MEEKYENA 32 - BIBILLYA Mareiyo Meele a Iruva

Ngyufyari ta Taari ya Ngama ya Yordan

¹ Vana va Ruben na va Gadi mmbo veetiri findo fya mmba fiingyi nnu, nawo llya valelola vakakooya uruka lwa Yeseri na lwa Gileadi ni usha nnu kwa yiisa findo;

² vana ewo va Gadi na va Ruben vakasora Mose na nkohani Eliaseri na vasongoru vawo, vakavavia,

³ Ataroti na Diboni, Yezeri na Nimra Heshboni na Elieale, Sebamu na Nebo na Beoni

⁴ llyo uruka elo Nndumi Iruva, alelukaba vana va Israeli veelollye, nalo ni usha kwa yiisa findo, na yese mashinga afo mmbo lukee veesa findo.

⁵ Vakaamba, Kwakooya kwalwiirikya yese luniingwa uruka elo luve lweru lure lulakillya Yordan.

⁶ Mose kavavia vana yewo va Ruben na Gadi, A vana va maye vany mmbo vashendaa fireny neeni mwiimuye yaa?

⁷ A nkikyi elyi mukunndye iwaa vana va Israeli nrima vare valaruuka Yordan indetira uruka yelo Nndumi Iruva alevaniinga?

⁸ Ni indo-da na vande valya vany valetana kyeeri shilevaruma vauka alya Kadesh-barnea naambo vandesaiya uruka.

⁹ Llya valerwa vakakooya imungo lya Eshikoli vakalollya uruka lulya, vakawaa vana va Israeli mirima, naambo valasheerwa neendetira uruka yelo Nndumi Iruva alevaniinga.

¹⁰ Llyo unyafi lwa Nndumi Iruva lukarwa nawe kalya mboo, kaamba,

¹¹ Ni kya dede nkwiifo nta nndu umwi wa valya valeuka Misri, bookya yewo va myaaka makumi avii enda na mbee asheangaa urukeny yelo shilevikya Abrahamu na Isaki na Yakobo kyaasa-fo, ni elyi kulore valeshiirikya na nrima moose;

¹² lyo we Kalebi mwana wa Yefune Mkenazi na Yosua mwana wa Nuni, kimmba wo valeirikya Nndumi Iruva na nrima deny, wo vashefikaa-fo.

¹³ Unyafi lwa Nndumi Iruva lukarooya vana va Israeli, kavaruuta-ruta kulya kasa veenyanyakaa, ando a myaaka makumi aana, kutani irika elyo lyilelyamarya Nndumi Iruva lyilemaa isiiya-fo.

¹⁴ Lola ulaalu neeni mmbo mwawuya alya a vande vany, nnyo mikaaye ya vandu varavi, naambo mwaante-se unyafi lwa Nndumi Iruva lusheye Israeli.

¹⁵ Mashika lyo mukammeeveka nawe mmbo ashemuraa musiiye kunu kasa, na vandu yeva woose vamamitwa kimaruma kyany.

¹⁶ Naasa vakasembeya kufii nawe vakaamba, Yese mmbo lutanaa miri ya findo fyeru fya yiisa yaa, lutannyeu na miri kimaruma kya vana veru;

¹⁷ lyo yese luveni mmbo lushiipoo fisha fyeru lwiire mbee ya vana va Israeli woose kutani lwavafita efo vakeenda lyo vana veru wo mmbo vakaa miriny yeyo luiringityaa na turuve, varingwa nisha kya vandu va uruka elo.

¹⁸ Yese lluwuyaa kwerufo, kutani vana va Israeli woose vamaa iwonisa ando awo efo.

¹⁹ Mashika yese llushetiraa ding'u amwi nawo efo kwakulya ya Yordani-fo, mashika ding'u yeeru mmbo ikee taari ya ngama ya Yordan.

