MEEKYENA 31 - BIBILLYA Mareiyo Meele a Iruva

Fira Sheele na Vamidian

¹ Naasa Nndumi Iruva karera na Mose, kammbia,

² Vana va Israeli vataiye mbele vamidiani kiduva, llyon yewe kufwaa neesanga na vandu vafo.

³ Naasa Mose karera na vandu, kavavia, Niinngyeny vandu yewo vakee neeni veende fireny, indekabana na Vamidian.

⁴ Uteny-fo vandu kyiku kyimwi veende fireny wooka wo ufyari lwa vana va Israeli.

⁵ Naasa vakautwa-fo fiku, kiku kimwi wo ufyari, womi fiku ikumi na fivii valesauwa veende fireny.

⁶ Naasa Mose kavaruma veende fireny wo ufyari kiku kimwi, wo na Finehasi akee mwana wa nkohani Elieseri, nawo veende fireny na fiiya fya ando eele, na maranda yoo a yiivya, timattwaa vandu.

⁷ Naasa vakakabana na Vamidian shaasa Nndumi Iruva alevavasya Mose, vakawaa womi woose.

⁸ Vakawaa vamangyi va Vamidian na vandu vengyi, Evi, na Rekemu, Suri na Huri, na Reba, mmbo vamangyi varaanu va Midiani, na Balaamu mwana wa Beori nawe kawaawa.

⁹ Vana va Israeli vakakamara vaka va Midiani mfungwa amwi na vana vawo, na ng'umbe tawo na mburu, na findo fingyi vakafikamara.

¹⁰ Na miri yaawo myoose, na ngyulale tawo toose vakatimamita na muro,

¹¹ Nawo vakeeboo findo efyo fyoose, na mifungwa yeyo, ya vandu na findo fikee na muu.

¹² Nawo vakafyeende mbee ya Mose na nkohani Eliasari na mbee ya ironda lyoose lya Israeli yoo ulaleny imungony lya Moabu, kufii na Yordan yoo Yeriko.

Iwuya Wooka Fireny

¹³ Naasa Mose na nkohani Eliasari na vasongoru va ironda elyo vakasomuka efo ulaleny indevaammbya.

¹⁴ Naasa Mose kasua na vasonguru vaniini va itorito, yewo veekallya fiku fiku, neewo va mayana, mayana, valenkaa fireny.

¹⁵ A mmbo mulevara na muu vaka woose?

¹⁶ A yeva nshiwo valelemba vandu veru Israeli kyeendwa m'Balaamu, vakalyamarya Nndumi Iruva alya Peori naasa ngapo ikakooya ironda lya Nndumi Iruva.

¹⁷ Naasany ulaalu weeny vana woose va kyuumi, na wo nka alenkaa na nndumi.

¹⁸ Kyeendi vaka na vana va kyika valandemanyi nndumi, vareny na muu kimaruma kyany.

¹⁹ Neeni wo nndu alewaa nndu ao alebaana nnying'a nakae poo ya ulale, mukwiilyise ando a mikonu iraru, na nkonu wa mfungare na mfungwa waany.

²⁰ Na soori toose, na kindo kya shonyi, na kya mafwaa a mburu, na fiiya fyoose fya kiri mufiilyise, neeni muveni.

²¹ Na Eliasari kavia womi woose valenka fireny Elyi llyo ivavaso Nndumi Iruva aleniinngya Mose;

²² wo kindo kyoose kishiidima isisirya muro, mmbo mukyeesaa na muro, kyeeremuke, numa kyiilyiswa mmura usheekaa,

²³ na kyoose kilashidimaa isisirya muro kiveitwa efo mureny yeto.

²⁴ Neeni mmbo musangyaa soori tany elyi nkonu wa mfungare, mweeremuke, llyo mwaangeny efo ulaleny.

Yaava Mifungwa

²⁵ Naasa Nndumi Iruva karera na Mose, kammbia,

²⁶ Ekyena vandu yewo valekamarwa mfungwa, na findo yefyo fya ivika, yewe na nkohani Elieseri, na vasongoru va mmba tawo;

²⁷ kwaave findo efyo kavii, kwa yewo valeuka fireny, na kwa ironda lyoose.

