MEEKYENA 3 - BIBILLYA Mareiyo Meele a Iruva

Vana va Aron

¹ Naasa eti nto ngyeeri ya Aron na Mose, nkonu ulya Nndumi Iruva alerera na Mose alya ifumbuny lya Sinai.

² Vana yewo va Aron mbo yeva, wa mbee ni Nadabu, na Abihu na Eliasari na Itamari.

³ Yoo ng'u marina a vana va Aron, mmbo makohani vakevaambe mafura, vakaatwa mashoreny naambo varunde ishora lya ukohani.

⁴ Naasa Nadabu na Abihu vakafwa mbee ya Nndumi Iruva, llya valetana kindo kivisho kyeeri vekeningya Nndumi Iruva kiraso, alya Sinai, nta mmbetiri vana-fo, na Eliasari na Itumari vakarunndya Nndumi Iruva ishora lya ukohani mbee ya Aron. Ndeye waawo.

Vana va Valevi Vasawuwa Irunndya Vakohani

⁵ Naasa Nndumi Iruva karera na Mose, kammbia,

⁶ Ende ufyari lwa Valevi kufii, vakee mbee ya nkohani Aron, vandunndye.

⁷ Nawo varinge, Aron ikwaanu lya vandu woose mbee ya yeema lya ikwaanu na irunndya ando eele.

⁸ Vavavare fiiya fyoose fya yeema elyo, neeringa vana va Israeli naambo varunde ando eele, Neeve kuninngye Aron na Vana varundyen.

⁹ Kuniingye Aron na vasero vakwe yewo vakee Valevi vave vakwe deny kimaruma kya vana va Israeli.

¹⁰ Neewe kuvike Aron na vana vakwe vatire ukohani lwawo; na muny eto asheserikyaa kufii nawaawa.

¹¹ Naasa Nndumi Iruva kavia na Mose,

¹² Lolate mmbo shileuta Valevi yewo yoo nnang'ani ya vana va Israeli mmbo vavaa vakwa,

¹³ mashika vana yewo va mbee ni vakwa; uka kyeeri kilya shilewaa vana va mbee woose va kulya urukeny lwa Misri neeny shavika vakifu vana va mbee va Israeli va vandu na findo fyeevikya; vave vakwa. Yeny mmbwe Nndumi Iruva

Valevi Veekyenwa

¹⁴ Naasa Nndumi Iruva karera na Mose alya kasa ka Sinai, kammbia,

¹⁵ Ekyena vana va Levi neereiya mmba tawo, wo mwana wa kyuumi va mwiiri umwi na mmwasi.

¹⁶ Naasa Mose kavaekyena shaasa Nndumi Iruva alemmbavasya.

¹⁷ Na vana va Levi mmbo yeva, marina awo; Gershoni na Kohati na Merari.

¹⁸ Na marina a vana va Gershoni kwilatya mmba tawo ni Libni na Shimei.

¹⁹ Na vana va Kohati kwi ilatya mmba tawo ni Amramu, na Ishari na Hebron na Usieli.

²⁰ Na vana va Merari kwi ilatya mmba tawo ni Mahli, na Mushi. Yeto nto ngyufyari ta Valevi kwi mmba ta vandeye vawo.

²¹ Kulya Gershon mmbo veefo vandu va mmba ya Valibni na va mmba ya Vashimei, mmbo va ngyufyari ta Vagershoni.

²² Yewo valeekyenwa, kulya kwawo lya womi woose, uka mwiiri umwi na mmwasi, yewo valeekyenwa ni fiku mfungare na mayana araanu.

²³ Va ufyari lwa Gershoni mmbo vareiya yeema numa ya ulale, taari ya nkwaany

²⁴ Na nniini wa mmba ta Vagerishoni avaa ni Eliasafu mwana wa Laeli.

²⁵ Na uringyi lwa Vagershoni efo yeemeny yeele yoo ulaleny, na yeema na kifiniko kya vayo, na isullya lya mwaango wa yeema yeele,

²⁶ na efo isimamba lya soori mbai ya kari, na mwaango wa kari, kufii na ulale, na kufii na kitara kyeerasya taari toose, na fyoove fya mashora a vayo fyoose.

²⁷ Na kwa Kohati ni va mmba ya Vaamrami na vammba ya Vaishari na mmba ya Vahebroni na Vausieli yewo mmbo ngyufyari Vakohati.

