RUTI 3 - BIBILLYA Mareiyo Meele a Iruva

Ruti Awonisa Mmi

¹ Naasa Naimi kavia mwalyi, A mwanakwa kyevaa kisha shikuruyye ando kusheonisaa ifura?

² A Boasi yeu elyi akee nndu wa ufyari lweru, ulya ekeesalallya vana vakwe, nawe inu mmbo akeevivita nganu kulya kari kwakwe.

³ Kyasia yewe kusangye kwakwaamba mafura, kuree soori shisha nnu, kweendeny efo kari kwakwe, lyo kulakoore kwakwe-fo, kufike elyi ammaa ilya na ina.

⁴ Neelyi alalaa kulole yoo akeelala, kwaangeny kusukwe yoo marendeny akwe kulaleny llyoony we ashekuviaa kyeetana.

⁵ Nawe Ruti kammbia, mmbo ntanaa fyoose shaasa kwashivia.

⁶ Naasa Ruti keenda-fo, katana fyoose shaasa mammi ulya wakwe alembia.

⁷ Naasa llya Boasi alemaa ilya neena na ikyesa nriminy keenda nayoo fimu fya nganu fimandi, kalalau, na Ruti kasha nang'u waarya, kansukwa marende kalalau.

⁸ Elyi kwafika kio nnangani Boasi kaokya rony, na yaaukwa elyi akooya nka alele yoo akai.

⁹ Kaamba, Wora! Kwava vi? Kammbia, Ni yeny Ruti shikee kishinga kyafo, nkyeshisikya-dwa, mashika yewe kukwaani neeny,

¹⁰ Boasi kammbia, Mwanakwa, Nndumi Iruva nakuvikye mbora, mashika elyi koora usha lwafo ulaalu ngota llya mbee, mashika nkwalanga ilatya vasoro vakoo, masimba ao vakiva-fo.

¹¹ Kyasiany mwanakwa, kulairyeefo, mmbo nkutannyaa shaasa kukundye, kimmba vandu woose va kunu muriny yeu vaishi sheelyi yewe mmbo kukee nka nsaari.

¹² Nakyo nkindo kya dede yeny shikwaani neewe, lyo kwiifo ungi akwaani neewe mmwasi ngota yeny.

¹³ Mmbo kuveraa kio eki, fika ngama, kwakooya nndu yeto akunda ikutannya ekyo kisumanyi nndu akwaani neewe, nakutannye, lyo anra nalatana indo, naasa llyo yeny nshekutannyaa ekyo Nndumi Iruva akundye. Kyasia lalany fika ngama.

¹⁴ Naasa Ruti kalala yoo marenden akwe kukakya, kakwiipoo ngama nraasi na ivishivishi, mashika Boasi eekundye kimanyike kweifo nndu wa kyika eleleu-fo, kamweesya nganu, kanrika nrony, naasa Ruti kawuya na kulya muriny.

¹⁵ Nawe kambya, “Ende nkorori yeto kuree kwautarammbwa.” Naasa kautarammbwa, nawe keesya-u karindaru, fyeeso fya nganu, kanrika; naasany kawuya muriny.

¹⁶ Naasa eekiwuya mammi wakwe kambesa, A mwanakwa mmbo kileva inda? Kamwoongoya fyoose shaasa Boasi alembia.

¹⁷ Ruti kammbia, Na nganu yei mmbo aleshiniinga naambo shilawuye kwafo na maako aruu.

¹⁸ Naasa mammi wakwe kammbia, Naasa mwanakwa, kusye-do, kutani kwalollya ekyo atana kyafo, mashika lyo nnyafuraa kulore inu eenutya kindo eki-fo.