MEEKYENA 4 - BIBILLYA Mareiyo Meele a Iruva

Mashora a vana va Kohati

¹ Naasa Nndumi Iruva karera na Mose na Aron kavavia,

² Efo yeekyeneny lya vana va Levi utau yeekyena lya vana va-Kohati, efo ngyufyari na mmba ta vandeye waawo.

³ Uka va myaaka makumi araru na mmwaasi fika myaaka makumi araanu, woose yewo vakerunndya-u, yoo yeemeny yeele.

⁴ Yelu llo urundi lwa Vana va Kohati yoo yeemeny yelyo na fiiya filya fyeele deny,

⁵ elyi vasheipoo kyaaro, Aron naange na mmba na vana vakwe, vaolote isullya yelyo neesikya nalyo isanduku yelyo lya ukureeki,

⁶ naasa valyisikye na shonyi shisha, na soori idodorye, vavikeny ng'u firi efyo fya vayo.

⁷ Na yoo uwe ya kitara kya mikate yeyo ya Nndumi vaaleny kitambaa kya buluu vaviken saani, miriko, bakuri na fikombe fyeeletya, na mikate yeyo. Vaale-u soori tidodorye vasikye na shonyi;

⁸ nawo vavikeny soori ya fwana idodorye na yiisikya na shonyi shisha, neevikan miri ilya uwe ya vayo.

⁹ Numa vashuuta soori ya samawi, na isikya nri yeto wa taa, na taa ta vayo, na saani ta vayo teeraiya makaa, na fiiya fya mafura fyoose, yefyo varundaa nafyo;

¹⁰ Nawo vavike fiiya fya vayo fyoose efo shonyiny, neevika yoo uwe ya miri yeyo ya ikurika.

¹¹ Numa vaale soori ya samawi yoo uwe ya kitara ekyo kya saabu kyeerasya, vakisikye na shonyi shisha, neevikau miri ilya ya vayo,

¹² Numa veepoo fiiya fyoose filya fya urundi lwa ando kweele neefivika sooriny ya fwana ya samawi, neefisikya na shonyi shisha yoo uwe ya firi yefyo fya ikurika.

¹³ Nawo woote ifu yoo kitareny kyeerasya, vavike soori ya sambarau yoo uwe ya vayo;

¹⁴ naasa vavike fiiya fyoose fya mwiindye yoo uwe. Varunndyaa-u nafyo, ni minya na miriko, bakuri yoondo uuwe ya kitara ekyo, vaaleu shony shisha, na firi fya vayo ando a vayo.

¹⁵ Na kyeeri ekyo Aron na vasero vakwe vammaa isikya ando kweele, na fiiya fyoose fya ando kweele, elyi vashesamira ulale, llyo vana va Kohati vashaa ishefiipoo, lyo findo efyo fyeele valashefipaana-fo, naambo valasheefwa. Fiiya efyo ni iryo lya vana va Kohati fya yoo yeemeny yeele lyeekwaanannya.

¹⁶ Na uringyi lwa Eliazari mwana wa Aron ni ikallya mafura yoo a yaata, na mfwaamu nsha, na kiraso kya nswa kilafikyaa, na mafura a yaamba, na uringyi lwa ulale loose, na findo fya vayo, yoo ando kweele, na fiiya fyoose.

¹⁷ Naasa Nndumi Iruva karera na Mose na Aron kavavia,

¹⁸ mularauwe Vakohati na Valevi deny-fo;

¹⁹ Kyeendi naambo valasheefwa vatannyeny indi, kyeeri vashefikaa kufii na fiiya yefyo fyeele nnu, Aron na vana vakwe vaange mbele mmba neerammbikya wo nndu urundi lwakwe, na iryo wo nndu na lyakwe;

²⁰ lyo wo valaange indelollya ando yoo kweele, nta kinnyofo, naambo valasheefwa.

Mashora a Valevi va ufyari lwa Gershoni

²¹ Naasa Nndumi Iruva karera na Mose kammbia,

²² Ekyena vana va Gershoni nawo, na mmba tawo;

²³ uka myaaka makumi araru na mmwasi, kufikye myaaka makumi araanu, woose yewo vasherundaa efo yeemeny yeele.