²⁸ Shaasa yeekyena lya womi woose lyikai, uka va mwiiri umwi na mmwasi, vekee fiku nyanya na mayana arindaru, yewo mmbo varingi va ando yo kweele.

²⁹ Va ufyari lwa Kohati mmbo vavikaa ulale lwawo taari ya sinde.

³⁰ Na nniini wa mmba yaawo wo Vakohati ni Elisafani mwana wa Usieli.

³¹ Na fiiya vashevavaraa ni isanduku elyo, mesa, na nri weetira taa, kitara kyeerasya, na fiiya filya fya ando kweele filya varundaa nafyo urundi yelo, na soori ilya irumbuyeu, na urundi lwa vayo loose.

³² Na Eliasari we mwana wa Aron akee nkohani mmbo avaa nniini wa vaniini va Valevi, navesalallya varingiy yewo va ando kweele.

³³ Neefo Merari ni va mmba ya Vamahi, na Vamushi, nawo ni va mmba ta Merari.

³⁴ Neewo valeekyenwa kwawo womi uka mwiiri umwi na mmwasi vekee fiku firindaru na mayana avii.

³⁵ Na nniini wa va kmmba ta Merari ni Surieli we mwana wa Abihaili; yewo vakareiya ulale taari ya ndoo.

³⁶ Na ushilyi valevavasyo vana va Merari ni ilola maboo a ando yoo, na firembo fya vayo na ngo ta vayo, na uvasha, na fiiya vya vayo fyoose, na urundi lwavayo loose;

³⁷ na soori yeto tiringitye kari eko na uvasha lwa vayo na mbambo tavayo na fyoove fya vayo.

³⁸ Na yewo vashekaa taari ya ngama ya ulale, mbee ya yeema efo mwi ushee nafo, mmbo yeva, ni Mose na Aron na vana vawo, yewo varingaa ando yoo kweele, llo uringyi lwa vana va Israeli, na muny asheserikyaau nawaawa.

³⁹ Kwa Valevi yewo valeekyenwa shaasa Mose na Aron valevavasyo ni Nndumi Iruva, woose uka mwiiri umwi na mmwasi ni vandu fiku makumi avii na fivii.

Vavee va vana va Valevi ando a vavee va Nndumi Iruva

⁴⁰ Naasa Nndumi Iruva kavia Mose, Ekyena womi woose vavee va vana va Israeli, uka wa mwiiri umwi na mmwasi, na marina awo.

⁴¹ Mmbo kutiraa Valevi kimaruma kyakwa yeny. (Yeny mmbwe Nndumi Iruva) ando a yewo woose vavee kwa vana va Israeli na wo kindo kivee kiwonikye kwa Valevi ando a efyo fiwonikye kwa vana va Israeli.

⁴² Mose kaveekyena shaasa Nndumi Iruva alemmbavasya, vavee woose efo vaneny va Israeli.

⁴³ Vavee woose va kyuumi na marina awo va Israeli, uka mwiiri umwi na mmwasi, yewo valeekyenwa, vakafikya fiku makumi avii na vavii mayana avii makumi mfungare na vararu.

⁴⁴ Naasa Nndumi Iruva karera na Mose kammbia,

⁴⁵ Iboo Valevi ando a vavee va vana va Israeli na findo fya mbee fya Valevi ando a findo fyawo, na Valevi vave vakwa Yeny, mmbwe Nndumi Iruva.

⁴⁶ Na kya ivawua vandu yewo mayana avii na makumi mfungare na vararu yevo vavee va Israeli, veelanyi yeekyena lya Valevi,

⁴⁷ mmbo kushipoo shekeli isaanu kwa wo nrwe wa nndu, kwa shekeli yeyo ya ando eele,

⁴⁸ na fesa yeto ta yewo valevauva tilesaa tininngywa Aron na vana vakwe.

⁴⁹ Naasa Mose kavavesa fesa ta ivawuo kwawo, yewo valeengereka yeekyena lya valewauwa ni Valevi;

⁵⁰ Kawarya fesa yeto kwa vavee valya va Israeli shekeli kyiku kimwi mayana araru na makumi arindaru na isaanu, ni shekeli ya ando kweele;

⁵¹ naasa Mose kaniinngya Aron na vana vakwe fesa yeto taivawuo, shaasa Nndumi Iruva alemmbavasya.