MWIILOSHA 6 - BIBILLYA Mareiyo Meele a Iruva

¹ Mmbo shilelollya kindo kyimwi kikasha yaa ulaniny nakyo niilammya vandu vafwafwa.

² Iruva mmbo aidimisya nndu kawona usimba na masaa meengyi kamwiinndya kammbonisya wo kindo akundye, lyo Iruva kamwiima finya na wiidimi lwa ifura nafyo. Indi kasha nndu mwuny kashefura nafyo ando akwe. Ekyo ni kindo kikasha na maariso.

³ Nndu ashiidimaa iwona vana iyana, neeva na muu mwaasha kunu ulaniny mmbo shaamba, kwakooya nndu eto alashiidimaa ifura kya muu wakwe, nta alawoni nndu mwiinrika, ni kyeni mwana alewonika ekee mfu ngota nndu yeto.

⁴ Mmbo alewonika alatiri mbusha, kawuya neereeminy, kasikywa neerekyeka.

⁵ Kya mmwasi mwana yeto nnyalelollya nkyeere nta nnyalemanya kindo kiimwi-fo. We mmbo alewuya na yiimuya nisha ngota-we.

⁶ Naakwa nndu yeto eniingwa myaaka fiku fivii yaa ulaniny, lyo alaidimi ifura nayo nkwiifo mbusha-kyi kwakooya we na mwana yeto ni kundo kumwi vakeenda?

⁷ Maariso a nndu kyeeri kyoose ni iruuya shoonga lyo ndeu eyo nnyikaa yiishwe-fo.

⁸ A nndu nrango mmbo atiri mbusha kailannya nndu nrung'ani? Ni mbusha-kyi nndu nturi atiri elyi eedima ifurukannya va kyeny kwakwe?

⁹ Ni kyeni ifura neekyo kukee nsimbe ngota ilalakya fya mmwasi, mashika fyoose ni maariso na nndu akeerishisa uraato.

¹⁰ Wo kindo kyikeetanyika ni kindo kyikeekideesye ukya kasha, ngata ya nndu mmbo yiishiwa na wiidimi lwakwe, nndu mfwafwa nnyashiidimaa ikweesa na nndu atiri finya mmwasi-fo.

¹¹ Marero meengyi nnyatiri mbusha-fo mmbo kukeekusuta kumuni?

¹² Mmbi eeshi ekyo kyikee mbusha kyeeri ekyi kyifii kya muu wakwe eto ushiira veru sha kirishe? A mmbovi ashiidimaa yaamba ekyo kyishekaa kyive yaa ulaniny kamme-fwa?.