²⁴ Yelu ni urundi lwa Vagerson, varunde na ikurika mariyo,

²⁵ wo mmbo vashipoo masullya a vayo, na yeema, soori yeto teesikya-u, na shony tilya teesikya, na isulya lya mwaango wa yeema lyeekwaananya,

²⁶ na isimamba soori ta yaala efo kari eko, na kya mwaanya ulya wa yaanga neefo kari ukee kufii na ulale na kitara kyeerasya, isengetya taari toose, na fyoove fya vayo, na fiiya fyoose fya urundi lwawo, neefyo fyoose firundika-fo, mmbo vasherundaa mashora yoo moose.

²⁷ Urundi loose lwa Vagershon, iryo lyawo lyoose, na urundi lwawo loose, mmbo lushukaa ivavasony lya Aron na vana vakwe; neeni muvavasya iryo lyawo lyoose valyiringe.

²⁸ Yelu ni urundi lwa Vagershoni yoo yeemeny lyeekwaanannya; na uringyi mmbo lushesalallyoo ni Itmari we mwana wa Nkohani Aron.

Mashora a Valevi va ufyari lwa Merari

²⁹ Na efo kwa vana va Merari, vaekyene woose, na kwingyufyari tawo mmba ta va ndeye vawo;

³⁰ uka yeto wa myaaka makumi araru na mmwasi, kufike myaaka makumi araanu, vaekyene, woose vasherunndyaa-u, yoo yeemeny lya ikwananya,

³¹ na marero a ifurumya a iryo lyao ni fya efyo urundiny lwawo loose efyo yeemeny lyekwanannya; ngo ta vayo na ngyuwasha ta wayo,

³² na findo fya yeema fya iringitya taari toose sanda na uvasha na mbambo ta vayo na fyoove fya vayo, na fiiya fya vayo fyoose, na urundi loose mushevavasyaa wo nndu na irina lyakwe kya fiiya fya iryo lyao vasheliringaa.

³³ Yelu ni urundi lwa vana va Merari, urundiny lwawo loose, yoo yeemeny lya ikwanannya, veekallyoo ni Itamari we mwana wa nkohani Aron.

Yeekyenwa lya Valevi

³⁴ Naasa Mose na Aron na vaniini yewo va ironda elyo vakeekyena vana va Kohati, na mmba tawo na mmba ta ndeye vawo,

³⁵ uka valya va myaaka makumi araru na mmwasi, fika myaaka makumi araanu, wo nndu yeto aleanga urundiny lwa yeema yelyo lya ikwanannya;

³⁶ na valya valeekyenwa na va mmba yaawo, ni vandu fiku fivii mayana mfungare na makumi araanu.

³⁷ Yewo mmbo valeekyenwa va ngyufyari ta Vakohati, woose varundyaa yoo yeemeny yelyo lya ikwananya, yewo Mose na Aron valeveekyena, shaasa Nndumi Iruva alevavasya Mose.

³⁸ Neewo valeekyenwa va vana va Gershoni na mmba tawo,

³⁹ uka myaaka makumi araru na mwasi fika myaaka makumi araanu, wo nndu yeto aleanga urundiny lwa yeema yelyo lya ikwanannya.

⁴⁰ Valya valeekyenwa na va ngyufyari tawo na mmba ta vandeye vawo, ni vandu fiku fivii mayana arindaru na makumi araru.

⁴¹ Yewo mmbo valeekyenwa efo kwa Vagershoni, woose valerunda yoo yeemeny lyeekwanannya, shaasa Mose na Aron valeveekyena shaasa Nndumi Iruva alevavasya.

⁴² Neewo valeekyenwa va kwa Merari na ngyufyari tawo na mmba ta vandeye vawo,

⁴³ uka va myaaka makumi araru na mmwasi, kufike myaaka makumi araanu, wo nndu yeto aleanga urundiny yelo lwa yeema yelyo yeele,

⁴⁴ valya valeekyenwa kwawo, kwa vandeye vawo ni fiku firaru na mayana avii.

⁴⁵ Yewo mmbo valeekyenwa va Merari, vekee mmbo Mose na Arona valeveekyena shaasa Nndumi Iruva alevavasya Mose.

⁴⁶ Woose valeekyenwa kwa Valevi, yewo Mose na Aron na vaniini vawo va Israeli valeveekena, na mmba tawo, na vandeye vawo,

⁴⁷ uka myaaka makumi araru na mmwasi kufike myaaka makumi araanu, nndu moose yeto ekwaani urundiny lwa yeema yelyo,

⁴⁸ yewo valeekyenwa ni fiku nyanya mayana araanu na makumi nyanya.

⁴⁹ Ni ivavaso lya Nndumi Iruva, wo nndu na urundi lwakwe, na shaasa vashiipoo, niindo Nndumi Iruva alevavasya Mose.