RUTI 2 - BIBILLYA Mareiyo Meele a Iruva

Ruti Arunda Nreminy kwa Boasi

¹ Naasa kyikava Naimi eetiri nndu wa ufyari lwakwe avangwaa Boasi, nawe kava nndu nsuri akee isimba nawe ni wa ufyari lwa Elimeleki.

² Naasa Ruti kavia Naimi, Shira sheende efo maremen, shinderorwa fyaa fya nganu efyo firekyaa numa efo nremeny ya nndu eto ashilyilyaa. Kammbia, Kyasia mwanakwa, endaany.

³ Naasa keenda, kanderorwa fyaa filya fikeerekya efo mbuven nayo ikava pule yakwe llya aleshefikya irema lya nndu evaangwaa Boasi akee wa ufyari lwa Elimeleki.

⁴ Llya yeni Boasi nawe kaveesha nang'u ooka Betlehemu, amaa yiidikira veevyaa nganu eevaviaa, Nndumi Iruva nakae neeni, nawo vakarouwa, Yee neewe Nndumi Iruva nakuvikye mbora.

⁵ Llyo Boasi alevesa mwiisalallya ulya wa veevyaa nganu, llya alelollya Ruti, “A yeu mmwana wa vi?”

⁶ Naasa mwisalallya ulya kammbia, Yeu ni mwana ulya wa kulya Moabu alewuya na Naimi wooka Moabu,

⁷ nawe mmbo aletereva narorwe efyo fikeerekya efo mbuven numa ya veevyaa, naasa kashafo uka ngama fika ulaalu, kuuta elyi aimuya kyaangu yoo kyeny.

⁸ Naasa Boasi kavia Ruti, “Mwanakwa nsha aranya, kulande irworwo ireminy lyingi-fo, nta kulooke yaandi-fo, kukae yaa na vana yeva vakwa,

⁹ Enda kwiilolaa efo vammaa yuulula, kuvasore numa mashika mmbo shammeevavasya vandu vakwa valasheekupaana. Neewe kwakooya kwaakuka, enda kundena mura alya fiiyeny.”

¹⁰ Llyon Ruti kamfiirya ndi, kammbia, “A niinda kyakusenya ishilyillya yeny shikee muny?”

¹¹ Na Boasi kaambia, “Shilemaa ivio fyoose shaasa kuletannya mammi wafo mesha uka kumfiiyo ni mmi wafo, na shaasa kulera ndoo na mau na uruka lwafo kwashesheya vandu kulavaishi nta.

¹² Nndumi Iruva nakulyilye efo ishoreny lyafo, nakoore isarya lyakwe, we Iruva wa Israeli yeto kulerishya si ya maaru akwe.”

¹³ Llyo Ruti alembia, “Woi Nndumi Iruva wakwa kwansheekya kiniini deny, kwashiviirya muu, yeny shilakee nta umwi wa fishinga fyafo.”

¹⁴ Kyeeri kyeelya shoonga Boasi kavia Ruti, “Osho kukulyiiye shoonga yeeru, kuinirise kulye.” Naasa Ruti kashekaa rembo ando amwi na veevyaa nganu valya, vakansemberya piisi kalya kawuura neeseera kaseera.

¹⁵ Naasa eekikupoo naambo nanderorwa nganu, llyo Boasi alevia vana vakwe, kunreeyeny narorwe naakwa nnyefo milaa isaleesyo, mulankangaye-fo.

¹⁶ Muveenda mwiireya-reyaa, mulamuumbutefo.

¹⁷ Naasa Ruti karorwa fyaa efo mbuveny kukafika nkwaany, numa kakapa nganu yeto tikooka kikapu kimwi kidu.

¹⁸ Kakurika keenda na kulya muriny nandeora mammi wakwe nganu yeto alerorwa, kamweengye na shoonga tilya aleseera llya alewuura.

¹⁹ Naasa mammi wakwe kambesa, A inu nkwavi kwanderorwa? Ni ireminy lya vi kwanderunda? Yeto akumanya inu Iruva nambikye mbora, llyo kavia mammi kwa nndu yeto arunda kwakwe, kammbia, Yeto sharunda kwakwe inu ni Boasi.

²⁰ Naasa Naimi kavia mwalyi, “Nndumi Iruva nambikye mbora mashika mmbo alyilya yewo vakee na muu kiwo neewo vafu.” Naasa Naimi kavia Ruti, Boasi yeto ni nndu wa ufyari lweru, kaveva wa kufii deny neese.

²¹ Naasa Ruti kammbia, Yee-te nkyo kimaruma aleshivia kaa yaa kweni vana vakwa vakai kutani vamaa yiilula fimu fyakwa fyoose.

²² Naasa Naimi kavia Ruti Mwanakwa nkisha kusore vana va nndu yeto veevyaa nganu nta kulalollyo ireminy lyingi-fo.

²³ Nkyo Ruti kandesora vana va Boasi kanderorwa nganu kukafika yoo masiiyony a yiilula nganu, eekee efo kwa mammi wakwe.