MEEKYENA 9 - BIBILLYA Mareiyo Meele a Iruva

Pasaka ya Kavii

¹ Naasa Nndumi Iruva karera na Mose alya kasa ka Sinai kwikee mwiiri wa mbee elyi mwaka wa kavii vammbuka kulya Misri, kammbia,

² na kingyi vana va Israeli vatire sukukuu ya Pasaka kyeeri kilya kikee kivavasye.

³ Nkonu wa ikumi na kaana wa mwiiri yeu, elyi nkwaany, kyeeri kilya kikee kivavasye, na mavavasyo a vayo moose shaasa akai, niindo mushesoraa.

⁴ Naasa Mose kavia vana va Israeli vatire sukukuu yeyo ya Pasaka.

⁵ Nawo vakatira Pasaka elyi mwiiri wa mbee, nkonu ikumi na kaana wa mwiiri, elyi nkwaany, alya kasa ka Sinai, shaasa Nndumi Iruva alevavasya Mose, nawo vana va Israeli vakatana indo.

⁶ Naasa kweeiyo womi maata venkutefusa kimaruma kya nndu mfu, valaidimi isora Pasaka nkonu yeto, nawo vakeenda mbee ya Mose na Aron nkonu yeto;

⁷ vandu yewo vakavia Mose, “Yese mmbo lukee vatefusu kyeendwa ni nndu mfu, a nkyiki elyi lweemwa lulautye Nndumi Iruva firaso nnang'ani ya vana va Israeli shaasa kikee kivavasye?”

⁸ Mose kavavia, Irisheny, naambo shaarannye shaasa Nndumi Iruva ashambaa kyany.

⁹ Nndumi Iruva karera na Mose kammbia,

¹⁰ Rera na vana va Israeli kuvavie, Nndu waany wa marika moose, yeto ashetefukaa kyeendwa ni nndu mfu, ao kwakooya nkyaaro, eekai nkuti nasore Pasaka ya Nndumi Iruva

¹¹ mwiiri wa kavii, nkonu wa ikumi na kaana wa mwiiri, elyi nkwaany, valye Pasaka ando amwi na mikate ilatiri ntarang'u na nyany tivavaa;

¹² valasarise kindo kyoose fika ngama-fo, nta valafishe ifwa lya ngurana ya Pasaka-fo, shaasa ivavasyo elyo lya Pasaka lyikai niindo mushetanaa.

¹³ Lyo nndu nalatiri kiteve, nta nalakee kyaaro anra nalalatya Pasaka, we navikwa kwaasha na vandu vakwe mashika elyi ara nalautya Nndumi Iruva firaso fyakwe, kyeeri ekyo kikee kivavasye, nndu yeto mmbo ashekamaraa ulyamari lwakwe muni.

¹⁴ Na kwakooya muny akee neeni efo kyaarony, nawe kakunda isora Pasaka ya Nndumi Iruva shaasa ivavaso lya vayo lyikai, naasa natane indo, tireny ivavaso lyimwi nsi, kwa muny na muni uruka elu.

Ifishi lya Muro

¹⁵ Na nkonu ulya valereiya ando kweele, kukasikywa ni ifishi naelyi kio ngo ya muro, kufika ngama.

¹⁶ Kyikava indo wo nkonu, kio ifishi elyo lyikava sha muro.

¹⁷ Na wo kyeeri ifishi lyilya lyilekwiipoo alya yeemeny llyo vana va Israeli valeipoo kyaaro, na ando ifishi lyilya lyansalala vakamannyau ulale.

¹⁸ Kwi ivavasyo lya Nndumi Iruva vana va Israeli vakaipoo kyaaro, na kwi ivavasyo lya Nndumi Iruva vakamannya ulale, ifishi lyilya lyikankaa yoo uwe ya ulale nawe vakakaau.

¹⁹ Na shaasa ifishi lyilya lyilekaau mikonu miingyi ni indo nawo valekaa-u veringa nta valeende, veringa ando kweele kwa Nndumi.

²⁰ Na ifishi lyilya lyikankaa-u mikonu myaangu-da nawo niindo, veesoraa ivavasyo lya Nndumi Iruva vakaiboo kyaaro.

²¹ Ao kungyi ifishi lyilya lyikakaa-u pookya nkwaany fika ngama-da, lyikakupoo, lyilya lyikamiipowa-u nao vakaipoo kyaaro.

²² Na kwakooya ifishi lyilya lyileirisha-u mikonu ivii ao mwiiri, ao mwaaka, ao mmwasi vana va Israeli vakakaa yoo ulaleny kulore veepoo kyaaro

²³ lyo lyikamiipowou nawo vakaipoo kyaaro. Kwi ivavaso lya Nndumi Iruva vakamanya ulale na kwi ivavaso lya Nndumi Iruva vakaipoo kyaaro. Vakatana indo kyauka na Ivavaso lya Nndumi Iruva alevavasya Mose.