²⁰ Naasa Mose kawuya ivavia, “Lyo kwankooya mushiboo fisha fya fira mwiire nafyo mbee mwiisalallyo ni Nndumi Iruva,”

²¹ na lyingyi kwankooya womi vany woose vashiiboo fisha varuuke Yordan kutani Nndumi Iruva amaa yuumbuta vakiduva veru woose,

²² na vandu yewo vamaa ivingwa yoo mbee ya Nndumi Iruva llyo yeni muwuyeny kwany mulakitiri mbese mbee ya Nndumi Iruva ao kwa vana va Israeli llyo na Nndumi Iruva asheirikya uruka yelu luve lwany.

²³ Lyo mwanra mulatana indo, mmbo mulyamaryaa Nndumi Iruva nnu, neeni manyiny ulyamari yelo nkuti lumuwoye.

²⁴ Kyasia songosieny miri kimaruma kya vana vany, na miri ya moonri any, lyo muveinutya neefyo mwavikya kyaasa.

²⁵ Naasa vana yewo va Gadi na Ruben vakarera na Mose vakammbia, Yese varundi vafo mmbo lutanaa shaasa yewe Nndumi Iruva weeru kwaluvavasya.

²⁶ Vana veru na vaka veru na moonri eru, na ng'umbe teru toose mmbo vakaa yaa miriny ya uruka lwa Gileadi;

²⁷ lyo yese varundi vafo luruuke, wo nndu na fisha fyakwe, fya fira, mbee ya Nndumi Iruva, lweende fireny shaasa yewe Nndumi Iruva weeru kuryeyaamba.

²⁸ Kyasiany Mose kavavasya nkohani Eliasari na Yosua mwana wa Nuni na vaniini va mmba ta ngyufyari ta Israeli kya mbony ta vandu yewo.

²⁹ Mose mmbo alevavia indi “Kwakooya vana va Gadi na vana va Ruben mmbo varuuka mura Yordan ando amwi neeni, wo nndu na fisha fyakwe veere mbee ya Nndumi Iruva, neeni muvinge uruka elo llyo mushevaniingaa uruka lwa Gileadi luve ding'u yaawo;

³⁰ lyo vakallema iruuka ando amwi neeni veerye fisha fyawo, ding'u yaawo mmbo ishevaa efo kweni Kanaani.”

³¹ Llyo vana va Gadi na va Ruben vakarouwa, vakaamba, Shaasa Nndumi Iruva aleluvavasya yese varundi vafo, niindo lushetanaa.

³² Mmbo luruukaa lurye fisha fyeru mbee ya Nndumi Iruva, lwaange Kanaani, neese ding'u yeeru mmbo ishevaa kunu Yordan.

³³ Naasa Mose kaniinga vana va Gadi na va Ruben na kyenga kya ufyari lwa Manase mwana wa Yosefu uruka lwa mangyi Sihoni wa Vaamori, na Ogu wa Bashani na miri yaawo myoose yekee miringitye turuve.

³⁴ Vana va Gadi vakatana miri ingyi nnyo Diboni na Ataropti na Aroeri,

³⁵ na Atiroli-shofani na Yaseri na Yogbeha,

³⁶ na Bet-nimra na Bet-harani, mmiri itiri turuve, na miri ya moonri.

³⁷ Vana va Ruben vakatana muri wa Heshboni, na Eleale, na Kiriatiaimu;

³⁸ na Nebo, na Baal-meoni, (marina awo mmbo alealashwa,) na Sibna, na miri yeyo valeitana vakaifishya marina engyi.

³⁹ Nawo vana va Makiri we mwana wa Manase vakeenda vakatira Gileadi vakasoka Vaamori yewo veefo.

⁴⁰ Naasa Mose kaniinga Makiri mwana wa Manase uruka elo lwa Gileadi nawe kakaa-fo,

⁴¹ Na Yairi we mwana wa Manase kandetira fyuungo fya Gileadi, kafivaanga Hawot-yairi,

⁴² Nawe Noba kandetira Kenat na fyuungo fya vayo, neefifishya Noba, kweelatya irina lyakwe muni.