NEHEMIA 9 - BIBILLYA Mareiyo Meele a Iruva

Vandu Vakurrya ngyulyamari Tawo

¹ Nalyo wikee nkonu wa makumi avii na kaana wa mwiiri yeto, vana va Israeli vakakuumbya ando amwi, vakakootoya, veeree makunnya, neekwaamba kiluulyi nrony.

² Vakakurauwa deny na vandu veny, vakakurya ngyulyamari tawo na ta vakuu vawo.

³ Vakasalala vakasomyo uvavaso lwa Nndumi Iruva waawo, ando a kyenga kya nkonu, vakavekurya kya makasha awo, vakeendya Nndumi Iruva waawo.

⁴ Llyo valesalala ando kwa uwe ando vekai Valevi, Yeshua, Bani, Kadmieli, Shebania, Buni, Sherebia na Bani, Kenani, vakafuu ya Nndumi Iruva na unyanga uniini.

⁵ Llyo Valevi, Yeshua, Kadmieli, na Bani, na Hashabneya na Sherebia na Hodia na Shebania na Petahia, vakaamba, “Salaleny yaa mung'anise Nndumi Iruva weeru, llung'anu na llung'anu. Nalyo irina lyakwe lying'aniswa, elyo lyitiri nnduma ngota findo fyoose.”

Kiterevo kya Ipara Ulyamari

⁶ Esra kaamba, Nndumi Iruva ni yewe kumuni, nnyewe kuumbye iruveeu na ngina ya vayo, na ironda lya vayo lyoose, ulana sanda na fyoose fiifoo, yeeve na nsemu wa vayo, neewe kwatetera efyo fyoose, Na ironda elyo lya iruveeny lyikakwiitikisa yewe kyeeri kyoose.

⁷ Nndumi Iruva ni yewe, kukee Iruva kulevaanga Abramu, kwamuuta kulya urukeny lwa Uri lwa Vakaldayo, kwamfishya Abrahamu.

⁸ Neewe kwasennyo mmbwe, kwammbikya kyaasa, kunniinge uruka lwa Nkanaani, na Mhiti, na Mwaamori na Mperisi na Myebusi, na Mgirgashi, ando amwi na ufyari lwakwe ive ding'u yaawo. Neewe kwasheinutya efyo fyoose kimmba kukee wa usumanu.

⁹ Na lyingi kwalollya ukiva lwa vakuu veru kulya Misri, kwaaranya kiiyo kyawo, alya yeeveny lya Siria.

¹⁰ Neewe koora Farao na vandu vakwe mashora maniini a ngyende tafo, mashika elyi valetannya vandu vafo kiila, neewe kwawonau irina ilyimbi fika inu.

¹¹ Kwawuya kwarauwa yeeve yoo nnang'ani kavii vande veru vakeera ando kwaarutu, na valya vekee vavingya kwavamamitya efo mureny, vakarekya-fo sha iwe lyeero mureny.

¹² Kweengera ivatetera na ngo ya muro kio, na ngo ya ifishi kyeeri kya nsanyiny,

¹³ Na alya ifumbuny lya Sinai kooloka kwarera nawo, kwavatetera na ufoo kwiivaniinga mavavaso afo na uteteri lwafo.

¹⁴ Kwavaniinga Sabato yafo sheele, na uvavaso lwafo vakaluwarya wokony lwa nsero wafo, we Mose.

¹⁵ Kwavaniinga kyeelya kilya kya iruveeny llya valetirwa nshaa, Kwavautya mura efo iweny vani, valawaawa nnyura, kwavavavasya veende Kanaani vandetira uruka, kwiivateteraa yewe.

¹⁶ Kyeendi vakuu veru vakalyang'aa vakalema yiirikya mavavaso,

¹⁷ nta mmbalekikumbwa ngyende tilya valeorwa-fo, vakoomisa ngoo tawo, vakakunda iwuya ushingeny, vakavika mwiivasongoya, Kyeendi yewe Iruva weeru mmbo kukee mwiilyillya, muni isarya-dwa, nta kulakunde ivara.

¹⁸ Nta llya valesongosya ifwanu lya ngashe valyiindye, na yaamba vai, “Yue mmbwe iruva wafo alekuuta kulya Misri ewe Israeli, ‘Vakalyamara kifye indo.

