MEEKYENA 5 - BIBILLYA Mareiyo Meele a Iruva

Vandu vatefusu

¹ Naasa Nndumi Iruva karera na Mose, kammbia,

² Vavasya vana va Israeli vante efo ulaleny wo nndu atirwa niivave, na wo nndu akeeyuukwa ni usa, neeto akee ntefusu kimmba ampaana nnying'a;

³ vasomuteny poo woose, womi na vaka, muvaute efo ulaleny, naambo valashetefusa efo ulaleny, mashika nng'u nkai.

⁴ Vana va Israeli vakatana indo vakavasomuta-fo woose, shaasa Nndumi Iruva alevavasya Mose niindo vana va Israeli valetana.

Ikurya ulyamari na usari

⁵ Naasa Nndumi Iruva karera na Mose, kammbia,

⁶ Via vana va Israeli, Kyeeri nndu nndumi ao nka atanaa ulyamari lukaangura kikusirye kyakwe kwa Nndumi Iruva na nndu yeto kava nravi;

⁷ llyo vashekuryaa ulyamari lwawo valelutana, nawe nataa kya urekwa lwakwe, neengeryeu na kyenga kya karaanu, neeninngya yeto alellyamarya.

⁸ Lyo kwankooya nndu yeto nalatiri vandu vakwaani nawe, nantaiyaa ekyo kya urekwa, kilya kisheniingywa kwa Nndumi Iruva kya urekwa elo lwakwe mmbo kivaa kya nkohani, ando amwi na suva ya usandi, isheva ya usandi kimaruma kyakwe.

⁹ Na wo kiraso kya mmwasi, kya findo fyeele fya vana va Israeli, vashesirisyaa nkohani, mbo ivaa yakwe.

¹⁰ Na lyingyi findo fyoose fikeefyute firaso, mfya nkohani, kindo kyoose nndu aniingyaa nkohani kive kyakwe.

Mwaandu wa nka ntuusi arenngya mmi wakwe

¹¹ Naasa Nndumi Iruva karera na Mose, kammbia,

¹² Rera na vana va Israeli kuvavie, Kwakooya nka wa nndu eera mbai kalyamarya mmi,

¹³ na nndu ungyi kalala nawe kya utuusi, na mmi wakwe nalamanyi, kyikava kindo kya kirika, na nka yeto kava ntefusu, nta kulakaefo nndu amanya, nta nnyaaramwa-fo;

¹⁴ na mmi wakwe katirwa nkififi, katirya nka kififi, na nka yeto kava ntefusu, ao kwakooya atira nrima wa kififi, katirya nka kififi, nawe nalatire utefusu nka yeto;

¹⁵ llyo nndu yeto asheipoo nka wakwe, neende nawe kwa nkohani, naende kiraso kimaruma kyakwe, nkyo kyenga kya ikumi kya bakuri ya nswa nalavike mafura yoo uwe-fo, nta ubani-fo; mashika nkiraso kya nswa kimaruma kya kififi, nkiraso kya nswa kyeekummbwa uravi.

¹⁶ Naasa nkohani mmbo ashendee nka yeto na yoo kufii yoo mbee ya Nndumi Iruva

¹⁷ naasa nkohani neepoo mura mweele ukee kiiyeny kya uteeri; naasa nkohani neepoo uteri lukee yoo si efo ulaleny, navike efo mureny yeto;

¹⁸ nawe nkohani asheelelisaa fiita nka yeto neemmbika mbee ya Nndumi Iruva, naasa nanniingye kiraso ekyo kya nswa kyeekumbura, nkyo kiraso kya nswa kyakififi, nawe nkohani natire mura yeto uvavaa usheendee kidengo efo wokony lwakwe;

¹⁹ naasa nkohani nalyiseny nka yeto mboo, nammbie, kwakooya kulaore nndu nndumi alelala neewe, ao kwakooya kulaore kulerenga isora kirinda, lyo kukee si ya mmi wafo, mura yeu uvavaa ulakuvavise-fo;

²⁰ lyo kwankooya kulenrenga, kukee si ya mmi wafo, kwava ntefusu, na nndu alelala neewe nalakee mmi wafo;

²¹ llyo nkohani ashelyisaa nka yeto mboo deny, nambie marero yaa Nndumi Iruva nakwaallwe kidengo na aboo kwa vandu vafo elyi Nndumi Iruva akwaallwe kyuumba, neekufumbisa ndeu;

²² na mura weende kidengo usaame ndewuny yafo, ukufumbise ndeu, neekufirisa kinama; nka yeto neerikye, Amen, Amen.

²³ Numa nkohani nareiye fidengo efyo kyitabuny, neefyaangata na mura ulya uvavaa;

²⁴ naasa noore nka yeto mura yeu uvava utiri kidengo, na mura yeto weende kidengo umwaange waalashike iva kivawo.

²⁵ Naasa nkohani nawaryeny kiraso ekyo kya nswa kya kififi, yuuka wokony lwa nka yeto, nairinyise mbee ya Nndumi Iruva na yiiserisya alya kitareny kyeerasya;

²⁶ naasa nkohani neebo ng'unde imwi ya kiraso kya nswa, kive kindo kyeekumbwa kwakwe, na yuukorya yoo kitareny, kyairasya numa narite nka yeto mura yeto.

²⁷ Naasa kammaa inrita mura yeto, llyo kivaany sheelyi mmbo alerengya mmi, mura yeto wa kidengo umwaange, umbavye neemfumbisa nden, na kinama kyakwe ifirika, nawe nave kidengo kwa vandu vakwe.

²⁸ Lyo kwakooya nka yeto nalakee ntefusu, nalekwa, needime yiira vana.

²⁹ Elyi llyo ivavasyo lya kififi kya Nndumi Iruva, elyi nka arenga kakuvika utefusu;

³⁰ ao, kwakooya nrima wa kififi waanga nndu nndumi, katirya nka wakwe kififi, llyo ashevikaa nka yeto kwa Nndumi Iruva, nkonu ashentanyaa efyo fyoose.

³¹ Na nndumi yeto nnyatiri ukashafo, ni nka yeto ashiiboo urekwa lwakwe.