MWIILOSHA 3 - BIBILLYA Mareiyo Meele a Iruva

Kyeeri kya wo kindo

¹ Wo kindo mmbo kitanyikaa kwa kyeeri kya vayo yaa ulaniny.

² Kyeri kyeewonika na kyeeri kyeefwa Kyeeri kyeevaaya na kyeeri kyeilula.

³ Kyeeri kyeewa, na kyeeri kyeekira Kyeeri kyeewunndwa mmba, na kyeeri kyeetana mmba.

⁴ Kyeeri kyefiira, na kyeeri kyeeseka Kyeeri kyeiya, na kyeeri kyefina

⁵ Kyeeri kya yeera mawe, na kyeeri kyeyuumbya mawe. Kyeeri kyeekulumba, na kyeeri kyeera kulakulumba.

⁶ Kyeeri kyeeruuya, na kyeeri kyeereta Kyeeri kyesuruma, na kyeeri kyeeyera

⁷ Kyeeri kyeeranndwa, na kyeeri kyeefuma Kyeeri kyemamya-sau, na kyeeri kyeerera.

⁸ Kyeeri kyeekunda, na kyeeri kyeeisuvana Kyeeri kya fira, na kyeeri kya urilalyi.

⁹ Ni mbusha-ki, awonisaa yeto mwiitana efyo fyoose?

¹⁰ Yeny mmbo shilollye maariso Iruva aniingye mwana wa nndu.

¹¹ Iruva mmbo atannyi wo kindo kisha kwa kyeeri kya-vayo, kaniinga mwana wa nndu makusaro a-ikunda imanya findo fisheshaa fitanyike elyi numa, lyo kamwiima makusaro a-imanya mashora Iruva atannyi ukya mapookyony fika mafurumyony.

¹² Shalollya nkwiifo kindo kya mmwasi mwana wa nndu ashiidimaa itana-fo kuuta ifura na itana wo kindo kisha kyeeri kyoose kya muu wakwe.

¹³ Kweekyo lulye neena lwiifurye, kya mashora a nrike weru mashika eto ni simbo tuuka kwa Iruva.

¹⁴ Mmbo shiishi shamanya wo kindo Iruva atannyi mmbo kyikaa indo llung'anu kuleefo kindo kishiidimika yeengerywa-u ao yuutwa-u. Niindo Iruva atannyi naambo vandu vakooye imwiindya na imweereya.

¹⁵ Ekyo kyikeetannyika inu kilemma-itannyika, neekyo kyitannyika numa, kilemma-itanyika. Mashika Iruva mmbo atana kindo kilya kyeni kitanyike lyingyi na lyingyi.

Usumanu lwawiika ulaniny

¹⁶ Kilanya ya fyoose shakooya yaa ulaniny ando kwa udede na usumanu kya indi ni ulyamari lukwaani wo-ando.

¹⁷ Efo nriminy wakwa shaamba, “Iruva mmbwe mwileta mwaandu kwa vandu vasumanu, na ewo valasumani; kwa kyeeri kisumani na mashora a-vayo.”

¹⁸ Efo nriminy wakwa shaamba, “Kya vana va vandu Iruva mmbo akeeveesa tupu mashika mmbatiri kilasha na mafisi a ngoroshony-fo.

¹⁹ Mafurumyony a nndu wa vandu na mafurumyony a ifisi ni kyimwi tupu, mashika ngata nndu akeefwa, niindo, neefisi lya ngoroshony lyikeefwa. Naakwa nnyomwa uraato naakwa ni ifisi lya ngoroshony ni-ki-wo, mwana wa nndu na ifisi lya ngoroshony ni-kyimwi tupu nkwiifo kilasha-fo. Fyoose ni maariso.

²⁰ Woose mmbo vafwaa, na woose mmbo vasheenda ando kumwi. Woose ni uteeriny vaukye, na woose mmbo vawuyaa uteeriny.

²¹ Mmbovi eeshiny sheelyi nrima wa nndu ushesaama iruvee-u, na wa ifisi usherekya na sumbai uteeriny?

²² Llyo shemanya ate, nkwiifo, mbusha kwa mwana wa nndu kilanya yeefura kimaruma kya mashora a-maako akwe-fo; mashika niindo Iruva ammbikye uramba. Mmbi eto ashiidimaa ivia mwana wa nndu ekyo kishekaa kishe kyeeri ammefwa?”