NEHEMIA 12 - BIBILLYA Mareiyo Meele a Iruva

Vakohani na Valelevi Vevuya

¹ Kyasia, yewo mmbo vakohani na Valevi valerwa ando amwi na Zerubabeli mwana wa Shealtieli na Yosua, Seraya, Yeremia, Esra,

² Amaria, Maluki, Hatushi,

³ Shekania, Haarimu, Meremoti.

⁴ Ido, Ginetoni Abiya

⁵ Miyamini, maazia, Bilgai,

⁶ Shemaya, Yoyaribu, Yedaya,

⁷ Salu, Amoki, Hilkia, Yedaya. Yeva mmbo vekee vakohani vaniini fyeeri fya Yosua.

⁸ Na Valevi ni Yeshana, Binui, Kaadmieli, Sherabia, Yuda Matania, veewarya fyaanu ando amwi na veeki vawo.

⁹ Na Bakibukia na Uno, na veeki vawo vakawaryana mashora.

Vammba ya Yosua

¹⁰ Nawe Yosua kaira Yoyakimu, Yoyakimu kaira Eliashibu, Eliashibu kaira Yoyada,

¹¹ Yoyada kaira Yohana, na Yohana kaira Yadua.

Vasongoru va Mmba ya Vakohani

¹² Kyeeri kya Yoyakimu kukaafo vakohani, vasongoru va ngyufyari, ni Seraya, meraya, va Yeremia na Hanania,

¹³ va Esra, Meshulamu, va Amaria, Yehohanani,

¹⁴ va Maluki, Yonatan, va Shekania, Yosefu,

¹⁵ Harimu, Adna, Meremoti, Helkai,

¹⁶ va Ido, Sekaria, va Ginetoni, meshulamu,

¹⁷ va Abiya, Sikoi, va Miyamini, va Maasia, Palti,

¹⁸ va Bilgai, Shamua, va Shemaya, Yehonatani,

¹⁹ va Yoyaribu, Matenai, Yedaya, Usi,

²⁰ va Salu, Kalai, va Amoki, Eberi,

²¹ Hilkia, Hashabia, va Yedaya, Netaneli

Marina a Vandu va Kyeny kwa Vakohani na Valevi

²² Valevi va kyeeri kya Eliashibu, Yoyada na Yohana, na Yadua mmbo vakee vareiye ando amwi na vasongoru va ngyufyari, na vakohani, fika kyeeri kya mangyi Dario, ulya Nsirya.

²³ Valevi na vasongoru va ngyufyari, mmbo vareiyo efo kyitabuny kya fyeeri fika kyeeri kya Yohana mwana wa Eliashibu.

Irambikkyo Mashora a Mmba ya Mwiindye

²⁴ Na vasongoru va Valevi ni Hashabia, Sherabia, Yeshua, Binui, Kadumeli na vandu vawo, yaana na irumisha Iruva, shaasa Davidi aletana wo nkonu.

²⁵ Matania, Bakibukia, Obadia, Meshulamu, Talmani, Akubu, wo ni veekallya ngiri ta mmba ta umasilwa mmba ya Iruva.

²⁶ Vekee va kyeeri kya Yoyakimu mwana wa Yosua mwana wa Yosadaki. Na fyeeri fya Nehemia akee mangyi na Esra kava nkohani na mwiireiya mbony toose ta uruka.

Nehemia Arambikkya Isimamba lya Muri

²⁷ Kyeeri isimamba wa Yerusalemu ulesia ukafikya ivikyo mbora, Valevi woose mmbo valevaangwa vashe na Yerusalemu vasange ifura ando amwi na yuuta kyaanu na yiimba, na fiiya fya wo ngata fya yiimba fikabwa, mfinanda, matoasi, fivale.

²⁸ Veembi vakakusanyirya vauka fyuungony fyoose fya Yerusalemu na fya Varetofati.

