MEEKYENA 34 - BIBILLYA Mareiyo Meele a Iruva

Minyanu ya Uruka

¹ Naasa Nndumi Iruva karera na Mose, kammbia,

² “Vavasya vana va Israeli, kyeeri mushaangaa urukeny lwa Kanaani, llo uruka yelo luvaa ding'u yaany, shaasa minyanu ya vayo ikai,”

³ taari yaany ya sinde mmbo uvaa nnyanu na kasa ka Sini kufii na Edomu, pookya yeeve lya Shumbi, taari ya ngama;

⁴ Kulesoka na sinde kushekooya Akirabimu kufike Sin, na kuukau kufike taari ya sinde ya Kadesh-barnea, kweende kufike Hasar-adari, kundekooya Asimoni,

⁵ na kuuka Asimoni kufike imungony lya Misri, kulella efo yeeveny.

⁶ Taari yaany ya nkwaany mutire fika Yeeve Niini, nnyo ivaa nnyanu taari yeyo.

⁷ Na nnyanu wany wataari ya ndoo, kuuka yoo yeeveny yeyo niini kukooye ifumbu lya Hori;

⁸ Kuukau kundekooya Hamati, kuukau kundekooya Sedada;

⁹ kufike Sifroni, kufike Hasarenani nto nnyanu wany wa taari ya ndoo.

¹⁰ Neeni mmbo muvikaa nnyanu wany wa taari ya ngama upookye Hasarenani fika Shefamu,

¹¹ na kuuka Shafamu kufike Ribla, taari ya ngama ya Aini, kundekooya yeeve lya Kinereti taari ya ngama,

¹² kundefika Yordan, kundekooya yeeve lya shumbi. Yelu llo luvaa uruka lwany na minyanu ya vayo.

¹³ Llyo Mose kavia vana va Israeli, Uruka yelu mmbo mushetiraa mwiikabaa kura shaasa Nndumi Iruva alevavasya wo ufyari luwoniu waavi, ngyufyari keenda na kyenga;

¹⁴ kimmba ufyari lwa Ruben na Gadi wo valemmaa iwonisa waavi lwawo, na kyenga ekyo kya ufyari lwa Manase nawo valemmaa iwonisa waavi lwawo;

¹⁵ ngyufyari yeto ivii na kyenga valemmbonisa waavi lwawo kulya kwakulya ya Yordan, alya Yeriko taari ya ngama.

Uramba lwa Vasongoru Yewo Vakwaani Yaava Uruka

¹⁶ Naasa Nndumi Iruva karera na Mose, kammbia,

¹⁷ Vandu vasheavyaa vandu uruka mmbo yeva, Ni nkohani Eliasari na Yosua we mwana wa Nuni.

¹⁸ Vavesauwa na nndu umwi wo ufyari vaavye vandu uruka.

¹⁹ Na marina awo nng'u yaa, Ufyari lwa Yuda, Kalebi mwana wa Yefune

²⁰ Ufyari lwa Simion ni Shemueli mwana wa Amihudi

²¹ Ufyari lwa Benyaminy Elidadi mwana wa Kisloni

²² Ufyari lwa Dani ni Buki mwana wa Yogli

²³ Ufyari lwa Manase ni Hanieli mwana wa Efodi ni vana va Yosefu

²⁴ Ufyari lwa Efraimu ni Kemueli mwana wa Shiftani

²⁵ Ufyari lwa Sabuloni ni Elisafani mwana wa Paruaki

²⁶ Ufyari lwa Iskari ni Paltieli mwana wa Asani

²⁷ Ufyari lwa Aseri ni Ahihudi mwana wa Shelomi

²⁸ Ufyari lwa Naftali ni Pedaheli mwana wa Amihudi

²⁹ Nndumi Iruva mmbo alesauwa vandu yewo vaavye vana va Israeli uruka lwa Kanaani luve ding'u yaawo.