MWIILOSHA 9 - BIBILLYA Mareiyo Meele a Iruva

¹ Shasoongya neekusara nnu kya mbony eti shoose efo nriminy wakwa, shakooya ate Iruva mmbwe muni mwiishillya neetetera mbony eti kweewo vatiri urango na vasongovisi, kwakooya ni kya ukundi ao nyashi nndu wa vandu nnyeeshi-fo. Efi fyoose kwawo ni maariso.

² Mashika mafurumyony a efi fyoose ni kyimwi kwa valya vasongovisi na vakasha, vasaari na valyamari, veelyise na vatefusu, veeniingya firaso, na valya valaniingyaa. Eto akee nsaari ni kyimwi-nsi na eto akee llyamari, neeto alyiisyaa mboo nshi kilasha neeto alalyee-fo.

³ Ekyi ni kindo kivavaa mmwasi, nnang'ani ya findo fyoose fiutikaa yaandi ulaniny mashika masiiyo a-vayo woose mmbo vasheiluulaa fiinani. Kilanya ya fyoose mirima ya vandu eva mmbo yiishwe ulyamari na ukwale neefwa vafwe tiny.

⁴ Lyo eto eefo na muu akulungye na valya veefo na muu ya ulaniny mmbo akee wa ngoma, kite kiifo na muu ni kyeni ngota miiso ifiiye.

⁵ Mashika valya veefo na muu veeshi vakamanya vashefwaa lyo valya valemfwa mmbeeshi kindo-fo; nkukyiifo kyeniingwa-fo. Nta mmbakyikumbuywa lyingyi deny-fo.

⁶ Ukundi lwawo, kififi kyawo, na lango tawo fyoose fyansarumya amwi nawo llung'anu, mmbakyikaa valollye lyingyi kindo kyikeetanyika ya ulaniny-fo.

⁷ Enda kulyiiye shoonga yafo kweefura, kuni na mfinyu wafo na nrima nkyesi mashika iruva ammbwarya mashora afo kutannyi.

⁸ Kwaambike soori tafo shisha neyaamba nrwe wafo mafura.

⁹ Lya uruka amwi na nka wafo yeto kunkunndye kyeeri kyoose kya muu wafo yeto Iruva akuniingye wa pya ya ulaniny. Elo llo waavi lwafo kuniingywa kyeeri kya muu wafo, na kya mashora afo moose yaa ulaniny.

¹⁰ Wo kindo kukunndye itana kitani kwa finya tafo toose mashika nkwiifo mashora nta makusaro nta urango efo kukeyeenda kundo kwa vandu valemfwa-fo.

¹¹ Mmbo shilelollya kindo kyimwi yaa ulaniny, sheelyi valya veeshi irisha deny mmbavaviingaa-fo, nta valya vakee vakaari ivinga fira-fo, nta varango iwona kindo kyeelya-fo, nta valya vasomyi iva masimba-fo, nta valya vatiri wiidimi uniini vaaluwa vasongoru-fo; indi kyeeri kya mbora kyikansha mmbo ishee kwa vandu woose.

¹² Nndu nnyamanyaa kyeeri isheshaa kwakwe-fo. Ni kyimwi sha ishinga kyeeri lyatirwa na ndeye yatirwa tiny ni nreiyo. Niindo mwana wa nndu ashekooya iwoywa ni nrenga tiny naleeshi.

Makusaro maantu na urung'ani

¹³ Mmbo shilelollya kyaaso kyimwi ya ulaniny kya nndu atiri urango, neeny shakooya ni kindo kitiri mbusha niini.

¹⁴ Kweifo muri umwi n-du utiri vandu vaangu. Kasha-fo mangyi umwi atiri finya kauringitya, neekudeesya ikapa muri yeto.

¹⁵ Kulya muriny ulya kweifo nndu umwi nturi atiri urango. Kyeendwa ni urango lwakwe, nndu ulya nturi kaidima ikyira muri ulya. Indi numa ya-va-yo nkwiifo nndu alesara kya nndu ulya nturi-fo.

¹⁶ Kweekyo yeny mmbo shaamba; urango ni kyeni ngota finya, naakwa veepala nndu yeto nnrango, nta yaarannya makusaro akwe.

¹⁷ Ni kyeni yaarannya makusaro maantu a nndu nnrango; ngota yaarannya kyoorongye kya mangyi efo ikwaanuny lya vandu varung'ani.

¹⁸ Urango ni mbusha ngota ikusara fisha fya fira, indi nndu umwi llyamari mmbo alyamaraa findo fisha fiingyi.