NAHUMU 3 - BIBILLYA Mareiyo Meele a Iruva

¹ Woshiny lwafo muri wa iwaa Mmbo kwiishwe ulembi na usokyi Kulakee imanda isoka vandu.

² Arannya yoona lya ngova, Ndirimu ya ngalyi, Ntiri va frasi na mitika idinaa.

³ Veesaama frasi mbakee ikuteesya, ngyusu na mafumu mmbo akeemika-mika; Minying'a mmiingyi nnu ilavaa yekyeena, Vandu mmbo vakee ikukapafo kyeeri vakee iira.

⁴ Kyimaruma kya usonga lwa isonga, Mmbo kwallemba vandu yewe nka nsavi, Nkulekumba masanga akava mashinga kya usonga lwafo Na vandu va masanga na usavi lwafo.

⁵ Lolaany; Yeny Nndumi Iruva wa matorito mmbo nkapana neewe; Mmbo shikwaammbwa irinda lyafo lyifike nrweny, Naambo masanga moose akulollye kwikee mbereto, Ngyumangyi toose tilole na miso usutu lwafo.

⁶ Mmbo shikweerya mbulula kutefuke, Shikutannyaa kiila, Shikwaale kuve weeting'isa kuminwa.

⁷ Numa vandu vakulollyaa vakurishe veeshaamba, “Ninavi kwarumatwa, Mmbi akaa rembo nakulyilye ukiva? A nkwi shikuruuyya mwivirya muu?”

⁸ A ndesa yewe mmbo kukee nsha ngota Tebesi, Muri ntane mbaambaa ya mura wa Naili? Uringitywa ni mura, Yeeve mmbo lyeekee usiro lwa vayo mura ukava isimamba.

⁹ Isopia mmbo yeekee finya yakwe, Kyiwo na Misri kulaifo umando, Vandu wa Puti na Valibya mmbo veemwekyaa.

¹⁰ Naakwa ni indo ukaipowa ushinga, Vandu vakarawa usamirony. Naakwa mmbana vakwe mmbo vekonindwa Veraratwa yefo mbai ya shia, masiinngo akakapyo mbusha, Vaniini va uruka woose vakafingwa mise.

¹¹ Naakwa ni yewe kunangwaa-da, kusurumwa Nkurishaa nkiduva naambo kukusurumi.

¹² Turuve tafo mmbo tikee sha makuu avikye nisha, atiri ndunda mbiiri ta mbee Akasisikwa mmbo awoyaa kaniny kya mwiilya.

¹³ Lola matorito afo, ni vaka vakee nnang'ani yafo, Ngyiri tafo ntikeetiruye vakyiduva vafo, muro vameimamita deny nsiria ya vayo.

¹⁴ Raiyeny mura mulale shoovi kya isheringitywa. Tumariseny turuve yaany. Posheny mapwashi na marende, Deesyeny iriko iniini lya ikorya matofwalyi.

¹⁵ Yoo nng'u muro ushekurumatyaa, Usu lushemumamityaa kwaasha; Lumurumate shaasa nre ilyee. Kweengereny sha shondo, Kweengereny sha nre!

¹⁶ Veekapa-mbusha vafo mmbo veengereka ngota nyinyiri, kya indi ulaalu mmbo weera veru sha shondo tarumbuka.

¹⁷ Vaniini va uruka lwafo nsha nre, vasongoru wafo nsha ironda lya shondo, kyeeri kya mbyo mmbo likaa masimambeny kya indi mwi ukammbaa nkwiifo amannyaa kundo teera nafo-fo.

¹⁸ Yewe mangyi ya Ashuru, veisa-finda-fyafo mmbo vakee ipara rwe, vaniini va uruka vafo mbakee irengeya. Vandu vafo mmbo vantarakannya yefo mafumbuuny kulaore kwiifo nndu wa ivasangirya.

¹⁹ Nkwiifo nndu wa ivavara fishavere kutiri-fo, fishavere fyafo fya ufu. Vandu vakeeiita mbony tafo mmbo vakakakapa maako. Mashika mmbi kulaore aleovya uvishwa lwafo lulatiri umando?