OBADIA 1 - BIBILLYA Mareiyo Meele a Iruva

Nndumi mmbo Akabaa Edomu

¹ Elu ni ukisuku lwa Obadia, yoora kilya Nndumi Iruva Mwitorya fyoose arera kya Vaedomu. Nndumi Iruva mmbo arika varumi vakwe kwa vandu na masanga lukeeta nrumi yeyo yakwe, kyeyaamba, “Kwiipony-te, ndifony lweende fireny lundekaba Veedomu”

² Nndumi Iruva kavia Vaedomu nawo, “Mmbo ushekufofisaa, wo nndu nakumini,”

³ Ikusaro lyafo mmbo lyilekulemba Muri wafo nniini nturuve ya mawe moomu Na mmba yafo ikavikwa uwe mafumbu-u. llyoony kwakusara efo nriminy wafo kwaamba, “Mmbi ashidimaa ishoondwa kunu uwe shikai”

⁴ Lyo naakwa mmba yafo yakaa uwe ngota kifuri kya uviri, ikava sheelyi ikoyaa kulya nyinyiriny Llyo nkuti shikoondwe-fo kuwe si.

⁵ “Kwakooya manyinyi asheya nndu kyeeri kya kio mmbo arakwaa-u kilya kivatiny. Na kyeeri vandu vayaya sabibu, mmbo vasaara-fo maata Kyeendi vakiduva vafo mmbo valekusallwa vakakumaa piny.

⁶ Yeni vana va Esau, masaa afo a usuri ankamarwa moose.

⁷ Vambuya vafo nawo vakakwiita ntambo vakakuumbuta efo urukeny lwafo. Valya vekee noofoo neewe, mmbo yewo vakeekushingillya vakakuvinga Vambuya valya kweelyaa nawo, mmbo yewo vakuvikye nreiyo, vakarera kyafo vakaamba, ‘Urango lwakwe loose nkwi lukai?’”

⁸ Nndumi Iruva mmbo aamba nkonu yeto nshisheraa shilamamita vandu varango va Edomu-fo.

⁹ Na vandu vatiri finya, mmbo Vatemani vakooye isavaa na wo umwi efo mafumbuny a Esau nawaawa.

Kimaruma kya ngabo ta Edomu

¹⁰ Kyeendwa ni uravi yelo mwanany Yakobo aletannyo, usutu mmbo lushekurayaa kumamitwa kulakupoo-se-fo, llung'anu.

¹¹ Kyeeri yewe kulefura kwasalala mbai kwakallya veny vesokaa mwanamau findo fyakwe, na vakiduva vakwe veshangaa mmba kwakwe neewekwaakannya Yerusalemu, kwava sha umwi waawo.

¹² Kyeendi lyo kulafure elyi mwanamau awonnywa mmakasha, nta kularere vana va Yuda uvishwa kyeeri vakeesisyo. Nta kulashekutuula kyeeri wo vakee ukiveny.

¹³ Na kyeeri vandu vakwa vafiiywa nta kulaange kwawo, nta kulavaimaiye-fo, nta kulaipoo kindo kyawo-fo.

¹⁴ Nta elyi veefo varishaa ngatara yaawo kulashesalala yoo shia kweengere ivakapa, nta yewo vaturunya kulashevapaana-fo.

Nndumi Iruva asheutaa Uvingo

¹⁵ Mashika nkonu yeto wa Nndumi Iruva ushesheyaa masanga moose. Wo nndu nataiywa kilya aletana. Wo nndu neekeryo iryo lyakwe efo nrony.

¹⁶ Mashika shaasa mulena kulya ifumbuny lyakwa yeele, niindo vandu va masanga vashengeraa ina. Ee vani neesavaa vave ruu.

Itumbe lya Israeli

¹⁷ Lyo kulya ifumbuny lya Sioni mmbo vashekaafo yewo vankia nto muri mweele, nnyo mmba ya Yakobo ya veni ding'u.

¹⁸ Nayo mmba ya Yakobo neeyo ya Yosefu tishevaa muro ukoraa. Lyo mmba ya Esau ive mamburu moomu, naake neevamamita, kuleefo nndu ashekiaa. Ni Nndumi Iruva arera ekyi.

¹⁹ Ifumbu lya Esau mmbo lyishetirwa ni vandu va Negebu kuve kwawo. Na vandu va Shefela natire uruka lwa Vafilisti. Vashetira marema a Efraimu na a Samaria. Nawe Benyaminy natire uruka lwa Gileadi.

²⁰ Lyo itorito eva va Vaisraeli vakee nnang'ani Vakanani mmbo vashetiraa Sarepta. Na valya va Yerusalemu vekee vakamare vakakaa Sefaradi vashetiraa miri ya Negebu.

²¹ Na valya veekabanya vengyi mmbo vashesaama ifumbuny lya Sioni wootye Esau uvingo. Elo llo luvaa umangyi lwa Nndumi Iruva.