MEEKYENA 6 - BIBILLYA Mareiyo Meele a Iruva

Mavavaso a Ivika Kyaasa

¹ Naasa Nndumi Iruva karera na Mose, kammbia,

² “Rera na vandu va Israeli kuvavie, Kwakooya nndu nndumi ao nka kalyiiya Iruva mboo, mboo ya ishingo naambo nakuvike mweele mbee ya Nndumi Iruva;

³ nalani nta mfinyo ao kindo kinangaafo, nta mura wa nsabibu, nta nalalye sabibu, shiviiri ao shuumu-fo.

⁴ Mikonu yeyo yakwe yeekwilyisa nalalye kindo kyooka na nsabibu-fo nta mbeu ta nsabibu-fo nta makanda a vayo fo.”

⁵ Mikonu myoose ya kyaasa kyakwe, weembe lulapaane nrwe wakwefo, kutani mikonu yeyo yeera, yeyo alevika kyaasa na Nndumi Iruva, na kwiilyise, nare fii takwe tive shaasha,

⁶ mikonu yeyo myoose akwiilyisa kwa Nndumi Iruva nalafike kufii na nndu mfu-fo.

⁷ Nalakureveese kwa ndeye nta kwa maye-fo, nta kwa mwanamaye ao kwa mfwamaye-fo, naakwa vafwa, mashika elyi akwiilyisye kwa Iruva.

⁸ Mikonu myoose yeyo yeekwilyisa, we mmbo akee mweele kwa Nndumi Iruva.

⁹ Na kwakooya nndu moose afwa tiny kufii nawe, kava ntefusu kimaruma kya vayo, llyo ashuutaa nrwe wakwe, noote nrwe nkonu wa mfungare.

¹⁰ Nkonu wa nyanya neende mbeta ivii, ao mawore avii a mbeta, neenngye nkohani, yoo mwaangony wa yeema yeele,

¹¹ na nkohani naserisyen imwi ive kiraso kya ulyamari, na ya kavii kiraso kyemamitwana muro, navike usandi kimaruma kyakwe, mashika mmbo aanga urekwony kimaruma kya mfu, nawe nailyise nrwe wakwe nkonu yeto mweni.

¹² Nawe narammbikye Nndumi Iruva mikonu yeyo yeekwiilyisa kwakwe, nawe neende ngurana ya suva ya mwaaka umwi kive nkiraso kya urekwa, lyo mikonu yeyo ya mbee nnyisheekyenwaafo, mashika ikwiilyisa llya lyakwe mmbo lyiletefuswa.

¹³ Na ivavaso lya mwiivika-kyaasa llyo elyi, kyeeri mikonu yeyo ya ikwiilyisa lyakwe isiaa, mmbo asheendwaa yoo mwaangony wa yeema yeele,

¹⁴ nawe naserisye Nndumi Iruva kiraso kyakwe, ngurana ya suva ya mwaaka umwi shisha, ive kiraso kyaimamitwa kya ulyamari na suva ingyi ya mwaaka umwi ive kiraso kya unapwe,

¹⁵ na kikapu kya mikate ilatiri ntarango, mikate ya nswa mmamiri ikeemiriye na mafura na mikate ilatiri ntarang'o, ikee mivike mafura, na firaso fya vayo fya nswa, na firaso fyakwe fya fyeena.

¹⁶ Na nkohani naserisye Nndumi Iruva, nawe naserise kiraso kyakwe kya ulyamari, na kiraso kyakwe kyemamitwa na muro;

¹⁷ nawe asheserisaa suva yeyo ive kiraso kya unapwe kwa Nndumi Iruva, ando amwi na kikapu kya mikate ilatiri ntarang'o, llyo nkohani naserisyeny kiraso kya nswa, na kiraso kyeena.

¹⁸ Naasa mwivika kyaasa nooteny fii yeto ta ikwiilyisa lyakwe, mwaangony wa yeema lyeekwaananya, numa naute fii yeto, nativike efo murony yeto ukee yoo kwasi ya kiraso kya unapwe.

¹⁹ Naasa nkohani neepoo urende lwa suva yelo lwakoryo mureny, na nkate umwi ulatiri ntarang'u ashuuta efo kikapuny, na nkate ungyi, navikye mbika kyaasa efo maakony, elyi ammaa yuta nrwe;

²⁰ na nkohani ashefivikaa mbee ya Nndumi Iruva; kindo ekyo nkyeele kwa nkohani, ando amwi na kitari, na kisouwa, numa ya yoo mwiivika kyaasa atiri muumu weena mfinyo.

²¹ Yelyo llyo ivavasyo lya mwiivika kyaasa, na lya kiraso kyakwe ashuutyaa Nndumi Iruva kya ikwiilyisa lyakwe, na findo filya ashiidimaa ifiwonisa akee mwiivika kyaasa, niindo kisumani itana kya yiinutya ivavasyo lya ikwiilyisa lyakwe.

Mbora ya Nkohani

²² Naasa Nndumi Iruva karera na Mose, kammbia,

²³ Rera na Aron na vana vakwe, kuvavie, Niindi mushevikyaa vana va Israeli mbora muvavie,

²⁴ Nndumi Iruva namusimbe mbora navemuringa;

²⁵ Nndumi Iruva nakumikye na kisangu kyakwe, navekusarya

²⁶ Nndumi Iruva namwinduye kisangu kyakwe, nakuniinge unapwe.

²⁷ Niindo vashevikaa irina lyakwa uve ya vana va Israeli, neeny nshevavikya mbora.