MIKA 7 - BIBILLYA Mareiyo Meele a Iruva

Udedemi lwa Israeli

¹ Oshiny lwakwa, Mmbo shivakye nndu atirwa nshaa nalaona nta ndunda isaaye yoo nriny nailye. Ndunda toose mmbo tammaa iyaywa-fo mmbandu vengyi.

² Kunu urukeny nkusaaye-fo nta nndu umwi wa usumanu-fo nta mwiindya Iruva-fo. Wo nndu mmbo akeruuya mwaanya wa iwaa wo nndu kavikya vamurasa wakwe nreiyo.

³ Vakava varango deny itana meesi. Vasongoru na veerumbwa myaandu vakakunda ikapwa ng'unde naambo vataniny usumanu. Yeto atiri unyanga mmbwe avaviaa kyeetana ekyo akundye, vakansora.

⁴ Yeto waawo akee nsha ngota vengyi mmbo akee wa tangalu ngota mooro wa mambaru! Ulaalu nkonu wamfika Iruva nakape vandu shaasa wiikimbi lwa varingyi wo vakisuku lulesongwa yaamba. Ulaalu vamfulukyo deny.

⁵ Kulasore vamurasa wafo nta kulairikye mbuya yafo-fo. Lola kukwiise nnu kindo kuviaa naakwa ni nka wafo kumuni.

⁶ Fyeeri efi vana mmbo vatanya vandeye sha matondo. Na vana va kika vakamina vamaye fushu. Valyi vakawaana na vamammi. Vakiduva va nndu vakava ni ewo va kyeny kwakwe muni.

⁷ Lyo mmbo shivikyaa Nndumi Iruva miso akwa, shivereye Iruva wakwa yeto asheshikiraa. Iruva wakwa mmbo asheshaaranyaa tishi.

Nndumi Aende Ukiro

⁸ Vakiduva veru mmbashefuraa neese-fo. Mmbo lukeesia, lyo lushesalalaa lyingi. Ni ireeminy lukee ulaalu, lyo Nndumi Iruva asheluvaiyaa sa yakwe.

⁹ Mmbo lulelyamarya Nndumi Iruva nkyo ulaalu nkuti lusisirye ngapo ya unyafi lwakwe. Lyo mafurumyony mmbo ashekaa kyaalu kyeru nalweekye isongosya filya lulekapwa nafyo. Nashelweengye sa, lumanyi mmbwe alukira.

¹⁰ Llyony vakiduva veru vashelollyaa efyo valollye sony, vakiduva valya veni vekeluvia, “A Nndumi Iruva waany nkwi akai?” Mmbo lushelolaa veevingwa neevavarywa efo si sha ipwashi efo shia.

¹¹ Vandu va Yerusalemu, ekyi nkyeeri kyetana-se isimamba lya muri wany. Nayo minyanu yafo ishesemberwa ing'aniswa.

¹² Nawo vandu vafo vashewuya wooka taari toose. Wooke Siria taari ya ngaminy, wooke na sinde mfo Misri, wooke fyuungony fya mura wa Eufrate, wooke taari ta kwaasha ta mafumbu na yeeve.

¹³ Lyo ulana mmbo lushevaa kasa koomu kimaruma kya uravi lwa yewo veefo.

Nndumi Alyillya Israeli

¹⁴ Woi Nndumi Iruva wa yewe mwiisi wa vandu vafo kulevasauwa. Lla elyi valenyanyakya efo kasa kusheveende-se urukeny usha. Veekeye vandelya ureny usha lwa Bashani elo luvaringitye. Veende Bashan na Gileadi sha llya mbee.

¹⁵ Woi Nndumi Iruva ora ngyende tafo shaasa kuletana llya kuleluuta kulya Misri.

¹⁶ Vandu va masanga valollye vafulukyo na kyikava vatiri finya. Vaawukwa lyo varaye kana kyawo neefinika maarwi awo.

¹⁷ Vashekuruffwa efo si sha shoka. Vasheuka efo turuveny tawo veereremaa na iiryaa. Vasheindukya Nndumi Iruva weeru vetirwa mmbwerei.

¹⁸ Nkwiifo iruva lyikuvakye-fo Nndumi Iruva yewe mmbo kwasarya ngyulyamari ta vandu vafo valya valelusaaya-u. Nta nkwarooywa ni unyafi llung'anu-fo, kyeendi mmbo kusennywa ni elyi kwaloora ikunda lyafo lyilamandaa.

¹⁹ Neewe mmbo kushelulyillyaa-se. Mmbo kushevavaryaa ngyulyamari teru efo si neetirika efo ndilyiny ya yeeve si!

²⁰ Kusheora vandu vafo usaari lwafo na ikunda lyafo, mmbo yewo vakee vana va Abrahamu na Yakobo, shaasa kulevika nawo kyaasa ukya kasha eko.