SABURI 10 - BIBILLYA Mareiyo Meele a Iruva

Kiterewo kya ilyillywa

¹ Woi Nndumi Iruva nkyiki elyi kwasalala kwaasha? A nkyiki elyi kwakusuruma kyeeri ekyi kya ukiva?

² Yewo vakee mbafu vakalamya yewo vanana; Ni kisha mireiyo yaawo ivatire wo veni.

³ Nndu nravi kakushombya filya ngoo yakwe ilanngye, na nndu nnyoku kya lango kadenga na ilema Nndumi Iruva.

⁴ Nndu nravi kenyala Nndumi yoo usanguny, kaamba we nnasarye-fo; Na makusaro akwe moose kaamba, Nkwiifo Iruva-fo.

⁵ Shia takwe kyeeri kyoose tikaoroka kamina mirumbuye yafo, vakiduva vakwe woose kavasela.

⁶ Nriminy wakwe kaamba, Nshishutwaa-u-fo, marika na marika, Nshiwona ukiva-fo.

⁷ Marero akwe akaishwa kidengo, ntambo na uravi, marero a ulumi lakwe akavavisa.

⁸ Kava mwaala shia na ikunda iwaa; nndu nalatiri nta mbese; Miso akwe akalaaya nndu mfwafwa.

⁹ Kanlaaya ando kwa kirika, sha miiso mbangeny, kalaaya nndu yeto nnana nantire, Yee natire nndu nnana, Namfuruye neefo nreiyony wakwe.

¹⁰ Nndu mfwafwa mmbo asheringitywa na ituulwa si, na vandu vafwafwa vakatuulwa ni finya takwe.

¹¹ Nriminy wakwe kakusara mmbo Iruva anrekywa, Kasikya kisangu kyakwe nalaidima ilollya.

¹² Kwiipoo woi Nndumi Iruva, woi Iruva ipoo woko lwafo, kularekyo yewo vanana;

¹³ Ankyiki nndu nravi nainyale Iruva nriminy wake eshambaa nnyasarye-fo?

¹⁴ Yewe mmbo kulollye mavavio na ngapo kuvatarami na woko lwafo. Nndu nnana kakweera ngundeny tafo, mashika ni mwikira ngwera.

¹⁵ Fisha woko lwa yewo vakee varavi na valyamari, nta ukasha lwawo lulalollywa lyingyi.

¹⁶ Nndumi Iruva mmbwe mangyi llung'anu na llung'anu; Masanga asherumakaa urukeny.

¹⁷ Woi Nndumi Iruva arannya kiiyo kya vanana, kuvaarannyi na ivaviirya muu.

¹⁸ Ngwera na ewo vafote kuvarumbuye kyawo na nndu yeu aukye ndaleny, nalasheiwonnywa lyingyi.