²⁸ Numa kuwarye kwa vandu yewo valeenda fireny waavi lwa Nndumi Iruva nndu umwi nnang'ani ya mayana araanu, na ng'umbe, na mishungu, na moonri;

²⁹ numa uta-u kyenga kya nnang'ani kukiniinngye nkohani Eliasari, kive kiraso kyakwe kwa Nndumi Iruva

³⁰ Na yoo kyengeny ekyo kya vana va Israeli mmbo kuwaryaa-fo kimwi kya makumi araanu uka efo vanduny, ng'umbe, mishungu, moonri, findo efyo kuniinge Valevi yewo veeringa ando eele.

³¹ Naasa Mose na Eliasari vakatana shaasa Nndumi Iruva alevavasya Mose.

³² Na yefyo filesaa filakee fyaave ni moonri fiku mayana arindaru makumi mfungare na araanu,

³³ ng'umbe fiku makumi mfungare na ivii,

³⁴ mishungu fiku makumi arindaru na imwi,

³⁵ na vandu vakava fiku makumi araru na vavii, mmbo vaka yewo kulore veeshi womi,

³⁶ na kyenga kya nnang'ani kya yewo valeenda fireny yeekyena ni moonri fiku mayana araru makumi araru na mfungarena mayana araanu;

³⁷ na waavi lwa Nndumi Iruva lwa moonri yoo ni mayana arindaru makumi mfungare na firaanu.

³⁸ Na ng'umbe ni fiku makumi araru na irindaru, nang'u waavi lwa Nndumi Iruva ni ng'umbe makumi mfungare na ivii,

³⁹ na mishungu fiku makumi araru na mayana araanu, waavi lwavayo lwa Nndumi Iruva ni mishungu makumi arindaru na imwi.

⁴⁰ Na vandu fiku ikumi na firindaru, waavi lwa Nndumi Iruva vandu makumi araru na fivii.

⁴¹ Naasa Mose kaniingya nkohani Elieseri waavi yelo, nkiraso kisha kwa Nndumi Iruva shaasa Nndumi Iruva alevavasya Mose.

⁴² Neefo kyengeny yekyo kya nuang'ani kya vana va Israel Mose mmbo aleirauwa na vandu yewo valeenda fireny,

⁴³ naasa kyenga yekyo kya vandu kyekee moonri fiku mayana araru makumi araru na mfungare mayana araanu,

⁴⁴ na ng'umbe fiku makumi araru na firindaru kya vana va Israeli Mose kootau kimwi kya makumi araanu,

⁴⁵ na mishungu fiku makumi araru na mayana araanu

⁴⁶ na vandu fiku ikumi na firindaru, vandu na findo fikee na muu, kaniingya Valevi valya veeringa ando eele, shaasa Mose alevavasyo ni Nndumi Iruva,

⁴⁷ uka kyengeny kya vandu va Israeli, Mose keebo nndu umwi nnang'ani ya wo vandu makumi araanu, a vandu naakwa ni a mafisi, kaniingya vana va Levi yeto akeensimbe mashora a yeema ya Nndumi Iruva; shaasa Nndumi Iruva evavasa Mose.

⁴⁸ Na veekallya itorito fikufiku, na vashilyi fikufiku, na va mayana, vakasheya Mose,

⁴⁹ vakammbia, Yese mashinga afo mmbo luleekyena vandu va fira yewo vakee kwasi yeeru, na nkwiiyo nta umwi alereka-fo.

⁵⁰ Neese lukeende waavi lwa Nndumi Iruva luuka kwa wo nndu, lwa findo fya saabu, na findo fya ngata shiingyi, ivika usandi lweru na Nndumi Iruva.

⁵¹ Mose na nkohani Eliasari vakawarya saabu yeyo na fia filya filesongosyo fyoose.

⁵² Na saabu yeyo valeengye Nndumi Iruva ya vashilyi yewo va fiku na va mayana, mayana yekee shekeli fiku ikumi na firindaru na mayana mfungare na makumi araanu,

⁵³ (mashika vandu yewo va fira mmbo valetira mifungwa yakwe, wo nndu.)

⁵⁴ Naasa Mose na nkohani Eliasari vakawarya saabu yeyo kwa vashilyi yewo va fiku fiku na va mayana, mayana vakayeende efo yeemeny yeele, naambo ive kindo kyeekummbwa kwa vana va Israeli mbee ya Nndumi Iruva.