SABURI 105 - BIBILLYA Mareiyo Meele a Iruva

Iruva na vandu vakwe

¹ Aniny Nndumi Iruva, vambiseny irina lyakwe. Ongeyeny vandu mashora akwe.

² Imbeny, imbieny Nndumi Iruva fiimbo. Kusareny ngyende takwe toose.

³ Kurumisheny kimaruma kya irina lyakwe; Yewo weindya Nndumi Iruva ngoo tawo tifure!

⁴ Kundyeny iruuya weekyi kwa Nndumi Iruva atiri finya, Nruuyeny mikonu myoose.

⁵ Kummbweny ngyende takwe aletitana, Ngende takwe na mirumbuye myaandu yakwe.

⁶ Yeni ngyeeri ya Abrahamu, nndundi wakwe, Yeni vana va Yakobo vasauwe vakwe.

⁷ Nndumi Iruva, We mmbwe Iruva weeru. Ulaniny koose kwiifo mirumbuye yakwe.

⁸ Akumbuye mma yakwe llung'anu Irero llya alevavasya marika kyiku.

⁹ Mma alevika na Abrahamu Na mboo alelyiya Isaki.

¹⁰ Akeyoora Yakobo kyaasa kyakwe paa na Israeli kansukuya mma yakwe llung'anu.

¹¹ Aleamba, “Shimuniinga uruka lwa Kanaani Nayo ive ding'u yaany muveni.”

¹² Kyeeri vekee vaangu vevaa yekena, Ee-da vandu vaangu na veny urukeny lwa Kanaani.

¹³ Valera-raa uka isanga kufike isanga lyingyi, Kuuka umangyi lumwi kufike kwa vandu vengyi.

¹⁴ Indi Iruva nnyalelotora nndu avafote-fo, Lyingyi alekyeemya vamangyi kwa kimaruma kyawo.

¹⁵ Evavia, “Mulapaani mesiya wakwa-fo, Nta kulavavise nkisuku wakwa-fo.”

¹⁶ Iruva keende shaa urukeny, Kalamara shoonga shoose vevikye nsia.

¹⁷ Indi kadeesya nndu umwi kaira mbee Yosefu ulya alekumbwa ushingeny.

¹⁸ Ulya valemfinga marende na nse, Na singony vakanfinga na nnyororo.

¹⁹ Fyeeri fikainana kya kilya aleawuya kisuku, Irero lya Nndumi Iruva lyikainukya sheelyi alerera usumanu.

²⁰ Mangyi wa Misri kaamba naporomuwe; Nshilyi wa vandu kamporommwa.

²¹ Kamwallwa nave mwisalallya mmba yakwe; Na iva uwe ya masaa akwe moose.

²² Nashilye vashilyi shaasa kyinsenyi Na ilosha vamiku vakwe waarya.

²³ Llony Israeli kaenda urukeny lwa Misri; Yakobo kava mwuny urukeny lwa Hamu.

²⁴ Iruva kavikya vandu vakwe mbora vakafyarika kyuumu Kavaekya vakava na finya ngota vakyiduva vawo.

²⁵ Kaallwa vandu va Misri vasue vandu vakwe, Vakatannya varundi vakwe kyiila.

²⁶ Karuma Mose, nndundi wakwe, Amwi na isauwa Aron.

²⁷ Vakatana ngyende nnang'ani a Vamisri, Na nngyende-da efo urukeny elo lwa Hamu

²⁸ Iruva keede ireema urukeny, Indi Vamisri vakalema iindya mavavaso akwe.

²⁹ Kaalwa mira ya kwawo ikava samu, Kawaa makunga moose.

³⁰ Filwa fikasha fikafumbuka urukeny lwawo, Fikaishwa naakwa ni efo mmba ya mangyi.

³¹ Iruva karera, kukasha maronda a makuru avaangwaa nri, Na engyi avaangwaa sava tikaishwa uruka pafu.

³² Ando a ivaniinga mmbwa yei ya mikonu myoose kavaniinga mmbwa ya masaawe, Na muro nniini urukeny lwawo.

³³ Kalyamara misabibu na miri yaawo ya mafura Lyingyi kafisha-fisha miri ya urukeny lwawo.

³⁴ Iruva karera, kukasha nrye, Na mafiku a mashanga nalavayekena.

³⁵ Myooro myoose ikalyiwa mfyo, Na fimu efo nreminy na kiwo.

³⁶ Kawaa vana vavee woose urukeny lwawo, Ee, uvee lwa Vamisri.

³⁷ Veerye fesa na saabu, Nta umwi waawo alewonisa nsindara-fo.

³⁸ Vamisri vakafura elyi vandu ewo valeuka kwawo, Mashika mmbo vetirwa mmberei kimaruma kyawo

³⁹ Iruva kaala ifishi uwe ya vandu vakwe Na muro wa imikya elyi kio.

⁴⁰ Vakantereva, nawe kaveengye ngwale; Kavaniinga mikate miingyi yuuka iruveu.

⁴¹ Kakapa iwe, kavawonisya mura ushekaa Yakasoka na kasa ng'alo sha mura.

⁴² Mmbo alekummbwa kyaasa kyakwe kyeele Kilya aleteerya Abrahamu nndundi wakwe.

⁴³ Naasa, kautany vandu vakwe kulya Misri, Vasauwe vakwe veshiimbaa na ifura.

⁴⁴ Kavaniinga uruka lwa vandu va masanga, Kavarambikya marema a vandu va uruka elo.

⁴⁵ Naambo vandu vakwe vendye mavavaso akwe, Na ilatya nsia wakwe. Haleluya.