NEHEMIA 8 - BIBILLYA Mareiyo Meele a Iruva

Esra Asomya Israeli Uvavaso

¹ Naasa vandu vakatereva Esra neende kyitabu kilya kya mavavaso kya Mose naambo vavasomye.

² Nawe nkohani Esra kakyeende mbee ya ironda llya lyoose, womi na vaka, mmbo valya woose veeshidimaa yaaranya neemanya.

³ Nkonu yeto wekee wa mbee wa mwiiri wa mfungare. Uka ngama elyi kwa vekya fika nsanyiny elyi mwi usimbiki, wo vekee yoo mbee ya Ngiri ilya ya Mura, womi na vaka, woose vakeeta uvavaso shaasa Nndumi Iruva alevavasya Mose.

⁴ Esra kasalala yoo kitareny kya yaambaya mbony, na vandu valesalalau nawe ni Matatia, Shema, Anaya, Uria, Hilkia na Maaseya yewo vakakaa taari ya woko nsha. Na valekaa woko umuso ni Pedaya, Mishaeli, Malkiya na Hashumu, Hashbadani, Sekaria na Meshulamu.

⁵ Esra katarambwa kyitabu ekyo vakalollya woose mashika ekee uwe, nawo vakasalala woose.

⁶ Esra katereva Nndumi Iruva munifinya, nawo vakaamba Amen, Amen veshooroyaa maako awo efo uuwe, vakainyika mirwe yaawo vakeendya Nndumi Iruva vakawa si kifulufulu.

⁷ Nawo Yesua, Bani Sherabia, Yamini, Akubu, Shabetai, na Hodai, Maaseya, Kelita, Asaria Yosabadi, Hanani, Palaya, wo ni Valevi, vakasunndya vandu mavavaso yoo naambo vaamanyi wisha.

⁸ Nawo mmbo valesonyo na unyanga uniini veete woose, vakasunundyo vakamanya nisha.

⁹ Nehemia ekee Tarshata, na nkohani Esra kava mwiireiya mbony ta uruka, na Valevi vakava veelesha vandu. Nawo vakavia vandu, “Yeu ni nkonu mweele wavikwa ni Nndumi Iruva, Iruva, Iruva weeru, mularovyo nta ikaba kiiyo-fo.” Mashika vandu woose mmbo veiya kyeeri valesomyo uvavaso llwa.

¹⁰ Nalyo kavavia, “Kweengyeny mukandekulyiyya shoonga tany na ufoo, neekuniyya, muvekumbwa neeto nalatiri, mashika nkonu yeu mmweele wavikwa ni Nndumi Iruva weeru, nta mularovyo-fo mashika ikyesa na Nndumi Iruva nnyo finya yaany.”

¹¹ Niindo valevi valeviirya vandu muu, mashika yeu ni nkonu mweele, nta mularovyo-fo.

¹² Na vandu woose vakookau vakandekulyiya neena, vakakyesa neeniinga valya valatiri waavi, kimmba vemmiitumuso nisha kya filya valeloshwa.

Nkonu Nniini va Matangilo

¹³ Nalyo elyi lya ndesi vasongoru va ngyufyari toose, na vakohani na Valevi, vakasheya Esra, naambo vaaranyi-se uvavaso.

¹⁴ Vakamanya kilya kikee kireiye efo uvavasony shaasa alevavasya Mose, vana va Israeli v akae matangilony, kyeeri kya sukukuu ya mwiiri wa mfungare.

¹⁵ Nakyo kyaambawa efo miriny myoose, na Yerusalemu, kyeyaamba, “Endeny nturu mundeende myaangashi, na maramba a miri ingi atiri finya naambo asongosie matangilo, shaasa kikee kivavasye.”

¹⁶ Naasa vandu woose vakandeende maramba yoo a miri, vakatana matangilo, wo nndu uwe ya mmba yakwe, neefo kari kwawo, neefo numa ya mmba ya Iruva, na yoo mbee ya ngiri ya mura, na mbee ya ngiri ya Efraimu.

¹⁷ Na vandu woose valya valenkaa ushingeny vakatana matangilo, vakakaa-fo, mashika kyeeri kya Yosua mwana wa Nuni fika ulaalu, vana va Israeli mmbentana matangilo-fo. Vakava na ifura iniini nnu deny.

¹⁸ Nalyo wo nkonu, bookya nkonu wa mbee wa sukukuu ilya fika mafurumyony, Esra kavasomya uvavaso lwa Iruva. Vakavika sukukuu yeyo ando a mikonu mfungare. Kufike nkonu wa nyanya vandu vakakuumbya ironda iniini mmwasi shaase vekee vavavasye.