RUTI 4 - BIBILLYA Mareiyo Meele a Iruva

Boasi Arwaa Ruti

¹ Naasa Boasi keenda alya ngiriny ya muri ulya, kakaau rembo; Elyi aiyo kalollya nndu ulya akwaani na Ruti mmwasi mbwe ulya alemwaamba, keera alya. Naasa kambaanga, Nkye osho na yaate, kaa rembo yaa. Nawe keendau kakaa rembo.

² Naasa Boasi kavaangau vamiku ikumi va efo muriny, kavavia, Neeni-da keeny rembo yaa-te. Vakakaau.

³ Naasa Boasi kavia nndu ulya akwaani na Ruti, “Naimi ulya alewuya ooka urukeny lwa Moabu mmbo akeekumba irema lya Elimeleki ulya alellala;”

⁴ nneny shakunda ikuvia naambo kulyuure yewe mbee ya vakureeki yeva na mbee ya vandu vakwa. Kwakooya kulyiwouwaa nkisha, lyo kwankooya kulalyiwouwaa, kushivie shikooye imanya kimmba kulaiyo ungi asumani ilyiwouwa kuuta yewe wa mbee, na numa ni yeny. Nawe kammbia, shilyiwouwaa.

⁵ Naasa Boasi keengera imbia, Lyo nkonu yeto kuwaryaa irema elyo maakony a Naimi, mmbo kushuuraa na Ruti-da, Mmoabu yeto mmi alefwa, naambo ufyari lwa yeto alefwa lusalale.

⁶ Naasa nndu yeto akwaani na Ruti kaamba, Yeny shimuni nshishiidimaa ilyiwouwa-fo, kulakooye nsheretaa ding'u yakwa shimuni, kweekyo usumanu yelo lwakwa lwa iwouwa irema elyo ipoo yewe, kimmba yeny shilashiidimaa ilyiwouwa.

⁷ Naasa elyo kasha niindo kyeekai kulya Israeli, kya iwouwa kindo ao yaalashana, ivikya kindo ukureeki, mmbo kweeshuutaa-fo kyaaru kwakiniingya ungi, niindo valevikya-n ukureeki.

⁸ Naasa nndu ulya kavia Boasi, Ura irema elyo yewe. Koota-fo kyaaru kyakwe, kaniingya Boasi.

⁹ Naasa Boasi kavia vamiku valya, na vandu woose valya veeiyo, Inu yeni mmbo mwava vakureeki sheelyi mmbo shikeyuura masaa moose alya a Elimeleki na fyoose fya Kilioni na fya Maloni fyuuka kwa Naimi.

¹⁰ Na Ruti yeu Mmoabu ekee nka wa Maloni mmbo shamuura nave nka wakwa, naambo shiwonisye yeto alefwa irina efo ufyarin lwakwe, naambo irina lyakwe lyilawoni ireka kulu efo kwa vana va maye, neeni inu mmbo mwava vakureeki kya ekyo.

¹¹ Naasa vandu woose valya veeiyo na vamiku valya, vakairikya yee, niindo, lwammba vakureeki. Nndumi Iruva navikye nka yeu akeeyaanga kwafo mbora, navake Raheli na Lea wo vaka valya vavii vakee maye wa Israeli. Kuvikyo mbora ya Efrata kuveva nsuri kunu Betlehemu.

¹² Mmba yafo ivake mmba ya Peresi ulya Tamari alemwiirya Yuda, vave mbo yewo Nndumi Iruva ashekuniinga wooka kwa nka yeu.

Boasi na va mmba yakwe

¹³ Naasa Boasi kawarya Ruti kava nka wakwe, na Nndumi Iruva kallyilya kaira mwana wa kyuumi.

¹⁴ Naasa vaka va muriny ulya vakavia Naimi, “Nndumi Iruva naitikiswa, yeto nalakuraa ngwera, na irina lyakwe lying'aniswa kunu Israeli.”

¹⁵ Nawe ashekuviiryaa finya neekulela yoo ukuuny lwafo, shamashika mwalyi yeu wafo akukundye indo mmbo ashevaa ifura lyafo ngota vana mfungare.

¹⁶ Naimi kawarya nkoku ulya kanshukura, nawe kava mwiinllela.

¹⁷ Na vaka va nnyanu vakafishya Naimi irina, veeshaambaa, Naimi ammiiryo nkoku-mwana wa kyuumi, vakamfishya irina lyakwe ni Obedi, mmbwe aleva ndeye wa Yose yeto akee ndeye wa mangyi Davidi.

¹⁸ Yelu llo ufyari lwa Peresi, Peresi kaira Hesiron;

¹⁹ Hesiron kaira Ramu, na Ramu kaira Aminadabu;

²⁰ Aminadabu nawe kaira Nashoni, na Nashoni kaira Salmon;

²¹ Salmon nawe kaira Boasi, na Boasi kaira Obedi;

²² Obedi nawe kaira Yose, nawe Yose kaira mangyi Davidi.