SABURI 107 - BIBILLYA Mareiyo Meele a Iruva

Irumisha kimaruma kya usha lwa Iruva

¹ Aniny Nndumi Iruva kimaruma we ni mfoo! Mashika ilyillya lyakwe ni lya llung'anu.

² Yewo vakeevakyire ni Nndumi Iruva, vaambe indo! Valya alevakira wooka wookon lwa vetuurwa.

³ Kavaugiria wooka ngyuruka toose, Uka taari ya ngama ya nkwaany, taari ya ndoo na ya sinde.

⁴ Maata valera-raa kulya nng'alo shia ya kasa koomu, Mmbalewonisa muri wa ikaafo.

⁵ Vakatirwa nshaa na nyura, Vakafwa nrima deny.

⁶ Vafuuya Nndumi Iruva! Efo ukyiveny lwawo, Kavashiisa makyiva awo.

⁷ Kavatetera veshiira shia shoorotu Vakooye yeenda vawonise muri wa ikaa.

⁸ Vaani Nndumi Iruva kya ilyillya lyakwe Na ngyende takwe kwa vana va vandu.

⁹ Mashika we mmbo anirisaa vatirwa nyura Na yewo vatirwa nshaa kavavuutisa mesha akwe.

¹⁰ Maata valya valekaa ireeminy na kyirisheny kya ufu, Mmbo vakee vainive ni ukyiva na mise ya minya.

¹¹ Mashika valelema marero a Iruva, Vakateenda ivavaso lya We Akee Uwe.

¹² Vakaruvyo ni mashorra moomu; Vakawa si, kulakaa-fo wa ivaekya.

¹³ Llyony vekee ukyiveny lwawo vakafuuya Nndumi Iruva, Kavatirisha ukiva wawo.

¹⁴ Kavanta efo ireeminy na kirisheny kya ufu; Kafisha-fisha efyo fyevafingye.

¹⁵ Vaani Nndumi Iruva kya ilyillya lyakwe Na ngyende takwe kwa vana va vandu.

¹⁶ Mashika mmbo alefisha-fisha myaango ya arera; Na imamanya rungo ta minya.

¹⁷ Maata vakafulukywa kimaruma kya illyamara lyawo; Na kwa kimaruma kya ikuvavisa na uravi lwawo.

¹⁸ Mirima yaawo ikasswa shoonga ta wo ngata, Vakafika afii na ifwa.

¹⁹ Vakafuuya “Nndumi Iruva efo ukyiveny lwawo.” Kavashiisa makyiva awo.

²⁰ Mmbo arumaa irero lyakwe, lyikavashiisa Kavauta efo urumatony lwawo.

²¹ Vaani Nndumi Iruva kya ilyillya lyakwe Na ngyende takwe kwa vana va vandu.

²² Vautye Iruva faanu fya ikora na muro, Na yaamba mashora akwe kwa iimba.

²³ Maata valeira yeeveny na ngalava, Vakarunda mashora awo efo mureny eto mwiingyi.

²⁴ Efo valelollya mashora a Nndumi Iruva, Na ngyende efo ngyurony ta yeeve.

²⁵ Mashika mmbo arera, keende uraato uniini nnu, Lukaipoo matundulu a yeeve uwe.

²⁶ Mmbo valeerwa uwe nginii-u, numa sumbai efo ngyurony Finya tawo tikavasya efo ngapweny yeyo.

²⁷ Vesinga-singaa na iwa sha vanangwa Vakasiiyo ni urango lwawo loose.

²⁸ Vakafuuya Nndumi Iruva! Efo ukyiveny lwawo, Kavashiisa makyiva awo.

²⁹ Mmbo alekyeemya uraato yeeveny kukava kyimamya Matundulu a vayo akamalallya.

³⁰ Nawo vakafura mashika yeeve ilemalallya Nawe kaveende mbai ya yeeve alya ando velanngye!

³¹ Vaani Nndumi Iruva kya ilyillya lyakwe Na ngyende takwe kwa vana va vandu.

³² Vanng'anise efo ikwaanuny lya vandu Na imwaarafma efo mabaraseny awo.

³³ Mmbo aleallwa mira ikava nng'alo, Na ngyusoka ta mura tikaumya.

³⁴ Uruka lwa uteri unuru kaalwa kipoo kya mmbala, Kimaruma kya makasha a vandu ewo veifo.

³⁵ Kaalwa nng'alo kukava irrwa lya mura, Na uruka uumu akava ngyusoka ta mura.

³⁶ Kasamisya-fo yewo vetirwa nshaa Vakatana muri wekaa-fo.

³⁷ Vakarema nemaa na ivakya-fo misabibu, Vakailula fimu fiingyi.

³⁸ Kavikya vandu vakwe mbora vakafyarika! Keengera yekena lya findo fyawo fya ivikya.

³⁹ Numa maata vakaangwa na iva vafwafwa Kwa isisywa, ilyillyiswa na unaari

⁴⁰ Keela vaniini yewo vekeeivasisya, Kavarunguta nng'alo kundo kuleefo shia.

⁴¹ Indi kakyira vanana ukyiva lwawo Kafwarisha mmba tawo sha ironda lya moonri.

⁴² Woorotu miriminy mmbalollya vafure Na uravi lwa wo ngata mmbo luraya kana kyawo.

⁴³ Yeto atiri urango nalole findo efyo, Vaumburani ilyillya lya Nndumi Iruva.