MEEKYENA 33 - BIBILLYA Mareiyo Meele a Iruva

Kyaaro kya Misri Kundefika Moabu

¹ Kyaaro kya vana va Israeli mmbo kileva indi, kyeeri valeuka Misri na maronda awo veeriwa ni Mose na Aron.

² Mose mmbo alereiya mbony ta kyaaro kyawo shaasa valenkaa Misri shaasa Nndumi Iruva alevavasya, Fyaaro yefyo fyawo mmbo fileva indi.

³ Wo mmbo valepookya Ramesesi mwiiri wa mbee, nkonu ikumi na karaanu. Elyi lya nkonu wa kavii Pasaka immiira Vaisraeli vakauka-fo veeteterwaa ni woko lwa finya lwa Iruva nawo Vamisri veelollye indi,

⁴ kyeeri ekyo llyo Vamisri veetiri ishora lyeerika vana vawo va mbee, llya Nndumi Iruva alevakapa, ando amwi na maruva awo.

⁵ Vana va Israeli veekyuuka Ramesesi vakandemannya ulale alya Sukoti.

⁶ Kuuka Sukoti vakafika Etamu, yoo kasa koomu kamandi.

⁷ Vakauka Etamu vakawuya numa fika Pi-hahiroti kufii na Baal-sefoni, vakamannya ulale alya Migdoli.

⁸ Veekyuuka-u yoo Hahiroti vakeera nnang'ani ya yeeve vakaanga kasa, llyo vakeenda kyaaro kya mikonu iraru yoo kasa ka Etamu vakamannya ulale ando avaangwaa Mara.

⁹ Veekyuuka Mara vakafika Elimu, yoo Elimu mmbo kweeiyo ngyusoka ta mira ikumi na ivii, na miri ya myaangashi makumi mfungare, yoo vakamannya-u ulale.

¹⁰ Vakauka Elimu vakandemannya ulale kufii na yeeve lya Samu,

¹¹ Kuuka-u vakafika Sini,

¹² Kuuka yoo kasa ka Sini vakafika Dofka vakamannyau ulale.

¹³ Numa vakafika Alushi.

¹⁴ Kuuka Alushi vakafika Refidimu, andu kulatiri mura uniwaa mmbandu.

¹⁵ Vakamannya ulale alya kasa ka Sinai,

¹⁶ veekyuukau vakafika Kibrot-hataava.

¹⁷ Veekyuuka-u vakandemannya ulale Heseroti.

¹⁸ Heseroti vakafika Ritma.

¹⁹ Ritma vakafika Rimon-peresi.

²⁰ Uka-u vakafika Keheleta

²¹ Woolea Libna vakafika Risa, vakamannya-u ulale.

²² Woolea Risa vakafika Kiheleta, vakamannya-u ulale.

²³ Kuuka-u vakanndemannya ulale alya ifumbuny lya Sheferi.

²⁴ Kuuka yoo ifumbuny lya Sheferi vakafika Harada.

²⁵ Harada vakafika Makeloti.

²⁶ Makeloti vakafika Tahati,

²⁷ Uka yoo vakafika Tera.

²⁸ Ukau vakeenda Mitka.

²⁹ Uka Mitka vakafika Hashmona,

³⁰ kuuka-u vakafika Moseroti.

³¹ Veekyuuka-u vakafika Bene-yakoni.

³² Uka Beneyakani vakeenda Hor-hagidgadi

³³ Kuuka-u vakafika Yotbata,

³⁴ Veekyuuka-u vakafika Abrona.

³⁵ Uka-u vakafika Esion-geberi.

³⁶ Kuuka-u vakafika Kasa ka Sini.

³⁷ Vauka-u vakafika Kadeshi, vakamanya ulale yoo ifumbuny lya Hori yoo nnyanuny wa uruka lwa Edomu.

³⁸ Nkohani Aron kavavasyo-u ni Nndumi Iruva nasaami neefo ifumbu lya Hori, kandifiyya-fo, wiikee mwaaka wa makumi aana uka vana va Israeli vamuuka Misri.

³⁹ Nawe Aron mmbo eetiri myaaka iyana na makumi avii na iraru kyeeri alefiyya efo Hori.

⁴⁰ Naasa mangyi ya Aradi we Mkanaani ekee taari ya Negebu ya uruka lulya lwa Kanaani keeta mbony ta isha lya vana va Israeli.

⁴¹ Nawo llya valeuka alya ifumbuny lya Hori vakashefika Salmona vakamannya-u ulale.

⁴² Kuukau vakafika Pinoni.

⁴³ Kuuka-u vakafika Oboti.

⁴⁴ Kuuka Oboti vakafika Iye-abaramu alya nnyanuny wa Moabu.

⁴⁵ Kuuka yoo vakafika Dibon-gadi.

⁴⁶ Kuuka Dibon-gadi vakafika Alimon-dibilataim

⁴⁷ Kuuka yoo vakafika fidoorony fya Abarimu kufii na Nebo

⁴⁸ Kuuka-u vakafika fyaandeeny fya Moabu, yoo kufii na mura wa Yordan, alya Yeriko.

⁴⁹ Vakamannya ulale kufii na Yordan yoo nnang'ani ya Bet-yeshimoti na Abel-shitimu fyaandeny fya Toabu.

Uramba lwa Iruuka Kanaani

⁵⁰ Naasa alya fyaandeeny fya Moabu Nndumi Iruva karera-u na Mose, kufii na Yordan, yoo Yeriko, kammbia,

⁵¹ Rera na vana va Israeli, kuvavie indi, “Kyeeri mukillyaa Yordan na yaanga urukeny lwa Kanaani,

⁵² mmbo mushuumbutaa-fo vandu va uruka yelo, mmbo mubabaraa mawe yoo awo akee mareiye mafwanu mulyamare na mafwanu awo, na ando awo a miindye mufishefishe deny,”

⁵³ llyo mutireny uruka yelo neekaa-fo, mashika mmbo shamuniinga uruka yelo luve ding'u yaany.

⁵⁴ Neeni mmbo mushetiraa uruka kweekaba kura kweelatya ngyufyari tany, ufyari uniini luwonise mmwasi, na ufyari udu indo shaasa vafye, shaasa kura ivaa niindo nndu yeto ashetiraa yoo, mutire uruka shaasa ngyufyari tany tikai.

⁵⁵ Lyo mwanra mulaumbuta vandu va uruka yelo neevarishisa deny, yewo muvasaaraafo mmbo vashevaa sha mbashwe misony any na miinga mbafuny tany, vamusaveese efo urukeny elo mukai.

⁵⁶ Mwanra mulavaumbuta-fo, mmbo nshemukabaa yeni shaasa shekunndye ivakaba wo.