MWIILOSHA 12 - BIBILLYA Mareiyo Meele a Iruva

¹ Kummbwa muumbi wafo kyeeri kya ukoo lwafo kulaore mikonu na myaaka eyo mikasha yansha, kyeeri kushaamba shammariswa, nkukyiifo kindo shikivikye nsia-fo.

² Kulaore kyeeri, sa, mwiiri na nyinyiri, fyammbuya iva ireema nalyo ifishi lyammbuya kyeeri mmbwa yammanda.

³ Finya ya ikweekya llya kwiikee nkoo na yo ulaalu yammisya. Marende alya etiri finya ya isalala ulaalu ammba mafwafwa na mayoo eerafuna shoonga ammaangwa na miso ammeende ireema.

⁴ Maarwi afo amma ifwa alakiidimaa yiita ngyunyanga teefo shia naakwa ni fiimbo na maseve esheesa na fiimbo fishiimbwa na ifina nkukeita-fo. Lyo kyikava ni ndeye ikeerera mmbo ishiidima ikwaanta kwiilele rony.

⁵ Kyeeri ekyo mmbo kusheereyaa isaama ando a uwe yeenda kumuni kundo kwaasha mmbo kivaa kindo kyuumu kwafo. Fii ta nrweny mmbo tifwanaa shaa pyai nkukyiidima isalala na marende afo kumuni-fo, nta lango ta ngata shoose tikyikee efo makusarony afo-fo. Nndu mmbo akeewuuya neefo kwakwe kundo kwa yiimuya llung'anun. Vandu veyiira shia vashekapa kyiiyo.

⁶ Nse wa arera ulekeye na taa ya saabu iwe-si iparike, sanda na kyikombe kyeena mura nakyo kiparike.

⁷ Miili yeeru mmbo iwuyaa neefo sumbai kiluulyiny kundo luukye, na muu yeu uwuye neefo kwa Iruva yeto aluniinngye.

⁸ Mwiilosha kaamba; efyo fyoose ni maariso, ni maariso, shaamba ni maariso.

Kya mafurumyony

⁹ Kimmba Mwiilosha akee nndu atiri urango, keengera ilosha vandu findo efyo eeshi. Mmbo ekee nndu eeshi fyaaso, nawe kasununda mmwasi naidimi imanya udede lwavayo.

¹⁰ Mwiilosha karuuya marero mesha eefwerisa vandu na marero yoo evalosha mmbo ekee a usumanu.

¹¹ Seu ta vandu varango mmbo tivavaa sha mbiiri ya mwiitetera moonri, neeto mwiireiya fyaaso fikavaka nndu akappya nsumari ukananga siny. Fyoose mmbo fyuukye kwa Iruva; yeto mwiisi wa woose.

¹² Mwanakwa, kwiise nnu ngata kusheendaa mashika mareiyo nnyatiraa umando-fo. Neelyi kwasoma kwailannya mwiili mmbo ushushukaa.

¹³ Kindo kyeefurummya; efyo kwavywa fyoose mmbo kwamma yiita. Ereya Iruva na yiinndya mavavaso akwe mashika ni indo kyikundinkye kwa nndu wa vandu mbee ya usangu lwa Iruva.

¹⁴ Mashika Iruva mmbo asheluutya uvingo kya mitannyi yeeru myoose, sanda na alya aletanwa kirika ave mesha ao makasha.