MWIILOSHA 8 - BIBILLYA Mareiyo Meele a Iruva

¹ Mmbi eto akee sha nndu nnrango? Mmbovi eeshi isununda ngata mbony tikai? Urango mmbo lweengye nndu nsia, Na makusaro yoo anrovye akaalashika.

Inndya mangyi

² Yeny mmbo shaamba: Inndya ivavaso lya mangyi, mashika ekyo ni kyaasa kyeele kwammbika kulootepa-fo.

³ Kulaangusye yuuka mbee ya usangu lwakwe-fo, nta itana efyo filansennyaa mashika mangyi mmbo ashiidimaa itana ekyo akunndye.

⁴ Ekyo mangyi ammaamba nkwiifo nndu ashiidimaa yaalasha-fo; mmbovi akarya immbesa nkyoki kukeetana.

⁵ Eto ashiinndya mavavaso nkwiifo mbony aveswaa-fo, na makusaro a nndu nnrango mmbo amanyaa fyeeri na shia.

⁶ Mashika wo kindo mmbo kitiri fyeeri na shia ya-va-yo; lla neelyi mwana wa nndu akee nrovye ni ngatara shiingyi.

⁷ Mashika nnyeeshi kindo kyikee numa-fo; mmbi-nta ashiidimaa immbya ekyo kyikeesha numa?

⁸ Nkwiifo nndu atiri wiidimi lwa muu wakwe-fo; ao nkonu wa ifwa lyakwe-fo. Nkonu wa misa nkwiifo nndu aturunnyaa-fo; na ukasha llushiidimaa ikira nkasha-fo.

Vakasha na vasongovisi

⁹ Kyeeri sheekesununda mbony eti mmbo shilekooya findo efyi fyoose fikeetanyika yaa ulaniny. Kyeeri nndu atiri finya yeelammya ungyi neemwaafinya.

¹⁰ Shalollya vandu vakasha veerikwaa, veishivye yaanga neesomuka efo kundo kweele nawo mmbo veekeyiindywa neerumishwa efo kweni muriny kundo veekerunndya makasha yoo awo. Efyo fyoose ni maariso.

¹¹ Vandu mmbawona ngapo llya yeni-fo nkyo kimaruma vakeetana makasha wo nkonu.

¹² Nndu llyamari mmbo ashiidimaa itana ulyamari ka iyana lyo kakaa-fo na muu. Lyo yen kindo kyimwi shiishi, ni ngoma valya veinndya Iruva kyimaruma vakee vasongovisi.

¹³ Lyo kwa valyamari nkwiifo ifura-fo. Wo mmbo vashiira veru sha kirishe nta mmbavaa na muu mwaasha-fo mashika mmbaleinndya Iruva-fo.

¹⁴ Mmbo shilekooya kindo kyingyi kikasha deny yaandi ulaniny: Kindo kyikwaani itannywa vandu vesha vakatannywa vandu vakasha na kindo kyikwaani itannywa vakasha vakatannywa vandu vesha (vasongovisi). Nafyo efi fyoose ni maariso.

¹⁵ Yeny mmbo shaamba, ni kyeni nndu kafura yaandi ulaniny mashika nkwiifo kindo kisha sha nndu ilya na ina na ifurisa nrima-fo. Efyo mfyo findo nndu ashiidimaa itana, efurukannyaa muu wakwe kyeeri kyoose, eto Nndumi Iruva anniingye yaa kwaasi ya ngina.

¹⁶ Kyeeri shilesununda mbony kwa urango lwakwa loose ikunda imanya mmwasi ngata findo fitanyikaa yaandi ulaniny, mmbo shilekooya ate nndu mmbo kushiidimaa ilala rembo kio na nsanyiny,

¹⁷ naasa shakooya nndu wa vandu nnyashiidimaa imanya mashora yaa a Iruva akeetannyika kunu ulaniny-fo. Ewo vatiri urango mmbo vakee kwaatara kyaruu. Veshaamba vashiidimaa lyo mmbashiidimaa imaanya-fo.