MWIILOSHA 1 - BIBILLYA Mareiyo Meele a Iruva

Muu Mmaariso

¹ Yaa mmarero a Mwiilosha, mwana wa Davidi, mangyi ekee muriny mmbwa Yerusalemu.

² Mmuukeekwarisa deny, Ni yeny Mwiilosha shamuvia. Wo kindo mukeetana mmbo mukeekwarisa!

³ Ni mbusha-kyi mutiri, Kwa sina yei shoose yaa ulaniny?

⁴ Ngyeeri mmbo ikeeira, ngyeeri ingyi ikasha; Indi ulana llushaalashika-fo.

⁵ Nkyeere mmbo ukeefuma, Nkyeere mmbo ukeyaanga;

⁶ Uraato lukafuma taari ya sinde, lukarunguka fika taari ya ndoo, Uraato lukarunguka neerunguka-se, Lukawuya yoo rungusweny yavayo, kyeeri kyoose.

⁷ Ngyusoka toose tikapusukya yeeveny, Indi yeeve nnyillemmishwa-fo, Efo kundo ngyusoka tipusukyaa, Mfo kundo tipusukyaa lyingyi na lyingyi.

⁸ Mbony shoose mmbo tikeyeende maariso, Alawaa yaambawa, Iriso llyikeyaara ilola, nta yaarwi yaarannya-fo.

⁹ Filya fiyo mfyo fishekaa-u, Filya filentanwa mfyo fishetanyikaa, Mashika nkwiiyo kyindo kyimwi kyiiya yaa ulaniny-fo.

¹⁰ A nkwiiyo kyindo kishambawa, “Lola, ni kindo kyiiya?” Oode, mmbo kilemma itanyika kupookya mbee, kulaore yese lwammbonika.

¹¹ Nkwiifo nndu akumbuye filya fya kasha-fo, Nta nkwiifo ashekummbwaa efyo fisheshaa numa-fo.

Filya Mwiilosha alelollya

¹² Yeny Mwiilosha, mmbo shilemmba mangyi ya Israeli kunu Yerusalemu.

¹³ Mmbo shekunda iruya neesununda kwa urango lwakwa wo kindo kyikeetanyika yaa kwasi ya ngina. Shakooya ni ukiva na maariso Iruva aleengye vana va vandu.

¹⁴ Shakooya wo kindo kyikeekyitani kwasi ya ngina ni maariso na nndu akeerishisa uraato.

¹⁵ Kindo kyikulemmilemmyi nkushiidimaa ikyoorwa-fo, nta kilya kilaiyo nkishiidima yeekyenwa-fo.

¹⁶ Shakummbwa, yeny shimuni mmbo shilemmba nndu atiri urango shailannya vashilyi woose valenshillya Yerusalemu mbee yakwa, makusaro na urango shitiri lweerunndya vandu llwa mikonu miingyi.

¹⁷ Nshekunndye yaavanisa nnang'ani ya urango, ukwale na utondo, numa yavayo itana indo, ni kyimwi sha nndu akeerishisa uraato.

¹⁸ Mashika iva na urango nnu, na isaukwa niindo lyikooya ing'ana. Neeto engera imamya mmwasi, mmbo eengera ting'wa mmwasi