MIKA 6 - BIBILLYA Mareiyo Meele a Iruva

Mwaandu wa Nndumi na Israeli

¹ Aranyiny mwaandu wa Nndumi Iruva na vandu va Israeli. Amba Nndumi Iruva ekyo kurye ivavesa, mafumbu na fidooro fiite.

² Yeni mafumbu na myaango ya llung'anu aranyiny mwaandu wa Nndumi Iruva Mmbo efoo avesaa Israeli.

³ Kaamba, A vandu vakwa nkyoki-ro shimulyamarye? Mmbo shamureeya inda iryo? Shivieny-te.

⁴ Mmbo shilemuuta kulya Misri, shamwaauwa ushingeny. Sharuma Mose, Aron na Miryam vamusongoye.

⁵ Vandu vakwa-dwa, nkyekumbweny kindo Balaki, we mangyi ya Vamoabu eekundye imutanya, na shaasa Balaamu mwana wa Beori alembia. Kumbweny filya filetanyika kulya shia kuuka ulale lwa Shitimu fika Gilgal, llyo mushemanyaa mesha shilemutannya shamwaauwa rengeny.

Kindo Nndumi Akunde

⁶ A nkyoki Ekyo Nndumi Iruva akunndye ndesa shiningaa Nndumi Iruva, wa iruveu shimwaani nakyo elyi nshaa imwiindya? A ndesa shamuutya ngashe shisha ya mwaaka umwi na kiraso kyekora na muro?

⁷ Nndumi Iruva ashesenywa ni moonri fiku ao usoka lwa mafura ashekaa nalafikya? Ao ndesa shamuutya mwana wakwe mmbee nave kiraso kya uravi lwakwa?

⁸ Oode, Nndumi Iruva ammaa iluvia kilya kisumani. Nakyo nkyo ekyi: Ni itana usumanu, yoora ikunda lya toki, na yeenda shia ya ikunyiisa na Iruva weeru.

⁹ Iryaa Nndumi Iruva nkindo kya urango. Mmbo avia muri yeu, “Arannyiny te yeni va muri yeu!

¹⁰ Mmba ta vandu yeva varavi mmbo kwiifo findo valewonisa na ntambo. Mmbo veesya vandu findo na mesa a wongo. Neekyi mmbo shikisuuye deny.

¹¹ Mmbo nsaryaa inda vandu vashesyaa vandu findo na ulembi?

¹² Yeni masimba mmbo mwafota vakiva, neeni moose mukava valembi.

¹³ Ulaalu shammaa ipooka imukapa kyeendwa nngyulyamari tany.

¹⁴ Mmbo mulyaa lyo mure mulawuura, shaa yeengere imurovya tupu. Mmbo musamaa lyo mmushinukyaa nisha-fo. Wo kindo kwalyima mmbo Ashekinyanyatyaa fireny.

¹⁵ Muvaaye fimu lyo mure mulailula. Mukami mafura lyo mure mulaalya nta. Musongosye mfinyo mure mulauna.

¹⁶ “Efyo fimusheye mashika llya mulelatya ngaa ya mangyi Omri na ya mwana wakwe, we mangyi Ahabu. Mmbo muleengera isora mikaaye yaawo. Naasa mmbo nshemumamitaa, na wo nndu namumini. Vandu va masanga woose mmbo vashemutanyaa fya kiila.”