MEEKYENA 28 - BIBILLYA Mareiyo Meele a Iruva

Firaso fya mwiindye

¹ Naasa Nndumi Iruva karera na Mose kammbia,

² Vavasya vana va Israeli indi, Firaso fyakwa, shoonga yakwa ya firaso fyeekora na muro fya nrungo nsha usenyi mmbo mushiserisyaa kyeeri kilya kisumani.

³ Kuvevavia, “Ekyi nkyo kiraso kyamamitwa na muro kyeserisya Nndumi Iruva ngurana ya suva ya mwaka umwi ilatiri mfere, wo nkonu ngurana ivii, ni kiraso kyemamitwa na muro kya mikonu myoose.”

⁴ Ngurana imwi mmbo ishuutwaa ngama na ingyi nkwaany,

⁵ ando amwi na kyenga kya ikumi kya kibaba kya nswa mmamiri ni kiraso kya nswa nato usasandwa na mafura.

⁶ Nkiraso kyemamitwa na muro kya mikonu myoose kilevavasyo uka alya Sinai, kyive nrungo nsha kwa Nndumi Iruva

⁷ Na kiraso kya kindo kyeena kyikee ni kindo kinangaa na ngurana yeyo, fyuutyo Nndumi Iruva ando yoo eele.

⁸ Na ngurana yeyo ya kavii yuutwa kyeeri kya nkwaany, sha ilya ya ngama, ni kiraso kyakwe kyeena, niindo kitanwaa, nkyo kiraso kyemamita na muro kitiri nrungo nsha kwa Nndumi Iruva.

Kiraso kya Sabato

⁹ Kyeendi lyo nkonu wa sabato mmbo vaserisyaa-u ngurana ivii ta suva, ta mwaaka umwi, shisha, na fyenga fivii fya ikumi fya nswa mmamiri, nkyo kiraso kya nswa, usasandwa ando amwi na kiraso kyakwe kyeena;

¹⁰ nkyo kiraso kya wo sabato, raany yekyo kya mikonu myoose na yekyo kya mfinyo.

Kiraso kya Nkonu wa Mbee wa Mwiiri

¹¹ Na yoo mabookyony a mwiiri mmbo mushuutyaa Nndumi Iruva firaso fyemamitwa na muro, ngashe ivii ta shau, na suva imwi, na ngurana ta suva mfungare ta mwaaka umwi, tilatiri mfere;

¹² ando amwi na fyenga firaru fya kibaba nswa mmamiri, nkyo kiraso kya nswa, ukeensasande na mafura, kwa wo ngumbe, na nswa mmamiri fyenga fivii ukee nsasande na mafura na suva yeyo imwi;

¹³ na kyenga kyimwi kya ikumi kya nswa mmamiri na mafura wo ngurana ya suva, five kiraso kya nrungo nsha kyautwa kwa Nndumi Iruva kyeemamitwa na muro.

¹⁴ Na firaso fyeena mmbo fivaa kyenga kya nini na ng'umbe, na kyenga kya lita ya mfinyo isandwa na suva yeyo na kyenga kyingi kisandwa na ngurana yeyo ya suva, na yekyi nkyo kiraso kyemamitwa kya wo mwiiri wa mwaaka.

¹⁵ Na mburu imwi ive kiraso kya ulyamari, iniingyo wo nkonu mwasi ya yeyo yemamitwa na muro, na kiraso kyeena.

Kiraso kya Pasaka

¹⁶ Nkonu ikumi na kaana wa mwiiri wa Abibu, ni Pasaka ya Nndumi Iruva

¹⁷ Nkonu ikumi na karaanu wa mwiiri yeto ni nkonu nniini; mikate ilatiri n-dooko mmbo ilyiwaa ando a mikonu mfungare.

¹⁸ Nkonu wa mmbee mmbwa mwiindye, mmurunda nta ishora lyimwi-fo,

¹⁹ lyo mmbo musheendee firaso fyemamitwa na muro kwa Nndumi Iruva, ngashe ivii ta shau, na suva imwi, na ngurana mfungare ta suva ta mwaaka umwi, tilatiri mfere;

²⁰ ando amwi na firaso fya nswa mmamiri na mafura, fyenga firaru kwa ng'umbe imwi, na fyenga fivii kwa suva imwi;

²¹ na kyenga kimwi kwa ngurana ya suva, ngurana tilya mfungare;

²² na mburu imwi ive kiraso kya ulyamari, luve usandi kimaruma kyany.

²³ Mmbo muserisyaany findo efyo mbai na kiraso kyemamita kilya kya ngama kya wo nkonu.

²⁴ Mmbo mushendee firaso indo, ando a mikonu mfungare kive shoonga ya kiraso kyemamita na muro, nto nrungo nsha usennyi Nndumi Iruva, ando amwi na kiraso kyeena.

²⁵ Na nkonu wa mfungare ikwaanu yeele, mularundaa nta ishora lyimwi.

Kiraso kya Sukukuu ya Fimu

²⁶ Na nkonu wa fimu fya mbee, elyi mushyenngyee Nndumi Iruva kiraso kya nswa mwiiya, kya sukukuu yaany ya mifungare llyo mushevikaa mwiinndye, mularundaa nta ishora lyimwi,

²⁷ muute firaso fyemamita five nrungo nsha kwa Nndumi Iruva ngashe ivii ta shau, suva imwi, ngurana ta suva mfungare ta mwaaka umwi;

²⁸ na firaso fya nswa mmamiri ukensasande na mafura, fyeenga firaru fya ikumi wo ng'umbe, na fyenga fivii kwa suva,

²⁹ na kyenga kimwi kwa wo ngurana ta suva tilya mfungare.

³⁰ Na ndafu imwi ya usandi lwany.

³¹ Mbai na kiraso ekyo kyeekora kya wo nkonu, na ekyo kya nswa, mmbo mushutaa findo efyo fya mmba fya ivikya ando amwi na firaso fyeena.