MEEKYENA 35 - BIBILLYA Mareiyo Meele a Iruva

Miri valeniingo Valevi

¹ Naasa Nndumi Iruva karera na Mose alya kyaandeeny kya Moabu, kufii na mura wa Yordan, kufii na Yeriko kammbia,

² Vavasya vana va Israeli vaniinge Valevi miri naambo vaonise ando kweekaa ando amwi na ando kwe yiisa kuleringitya miri yeyo Valevi valeningwaa.

³ Miri yeyo mmbo vaningwaa vakeefo na ando kwe yiisa vawonise, na findo fyawo fya mmba.

⁴ Na yoo kwa yiisa muninge Valevi, kuuka muriny mmbo kuvaa marende iyana taari toose.

⁵ Nkyo mmbo musheesaa marende kiku kyimwi kuuka yoo nnangani ya muri taaritoose indo,

⁶ Na miri yeyo musheningaa Valevi ni miri irindaru ive ando awo eekusuruma kwakooya nndu ashewaa ungyi nasherishya-u, muvevaniinga na miri ingyi makumi aana naivii ya mmwasi.

⁷ Miri myoose musheningaa Valevi ni makumi aana na nyanya ando amwi na kundo kwa yiisa findo.

⁸ Miri yeyo musheningaa vana va Israeli, yewo veengyi mmbo vawonisaa mmwasi neewo vaangu vaonise miri myaangu, wo nndu kiinani nawe.

Miri ya Veerishiswa

⁹ Kyasia Nndumi Iruva kyerera-se na Mose, kammbia,

¹⁰ Rera na vana va Israeli kuvavie, Elyi mushekillyaa Yordan mwaange Kanaani,

¹¹ mmbo mushetiraa miri yeerishya, naambo kwakooya nndu awaa nndu kya nrenga nanderishya-fo.

¹² Miri yeyo mmbo ishemuviiya nnyeerishya, kimaruma kya mwiitaiya kiduva, naambo mwiiwaa nalawaawa kutani ashesalala yuutyo uvingo ando a vayo.

¹³ Miri yeyo yeerishya mmbo ishevaa irindaru.

¹⁴ Miri iraru ikae kwakulya ya Yordan na ingyi iraru Kanaani kweni.

¹⁵ Miri yeerishya nkimaruma kya vana va Israeli na kimaruma kya veny, na muny akee kwany, naambo yeto moose awaa nndu kikee kya nrenga narishye-fo.

¹⁶ Lyo kwakooya nndu akaba ungyi na kiiya kya minya, yeto mmbo akee mwiiwaa, nawe nkuti nawaawa.

¹⁷ Na kwakooya mmbo alenkaba na iwe lyishiidimaa iwaa nawe kafwa, naasa yeto mmwiiwaa nawe nkuti nawaawa.

¹⁸ Ao kwakooya mmbo alenkaba na kiiya kya kiri kishiidimaa iwaa nndu, nawe kafwa, yeto mmwiiwaa nawe nkuti nawaawa.

¹⁹ Yeto asumani iwaa mwiiwaa mmbwe yeto muni ashemmbwaa.

²⁰ Kwakooya nndu akuna ungyi kya imuswa ao kamweerya kindo, ao kammbereya ando kammbwaa,

²¹ ao kankaba na maako kya ukiduva kafwa, yeu mmbo ashewaawaa, yeto asumani mmbwe ashemmbwaa kyeeri ashenkooyaa.

²² Lyo kwakooya mmbo alenkuna kipashuka nalansuuye nta ao kamweerya kindo nalammbikye kiduva,

²³ ao iwe, nawe keedima ifwa nalakee nkiduva wakwe nta nalankunndye makasha,

²⁴ llyo ikwaanu lyisherumbuyaa yeu alewaa neeto asumani naambwae shaasa usumanu lukai;

²⁵ nalyo ikwaanu mmbo lyishelatyaa nndu yeto lyimwaauwe efo maakony a yeto eesumani immbwaa, ikwaanu lyimmbiire neefo muriny wakwe weerishya, nandekaa-fo fika ufu lwa nkohani wakwe akeemwaambe mafura meele.

²⁶ Lyo kwakooya nndu mwiiwaa andeukaa efo muriny wakwe weerishya

²⁷ neeto eesumani immbwaa kashenkooya eekee boo ya muri yeto weerishya, neeto eesumani immbwaa kammbwaiya-fo, we nnyasheekennyoo uvingo-fo.

²⁸ Mashika yeto mwiwaa mmbo kyenkooye nakae kulya muriny wakwe weerishya kufikye ufu lwa nkohani nniini, nawe kammaa ifwa llyo mwiiwaa yeto nandewuyany na kyeny kwakwe muni.

²⁹ Mavavasyo yaa mmbo musheatanaa fyeeri fyany fyoose ando mukai.

³⁰ Nndu mwiwaa kammutyo ukureeki mmbakureeki nkuti nawaawa, lyo nkureeki umwi nnyamaa yuuta ukureeki lwa nndu lweewaa-fo.

³¹ Mulawarye kindo kyoose kyeetaa elyi nndu awaa-fo, mwiiwaa nkuti nawaawa,

³² ntamulawarye kindo kyoose kimaruma kya yeto arishya muriny naambo nawuye kyeny kwakwe, nakae-fo kushefikya ufu lwa nkohani nniini.

³³ Kwakooya mwatana indo mmushetefusa uruka lwany-fo, mashika ipuswa samu ta vandu mmbo lyitefusaa uruka, nankukaa-fo kiraso kimaa isanngya uruka elyi samu yapusuyo-fo, kuuta ya yeto muni apuswa samu.

³⁴ Kimmba niindo loleny nnu mulashetefusa uruka lwany neeny shiiyo, mashika yeny Nndumi Iruva mmbo shikee na vana va Israeli.