²⁹ Na Bet-gilgali na vengi wooka mareminy a Geba na Asmaweti, mashika veembi yewo mmbo veetiri kundo kwawo veni efo fyuungon fya Yerusalemu.

³⁰ Vakohani na Valevi vakakwiilyisa, neeyiilyisa vandu vengi, na ngiri na isimamba.

³¹ Nalyo shasaamisa vasongoru va Yuda yoo uwe ya isimamba, nalyo shavavasya maronda avii maniini, lyimwi lyeende taari ya woko usha, taari ilya ya ngiri ya mbulula,

³² na Hoshaya kavalatya, na kyenga kya vasongoru va Yuda

³³ ni Asaria, Esra, Meshulamu,

³⁴ na Yuda, na Benyaminy na Shemaya na Yeremia,

³⁵ na vakohani maata veerye maranda, Sekaria mwana wa Yonatan, mwana wa Shemaya, mwana wa Matania, mwana wa Mikaya, mwana wa Sakuri, mwana wa Asafu,

³⁶ na vandu vakwe ni Shemaya, Asareli, Milalai, Gilalai, Maai, Netaneli, Yuda, Hanani, mmbo veerye finanda sha fya nndu ulya wa Iruva Davidi, wee Esra kavasongoya,

³⁷ na alya ngiriny ya usoka, vakeera mbee, vakaronga kulya fitareny fyeeruuka muri wa Davidi, alya isimamba urooye ukairya mmba ya Davidi, fika alya ngiriny ya mura ikee taari ya ngama.

³⁸ Na ironda elyo lya kavii lyikandevaambya, neeny shalatya yoo numa, ando amwi na kyenga kya vandu, vengi vakee kulya uwe ya isimamba, na mara ulya wa muro, kufike alya isimambany ulya nniini.

³⁹ Na uwe ya ngiri ya Efraimu, kwiira ngiri ya kasha, na ngiri ya makunga, na nnara wa Hananeli, na nnara wa Hamea, fika alya ngiriny ya moonri, nawo vakairisha yoo ngiriny ya kifingyo.

⁴⁰ Niindo maronda yoo avii a yewo vekee sukukuuny ya mmba ya Iruva, na yeny na kyenga kya vasongoru,

⁴¹ na vakohani Eliakimu, Maaseya, Miyamini, Mikaya, Elioenai, Sekaria, na Hanania, mmbo lveerye maranda,

⁴² na Maaseya na Shemaya na Eleasari, na Usi na Yehohanani na Malkiya na Elamu na Ezeri. Veembi mmbo valeimba na unyanga waasha veeteterwaa ni Yesrahia.

⁴³ Vandu vakoota firaso fiingi nkonu yeto, vakakyesa, mashika elyi Iruva alevalyimmya nsia nniini indo, vakasanga na vaka na vana vakakyesa. Ifura elyo lya Yerusalemu lyikaitiwa kwaasha nnu.

Wiindi Mmba ya Mwiidye

⁴⁴ Nkonu yeto vandu vakavavasyo vasanyirye firaso fya mmba ya Iruva, firaso fya fimu fya mbee, fya kyenga kya ikumi, fyuuka miriny neefo mareminy, shaasa kyekee kivavasye vakohani, na Valevi, mashika Yuda mmbo vesennyo nnu ni urundi lwa vakohani vawo na Valevi.

⁴⁵ Mmbo valetana efyo fyoose shaasa Iruva avavasye, na mbony ya ikwiilyisa, na uringi loose, neevika veembi shaasa Davidi evavasya, na Salomon.

⁴⁶ Kyeeri kya Davidi nndu ekee mwisalallya veembi neevika fiimbo fya irumisha Iruva na fya fyaanu ni Asafu.

⁴⁷ Na kyeeri kya Serubabeli na kya Nehemia, Vaisraeli woose mmbo veniingya findo fyawo kimaruma kya veembi na veekallya ngiri va wo nkonu, fikava firaso fyawaryo ni Valevi na vana va Aron.