RUTI 1 - BIBILLYA Mareiyo Meele a Iruva

Elimeleki na Vammba Yakwe Vasamya Moabu

¹ Naasa kyeeri kilya kya Veesalallya Israeli mmbo kweefo shaa niini urukeny. Nafo mmbo kweefo nndu umwi wa kulya muriny wa Betlehemu ya Uyuda, kaukafo keenda kulya urukeny lwa Moabu, we na nka vakwe na vana vakwe va kyuumi vavii.

² Nndu yeu mmbo evaangwaa Elimeleki na nkaakwe ni Naimi, na vana yewo vakwe ni Maloni na Kilioni, mmbo vekee va kyuungo kya Efrata kya Betlehemu.

³ Naasa Elimeleki kafwa, na nkaakwe Naimi kasaa na vana yewo vakwe vavii.

⁴ Vana yewo vakwe vakaora vaka va Moabu, yeto umwi evaangwaa Orpa neeto ungyi ni Ruti. Vakakaa kulya urukeny lulya lwa Moabu ando a myaaka ikumi.

⁵ Naasa Maloni na Kilion vakavefwa, nkyo Naimi kafiiywa ni mmi na vana veevavii.

Naimi na Ruti Vawuya Betilehemu

⁶ Naasa Naimi kakwiipoo we na valyi yewo vakwe wooke efo Moabu veende kulya Uyuda.

⁷ Naasa kakwiipoo-fo we na valyi valya vakwe, veende kutani vandefikaa kulya Uyuda.

⁸ Elyi varye shia veefo vesheendaa Naimi kavia valyi yewo vakwe, “Kewuyeny kyen'y kwany-te, na Nndumi Iruva ashemutannyaa mesha, shaasa muletanya womi yewo vany valefwa na shaasa muleshitannya yeny.

⁹ Na Nndumi Iruva namuniinge ifura wo umwi waany kyeny kwan elyi mushealyikwaase.” Naasa Naimi kavamiminda kyeevasama naambo vakweengyeeny, kyeendi wo vakafua neeiya nnu,

¹⁰ vakammbia, “Nkivaa-fo-te, mmbo lusheendaa neewe kwa vandu vafo,”

¹¹ lyo Naomi kavavia, Vana vakwa, shamuvia kweengyeny-te, a-mmbo kivaa inda kwakooya mweenda neeny? A ndesa mmbo shishiidimaa yiira vana vengi vamwaalyike yeni.

¹² Vana vakwaro, kuwuiyeny kyeny kwany-te, kimmba na yeny shammikwa shilakiwonisaa mmi. Kukooye kyevaa ivika nsia vai iwonisa mmi naakwa ni inu shiwone vana vengi veemwaalyika yeni,

¹³ a ndesa mweevaveraa kutani vang'ana? Muraafo yaalyikwa ulaalu? Oode, nkyeevaa-fo vanavakwa, mashika kwakwa yeny nkiroo ngota kwany yeni, mashika woko lwa Nndumi Iruva mbo luleshikapa.

¹⁴ Vekiita indo vakafwa lyingi, na Orpa kamiminda mammi wakwe kaenda, lyo Ruti we keenda aryani nawe.

¹⁵ Naasa Naimi kavia Ruti, kulollye mwali ulya ungyi nkaammi wafo ammbuya kyeny kwa vandeye na kwa iruva lyakwe, naasany neewe kyensoreny.

¹⁶ Naasa Ruti kaamba, Kulashiitikye shikure, Shiwuye, shilakane neewe-fo; Kimmba kundo kweenda neeny mfo nsheendaa, Na ando kwakaa neeny nng'u nshekaa. Vandu vafo vave mmbo vakwa Na Iruva wafo naveva mmbwe Iruva wakwa;

¹⁷ Na ando kwafiiya nng'u neeny nshefiiyaa Na nng'u kweni nsherikwaa; Nndumi Iruva nasheekye kive indo na kilanya. Ni ufu weni lushelutarakanisaa yese Luvavii.

¹⁸ Naasa Naimi eekilollya Ruti ankaarya indo, kamanda irera nawe.

¹⁹ Vakeenda veeryani tana vafika Betlehemu. Veekifika Betlehemu muri moose ukalanga imanya mbony tawo. Vaka veefo muriny vakaamba, A dede yeu mmbwe Naimi?

²⁰ Naimi kavavia, “Mulakishivaange Naimi-fo shivaangeny” Mara Kimmba Iruva Nndumi Iruva aleshitannya findo fivavaa nnu.

²¹ Mmbo shilooka kunu shiikutiri, lyo ulaalu mmbo shawuya shilatiri kindo, mulakishivaange Naimi-fo, mashika Nndumi Iruva mmbo aora paa kya Iruva Nndumi Iruva ishirikya ukiva.

²² Niindo Naimi na mwalyi wakwe we Ruti valewuya vauka kulya Moabu vakafika Betlehemu kwiikee mapookyony a fimu fya nganu.