MIKA 5 - BIBILLYA Mareiyo Meele a Iruva

¹ Yeni va Yerusalemu kusanyiryeny-te, lwansheywa mmisa. Mmbo varye ikaba nsongoru wa Israeli!

Iruva Avika Kyaasa kya Nshilyi Auka Betlehemu

² Nndumi Iruva mmbo aamba indi, Ewe Betlehemu ya Efratha, mmbo kukee n-du deny ngota miri myoose ya Yuda, lyo kwafo yewe nsheutaa-fo nshilyi wa Israeli, nawe mmbwa ufyari lwa elyo kasha.

³ Nndumi Iruva mmbo ashereeya vandu vakwe vakiduva kutani elyi nka yeto asheiraa mwana wakwe wa kyuumi. Numa lyo vandu vakwe vakee vakamare ushingeny vasheumbyoo-se vawuye kwa vandu vawo.

⁴ Kyeeri ekyo nshilyi yeto ashaa mmbo asheshillyaa vandu vakwe na wiidimi luukye kwa Nndumi Iruva na itumbe lyuukye kwa Nndumi Iruva muni. Vandu vakwe mmbo vashekaa na ufoo mashika vandu va ulana woose mmbo vasheirikyaa ushilyi lwakwe,

⁵ naveengye ufoo. Kyeeri Vasirya vashelushingillya neemaa finya yeeru, mmbo lushekapanaa nawo na finya shoose.

Ukiro na Ngabo

⁶ Veeke na finya indo vashevinga Vasirya, na uruka lwa Nimrod, nawo vasheluauwa maakony a Vasirya kyeeri vashelushingillyaa urukeny kweru

⁷ Na vandu va Israeli yewo vasherewaa-fo mmbo vashevaa sha laura iviryaa vandu woose mmu yooka kwa Nndumi Iruva, ivevaka mmbwa yanisa mooro ukeemya. Mmbo vashekusirya Iruva nta she nndu-fo.

⁸ Na valya vasherewaa efo masangeny engyi mmbo vashevakaa miiso iruyaa kyeelya kyavayo kundo kwa nsitony. Nashekooya monri naaratwe-ratwe, kulakiaa-u kindo.

⁹ Israeli mmbo ashevingaa vakiduva vakwe woose navamamite.

¹⁰ Nndumi Iruva mmbo aamba, “Kyeeri ekyo mmbo nsammbwa mmba tany na ilyamara makari a fira

¹¹ Mmbo llyamara miri ya urukeny lwany na ifwafwala ngyulyamari tany.

¹² Mmbo llyamara mbengu eto murundaa nato shimure mulatiri kindo.

¹³ Mmbo llyamara mafwanu a maruva any na ngo ta fitara fyerasya. Uka lyo mmusheindya-se findo musongosye muveni-fo.

¹⁴ Mmbo nshefisha-fisha mafwanu a maruva a kika a Ashera efo urukeny lwany na ilyamara miri yaany.

¹⁵ Llyony unyafi lwakwa unini lushetaiya masanga moose yoo aleshiindya yeny.”