyaalu kyeru mmbo luvingaa, We mmbwe avavaraa vakyiduva veru.