¹⁹ Neewe kyeendo niisarya lyafo nkulevara kulya kasa-fo, nalyo ngo ya ifishi nnyilenka mbee yaawo-fo, nta ngo ya muro-fo fikavatetere shieny yawo.

²⁰ Kwavasimba mumuyo wafo navaranguse, na shoonga ilya ya mana na mura weena.

²¹ Ni dede ando a myaaka makumi aana mmbo kulevalela kulya kasa, valature kindo, nta soori tawo ntilekkwa-fo, nta marende awo alafumbiswa nkyaaro.

²² Kooka-fo kwavaniinga ngyuruka ta vandu vengi tive tawo kulu, nto ngyuruka ta Sihoni na Heshboni na Ogu wa Bashani.’”

²³ Na vana vawo kwavafumbuta sha nyinyiri ta nginiiu kwashevaata urukeny lulya, shaasa kulevikya vande vawo kyaasa.

²⁴ Nawo vakashetira ngyuruka eto, na Vakanaani yewo kwavavika maakony awo vakavafuna na vamangyi vawo,

²⁵ Vakavinga miri yeetiri turuve, itiri mbora na findo fisha fiingi, na miri ya ndunda. Vakalya shoonga vakawuura, vakatira mmba tawo, vakafura nnu.

²⁶ Lyo mmbalekusirya-fo, vakalema, vakara mavavaso awo, vakawaa na vakisuku vafo valya vekeevarerya naambo vavaviire kwafo. Kyeendi vakalyamara kiniini nnu nnu.

²⁷ Nkyo kimaruma kwavavika maakony a vakiduva vawo, vakava saveesa, lyo kyeeri valerovyo vakakufuuya kwavevaaranya-da, kimmba kukee mwiilyillya, kwavaniinga veevakabannya vakawoota maakony a vakiduva vawo.

²⁸ Lyo llya valeonisa kiimuyo, vankia, vakawuya ilyamara-se, vakawoyo-se ni vakaduva vewo vakavashillya Nalyo llya valekufuuya lyingi, kwavaaranya tupu, kwavevakira indo keengi.

²⁹ Kwawuya ivakumbura mavavaso afo, lyo vakalema-da valaaranyi, vakalema (nang'u mmbo aleniingyo naambo mwiiringa nakirwa). Lyo wo vakalema, vakoomisa ngoo tawo, vakalyang'aa.

³⁰ Lyo kwavasisirya ando a myaaka niingi nnu deny, kwarera nawo na kana ka vanabii vafo, lyo nta valakunde yiita, kwavavika maakony a vandu vakiduva vawo.

³¹ Lyo kyeendo niisarya lyafo yiingi nkulevamanita-fo, nta nkulevavaa-fo, nnyelyi kukee Iruva wa isarya yiingi, mwilyilya.

³² Naasany woi Iruva kulyimbye kwaveva muni finya toose kukee Iruva kweeresye, kwaveringa fyaasa fyafo kwava na mwilyilya, shaasa yese lulewoyo niireema, yese na vamangyi veru, na vasongoru, na vakohani, na vakisuku, na vande veru na vandu veru woose, bookya kyeeri kilya kya mangyi ya Shuru fika inu, mmbo lulerovyo nnu.

³³ Lyo yewe mmbo kukee wa usumanu, kwavetana fya usha, neese lukawonisa yefyo fyoose kyeendo mmakasha eru.

³⁴ Nta vamangyi veru na vakohani na vasongoru na vande veru mmbalelatya mavavaso afo-fo, nta mbalearanya shasa kulevavavasya-fo

³⁵ Kimmba valera ikurundya yewe efo urukeny elo nsha kulevaniinga kyeevasarya, nta valaalashike ngaa tawo,

³⁶ Lolaany yese mashinga afo nnyaa Lukai inu yaa urukeny elu kuleniinga vakuu veru vakulyiiye-fo masha a vayo, yese ulaalu mmbo luvakye mashinga.

³⁷ Na uruka elu lukava mbusha ya vamangyi yewo kuleluvikya kyeendo ngyulyamari teru, nawo vakalulammya nnu, na findo fyeru shaasa vakundye, lukakaa ngatareny wo nkonu.

Vandu Vakeelya Mma

³⁸ Kikeeny indo ulaalu mmbo lukundye ivika kyaasa kitiri finya, kireiyo, shaasa Valevi veru na vakohani veru vankiirikya, vakavikau kiringisyo.