NEHEMIA 4 - BIBILLYA Mareiyo Meele a Iruva

Veerunndya isimamba vengyi

¹ Kyeendi kyeeri Sambalati aleeta sheelyi mmbo lukeetana isimamba yeto, keereve, kasswa, kavavyo deny, kaarara Vayuda.

² Karera na vanavamaye na vasikari va Samaria, kavavia, “A Vayuda yeva varung'ani nkyoki eki vakeetana-ro? A mmbo vakeekuvikya isimamba? Mfiraso vakundye yuutyafo. A elyi vakeewaana indo mmbo vakundye imaa inu yeni? A mmbo valekooya mawe moose yoo eewundukye llya alekorwa na muro vaarute?”

³ Nawe Tobia Mwamoni nng'u eekai, kammbia, “Naako ni eki vakeetana ulaalu ibarwe lyikakusingau isimamba yeto wawo wa mawe mmbo uwundukaa.”

⁴ Nalyo shavia Iruva, “Woi Iruva weeru, arannya shaasa lukeeyaararwa shakutereva kuvaviirye ekyo vaamba, nawo vashetirwa varawa ushingeny.

⁵ Nta kulasikye uravi elu lwawo na ulyamari elu-fo, mashika mmbo vankumina mbee yeewo vakeetana muri yeu.”

⁶ Nalyo lukeera itana isimamba ulya koose riti, ukafikya nnang'ani yeenda uwe, mmashika elyi vandu valya veetiri nnu nrima weerunda.

⁷ Kyeendi kyeeri Sambalati na Tobia na Vaarabu maata na Vaamoni na Vasidodi valeeta sheelyi ishora lyeetana-se isimamba wa Yerusalemu mmbo lyikeerundwa kishikishi nato moose wammaa irindwa deny, naasa vakarooywa ni unyafi nnu,

⁸ vakaumburana veni na veni veeboo fira ishekabana na vandu va Yerusalemu vashelyamarafo

⁹ Kyeendi yese lukafuuya Iruva weeru, lukavika vandu veeringa kio na nsanyiny, naambo vavasiike kwakooya vasha.

¹⁰ Vakaamba Vayuda mmbo vasiiye kimaruma kya mashora na mario yoo varie.

¹¹ Na vakiduva veru vakaamba, “Nta mmbalulollya nta imanya lwansha-fo kutani elyi luvawoyaa, luvawaa, na ishora lyawo lyimande.

¹² Nalyo Vayuda valya veefitani nawo vekimanya vakesheluvia lyingi na lyingi kya ekyo veekundye itana, vakaluvia lurishye kwaasha.”

¹³ Naasa llyo shiledeesya vandu, wo ando kweiyo mwaanya efo kwanuma ya isimamba, veerye ngyusu, na mafumu na ngyura.

¹⁴ Shakusara nnu, shavia, vasongaru na vashilyi na vandu vengi woose, “Mulairyee-fo, kusiryeny Nndumi Iruva weeru yeu akee nniini, aeresye, mukabanye vandu vany, na vana vany na vaka vany na mmba tany.”

¹⁵ Nalyo kyeeri vakiduva yewo veru valemanya sheelyi lwambamanya, neekyo sheelyi Iruva amfullwa kyama ekyo kyawo, yese lukawuiya wo nndu ishora lyakwe lyeengera itana isimamba.

¹⁶ Ukalyony vandu vakwa kyenga vakarunda, na kyenga vakatira fisha, m'mafumu na ngawo, na ngyura na veesalallya woose vakavingya Yuda.

¹⁷ Vandu valya vekeetana isimamba sanda na valya veeboo mario, mmbo valekuvikau dede, wo nndu eerundaa na woko yelu, yelu lungi mmbo lutiri kisha kyeekapana.

¹⁸ Veetana mmba yewo vakanunuta usu shoro, karundany. Neeto mwiikaba wombe kakaa kufii neeny.

¹⁹ Nalyo shavia vasongoru na vashilyi na vandu woose, “Mashora ya mmengi, akang'ana deny neese efo mmbombony lukakaa kwaasha kwaasha.

²⁰ Kyasia lyo kyeeri mushiitaa iranda, ashony moose. Ni Iruva weeru tupu ashelukabanyaa.”

²¹ Naasa indo lukakusirya ishoreny elyo, lyo kyenga kimwi kikatirafisha uka ngama fika elyi mwiiri wavaa.

²² Kyeeri eki shavia vandu, “Wo nndu nakae kunu Yerusalemu kio na vandu vakwe, varundi veru vave varingi veru kyeeri kya kio, na nsanyiny varunde mashora yaa.”

²³ Nalyo yeny na vana va ma na varundi vakwa, na vandu valya veeringa sheekee nawo, nta kio lluleuta-fo soori teru-fo. Nalyo wo nndu mmbo aleenda na kisha inderaa mura.