MWIILOSHA 2 - BIBILLYA Mareiyo Meele a Iruva

¹ Naasa shaamba, “Nrima ankyeirisha shikurwee ando kundelyaa neena kufure na ikushele.” Numa shakooya itana indo, niikwarisa mmwasi.

² Shaamba iseka, “ni usembo.” Shakooya, ikushela, mmbusha-ki shikooya-fo?

³ Shakusara deny, ngata nshiidimaa ikushela na yeengera urango, kweena mfinyu shikwiite kisha, shamanya deny, sheelyi yei nnyo shia na ngata shisha, mwana wa nndu ashiidimaa ilatya, kyeeri ekyi kya mikonu myaangu ya muu wakwe ya ulaniny.

⁴ Sharunda mashora meengyi nnu, shatana mmba takwa na ireminy lyakwa shawaaya-fo misabibu.

⁵ Shasongosya nnda vakwa, shavaaya-fo miri ya ndunda ta wo ngata na ando kweyaamira mitika.

⁶ Shasuma firori fya mura we nisa neemiisa miri.

⁷ Shaura mashinga a kyuumi na a kyika na vengyi vakawonikya yefo mmba kwakwa, shatira findo fya mmba fyeevikya, makamba a ng'umbe na moonri shailannya wo nndu yeto enkaa Yerusalemu mbee yakwa.

⁸ Shasangirya fesa na saabu na umasi wiingyi luuka efo ngyurukeny ta vamangyi. Shava na veefina mbasa, veembi va kyuumi na va kyika na vaka vesha vashoommwa womi.

⁹ Shava nndu nniini, shitiri wiidimi sheelannya vandu woose yewo vakee Yerusalemu mbee yakwa. Na urango sheetiri lukaengereka.

¹⁰ Kilya kyoose miso akwa alelanga shakiwonisa, na nrima wakwa shauniinga wo kindo wakunda.

¹¹ Kyeeri shekeekusara kya filya fyoose sherunda na maako akwa na shilevinnya-u shirundaa mashora yoo, numa shashekooya ate filya fyoose shilerunda na maako akwa mmbo shilekwaatara ni kyimwi sha nndu akeerishisa uraato, nkweeiyo mbusha imwi kwasi ya ngina-fo.

¹² Naasa shapooka ikusara; iva na urango nkirie yaamba-kyi ao iva nkwale ao nrung'ani. Shawuya shakuvesa; A-ndesa mangyi mwiiya nkyokyi ashiidimaa itana? Kyindo ashiidimaa itana-nsi filya filentanwa mmbamangyi vansongoye.

¹³ Naasa shalollya, “Urango ni kyeni ngota urung'ani, kiwo sa ni mmwasi ya ireema.

¹⁴ Vandu varango mmbo valollye kundo vakeyeenda nafo lyo nrung'ani alollye-fo.” Numa shalollya filya fikooya nrung'ani mfyo fyeni fikeeshikooya na ulya atiri urango.

¹⁵ Naasa shakusara efo nriminy wakwa shaamba, “Kwakooya weesi lwa nrung'ani llo weesi lwakwa a-kyimaruma kyeeva na urango lufye indo nkyokyi?” Sharouwa shiikusaraa shaamba, “Efyo fyoose ni maariso.”

¹⁶ Mashika nkwiifo nndu ashekummbwaa eto akee nnrango nta ashekummbwaa eto akee nrung'ani-fo. Mashika mikonu ikeesha woose mmbo vasherekyekaa, kilya nndu nnrango akeetana nkyo nndu nrung'ani akeetana.

¹⁷ Kweekyo muu kwakwa ukawa nshi-kindo-fo. Mashika wo kindo shiletana kwasi ya ngina mmbo kilesheenngye maariso, ni kyimwi sha nndu akeerishisa uraato.

Maariso a mashora na umasi

¹⁸ Shasua mashora akwa moose alya shilerunda kwa sina kwasi ya ngina shiimanyaa ni kuti shireeye nndu ungyi yeto asheshillya numa yakwa.

¹⁹ A-mmbi yeto amanyaany sheelyi ashevaa nndu nnrango ao nndu nrung'ani? Naakava-kyi ni kuti ashewarya filya fyoose shilefirunndya na urango lwakwa kwasi ya ngina, neefyo fyoose ni maariso!

²⁰ Naasa sheenduka shalla numa shoota-pa, shasya finya-deny ngata shilevinnya-u shiirundaa efyo fyoose kwasi ya ngina.

²¹ Mashika kyeeri kyingyi nndu mmbo kushiidimaa irunda kwa urango na makusaro meengyi, fyoose kushereeya nndu naleeshi ngata kulefirunndya. Yoo mmariiso na ulyamari uniini.

²² A-mmbusha-kyi nndu atiri kya mavina na maariso affye indo kwasi ya ngina?

²³ Mashika mikonu yakwe myoose ni mavina tupu, mashora moose ni maariso naakwa ni elyi kio makusaro akwe nnyatiri kiimuyo-fo neefi fyoose ni maariso.

²⁴ Nkwiifo kindo kyimwi kisha, kwa mwana wa nndu, kuuta ilya neena, neefura, kya mashora akwe-fo. Neekyo, mmbo kyuukye kwa Iruva.

²⁵ Mashika kulammbesywa ni Iruva, nkwi kushuuta efyo fyeelya, fyeena, na fyekushela?

²⁶ Iruva mmbo asimba nndu yeto ansennya, indi mmbo aniinga nndu llyamari mashora a yuuluula na yuumbya, nalyo yeni, Iruva kaniingya ulya amwiindyaa, na efyo fyoose, ni kyimwi sha nndu akeerishisa uraato.